कोरोनां यानाः न्हूदँ नं प्रभावित

तःधंगु ज्याझ्वः मजुइगु तिथि विवाद बारे थौं सहलह

येँ (नेपालभाषा टाइम्स) – कोरोना महामारीया कारणं थुगुसी नेपाल संवत्या न्हूदँ ११४१ हनेगु ज्याझ्वःत प्रभावित जुइफुगु खँ धाःगु दु । न्हूदँ हनेगु झ्वलय् याइगु ततःधंगु सभा, समारोह, सांस्कृतिक र्‍यालीत थुगुसी याये फइगु सम्भावना मदया वंगु खँ नं थन हयाहःगु दु ।

सम्बन्धित व्यक्तितय्सं धाः कथं थुगुसी न्हूदँया लसताय् येँया बसन्तपू लिसें यल व ख्वपय् जुइगु सांस्कृतिक र्‍यालीत पिहां वइगु सम्भावना मदया वंगु दु । सामाजिक दूरी कायम यायेमाःगु लिसें स्वास्थ्य सम्बन्धी मापदण्ड पूवंकेगु झ्वलय् अज्याःगु ज्याझ्वःत यायेगु सम्भव मदुगु खँ सूत्रं धाःगु दु । थिमिया शंखधर चोकय् च्वंगु शंखधर साख्वाःया झ्वाताय् स्वां देछायेगु ज्याझ्वः धाःसा सीमित मनूत च्वनाः अनौपचारिक रूपं सम्पन्न यायेगु ग्वसाः जुयाच्वंगु खँ धाःगु दु । अन दँय्दसं प्रधानमन्त्रीयात हे मूपाहां दयेकाः स्वां देछायेगु ज्याझ्वः याना वयाच्वंगु खः ।

मंकाः न्हि क्वःछीगु कुतः :
थ्वहे झ्वलय् थुगुसी नं खने दयाच्वंगु स्वन्तिया तिथि विवाद समाधान यायेत थौं थीथी खलः पुचःतय् दथुइ भर्चुयल मुँज्या च्वनेत्यंगु दु । स्वन्तिया तिथि विवादं यानाः न्हूदँ गुकुन्हु हनेगु धइगु अन्यौल पिहां वःगु जुयाः उकिया समाधान यायेगु लागिं थौं नेवाः देय् दबू, नेपालभाषा मंकाः खलः येँ, नेपालभाषा मंकाः खलः यल, न्हूदँ समारोह समिति व राष्ट्रिय विभूति शंखधर साख्वाः प्रतिष्ठानया मंकाः ग्वसालय् थ्व मुँज्या च्वनेत्यंगु खः ।

थ्व मुँज्यापाखें थुगुसी तिथि विवादया दथुइ न्हूदँ गुकुन्हु हनेगु धइगु बारे छगू हे धारणा दयेकेगु ज्या जुइ धाःगु दु । मुँज्यापाखें मंकाः कथं न्हूदँ हनेगु छगू हे तिथि पिकायेधुंकाः थौं हे मंकाः वक्तव्य जारी यासें सार्वजनिक जानकारी बीगु खँ धाःगु दु ।

न्हूदँ समितिया न्हूधाः :
मेखे नेपाल संवत्या न्हूदँ हनेगु लागिं दँय्दसं गठन याइगु न्हूदँ समारोह समिति थुगुसी न्हूगु गठन मयासे नेपाल संवत् ११४० या न्हूदँ समारोह समितिया हे ने.सं. ११४१ या लागिं नं निरन्तरता बीगु निर्णय जूगु दु। वंगु कौलाथ्व १२ (कार्तिक १२ गते) च्वंगु मुँज्यापाखें भाजु रमेश महर्जनया अध्यक्षताय् गठन यानातःगु ने.सं. ११४१ या न्हूदँ समारोह समितियात हे ने.सं ११४१ या लागिं नं निरन्तरता बीगु निर्णय याःगु खः । थ्व समितिइ आवद्ध छुं खलः पुचःपाखें थः प्रतिनिधि हिलाबुला यायेमाःगु दुसा वा न्हूगु खलः पुचःया प्रतिनिधि दुथ्याकेमाःगु दुसा उकिया लागिं व्यवस्था याये फइगु खँ धाःगु दु ।

कोरोनामुक्त न्हूदँ :
थुगुसी न्हूदँया लसताय् ‘कोरोनामुक्त न्हूदँ’ या कामना यासें भिंतुना देछाइगु खँ धाःगु दु । नेपाल संवत्यात राष्ट्रिय मान्यता प्राप्त जूसां थुकियात सरकारी ज्याखँय् छ्ययेके बीगु लागिं सांस्कृतिक आन्दोलनयात न्ह्यःने न्ह्याकुसें थुगु दँय् कोरोना महामारीया कारणं देय् व जनतां गुगु दुःख सियाच्वंगु खः, थ्वपाखें सकलें मुक्त जुइमा धकाः न्हूदँया भिंतुना देछायेगु कथंया नारा पित बीगु खँ धाःगु दु ।

सम्बन्धित बुखँ

LEAVE YOUR COMMENTS