संक्रमणलिसें हुलमुल नं अप्वयाच्वन

येँ (नेपालभाषा टाइम्स) – स्वनिगलय् लिपांगु इलय् न्हियान्हिथं कोरोना संक्रमितया ल्याः अप्वया वनाच्वंगु दु। देय्न्यंकं कुल संक्रमितमध्ये बछि धइथें स्वनिगलय् जक खने दयाच्वंगु दु। थ्व ल्याखं स्वनिगः कोरोनाया हटस्पट जुया वनाच्वंगु धइगु नं खँ पिहां वयाच्वंगु दु। थज्याःगु स्थितिइ यातायात व्यवस्था ज्याकुथिइ सेवाग्राहीतय् चाप नं उतिकं खने दयाच्वंगु दु। ज्याकुथिं सेवाग्राहीयात सामाजिक दूरी कायम यायेत, ल्हाः सिलेत साब्वं व लःया व्यव्स्था यानातःसां उकियात खास हे ध्यान बियाच्वंगु धाःसा खने मदु। सेवाग्राहीतय्सं फक्व याकनं थःगु ज्या सिधयेकेत स्वइगु कारणं दूरी कायम यायेगु व ल्हाः सिलेगुपाखें ध्यान बियामच्वंगु ज्याकुथिं न्ह्यथंगु दु। ज्याकुथिइ खने दुगु हुल नियन्त्रणया निंतिं सुरक्षाकर्मि खटे जुयाच्वंगु दुसा ज्याकूया मूलुखाय् हे कोरोना संक्रमणपाखें बचे जुइत धासें सन्देशमूलक प्रचार सामग्री नं तयातःगु दु ।