कमल पोखरी न्हूकथं दयेकेत शिलान्यास

येँ – येँया वडा नं. १ लाःगु पुलांगु कमल पोखरीयात न्हूधाः यानाः दयेकेगु लागिं म्हिगः शिलान्यास याःगु दु । येँ महानगरपालिकाया मेयर विद्यासुन्दर शाक्यं उगु पुखू पुनर्निर्माण ज्याया शिलान्यास यानादीगु खः । कमल पोखरीया पुनर्निर्माण नं येँ मनपां हे यायेत्यंगु खः । न्हापा तसकं लोकंह्वाःगु खःसां लिपा लोप जुइगु अवस्थाय् थ्यंगु थ्व पुखूयात आः मौलिक स्वरुप वयेक न्हूगु हे डिजाइनं दयेकेत्यंगु खः ।

थुकिया डिजाइन कामपा सहरी विकास योजनां तयार याःगु खः ।ज्याझ्वलय् सम्बोधन यासें मेयर शाक्यं थ्व पुखू दछिया दुने छुं नं हालतय् दयेके सिधयेकेमाः धकाः ठेकेदारयात सचेत यानादीगु खः । आवश्यक फुक्कं ग्वाहालि मनपां बीगु जुयाः इलय् हे ज्या सिधयेकेत वय्कलं आग्रह यानादीगु खः ।

उगु हे क्षेत्रया सांसद गगन थापां नं ज्याझ्वलय् सम्बोधन यासें थ्व ऐतिहासिक पुखू जूगुलिं थुकिया निर्माणय् च्वय् क्वय् याये दइ मखु धासें ठेकेदारयात दछिया दुने छुं नं हालतय् सिधयेकेमाः धकाः चेतावनी समेत बियादीगु खः ।थ्व पुखू पुनर्निर्माण लिपा उगु थाय् नं पर्यटकीयस्थलया रुपय् विकास जुइगु आशा यानातःगु दु । पुखूया दथुइ फल्चा लिसें बहनी मत च्याइगु व्यवस्था यानातःगु दु ।