पुखू बचे यायेत किपूया मेयरयात ज्ञापन पौ

येँ – पांगाया निगू पुखू बचे यायेगु निंतिं स्थानीय जनतां म्हिगः किपू नगरपालिकाया मेयर रमेश महर्जनयात ज्ञापन पौ लःल्हाःगु दु । पांगाया वडा नम्बर ५ य् लाःगु कित्ता नम्बर १९ या ५ रोपनी ११ आना व कित्ता नम्बर १०७ या ७ रोपनी २ आना जग्गा २०२१ सालया जग्गा धनी दर्ता स्रेस्ताय् ‘पुखू’ धकाः न्ह्यथनातःगु खःसा धनीया महलय् ‘मिनाहा’ च्वयातःगु दु ।

उगु निगुलिं पुखू सार्वजनिक यायेमाः धकाः स्थानीय जनतां मेयर महर्जनयात ज्ञापन पौ बिउगु खः । ज्ञापन पौ लःल्हाना कायेगु झ्वलय् मेयर महर्जनं सार्वजनिक जग्गा व पुखू संरक्षण यायेगु थःपिनिगु नीति हे दुगुलिं पुखू बचे यायेतमाःगु ग्वाहालि यायेगु बचं बिउगु खँ उपन्यासकार लिसे स्थानीय वासिन्दा नजरराम महर्जनं ‘नेपालभाषा टाइम्स’ यात कनादीगु दु ।

लिसे स्थानीय वासिन्दां उगु ज्ञापन पौ किपू नगरपालिकापाखें प्रधानमन्त्री कार्यालय व भूमि सुधार मन्त्रालययात नं बिउगु दु । सार्वजनिक पुखू संरक्षण संघर्ष समितिया संयोजक रविन्द्र महर्जनं हस्ताक्षर यानाः उगु ज्ञापन पौ बिउगु खः । निगुलिं पुखूया बारे सरकारी, सार्वजनिक व गुथि जग्गा संरक्षण सम्बन्धी जाँचबुझ आयोग–२०७६ ज्याकुथिं नं किपू नगरपालिकायात सर्जमिन यानाः उकिया रिपोर्ट छ्वयाहजि धकाः पौ च्वःगु खःसा वंगु शनिवाः जूगु सर्जमिनय् नं ३०१ म्ह स्थानीयवासिन्दा निगुलिं पुखू सार्वजनिक खः धकाः बयान बिउगु दु ।

२०२१ सालय् नापीइ तकं पुखू उल्लेख जुयाच्वंगु उगु पुखू सहसेनानी हर्षजंग कार्कीं थःगु नामय् लालपूर्जा दयेकूगु खः । कार्की मदयेधुंकाः वया कायपिं राजेन्द्रजंग कार्की व सुरेन्द्रजंग कार्कीं मंकाः कथं लालपूर्जा दयेकूगु खः । तर स्थानीय जनतां ताः इलंनिसें उगु जग्गा सार्वजनिक खः धकाः धया वयाच्वंगुलिं कार्कीया परिवारं जग्गा दावी याये फयाच्वंगु मदु ।

सम्बन्धित बुखँ

LEAVE YOUR COMMENTS