निजामतिइ आः गुंगू जक सेवा

येँ – निजामति सेवाय् आः गुंगू जक सेवा दइगु जूगु दु । न्हूगु दयेकाच्वंगु संघीय निजामति सेवा ऐनय् निगू सेवा खारेज यानाः गुंगू जक सेवा तयेत्यंगु खः । थ्व न्ह्यः निजामति सेवा अन्तर्गत गुंगू सेवा दुगु खः ।

संघीय मामिला तथा सामान्य प्रशासन मन्त्रालयया प्रवक्ता सुरेश अधिकारीया कथं आः कानून, न्याय तथा संसदीय मामिला मन्त्रालयं ऐन स्वीकृत याइबलय् शिक्षा व आर्थिक योजना तथा तथ्यांक सेवा खारेज याइ । आवंलि प्रशासन, कृषि, वन, इन्जिनियरिङ्ग, संसद, स्वास्थ्य, न्याय, परराष्ट्र व विविध सेवा जक निजामति सेवा अन्तर्गत लाइ ।

न्हूगु ऐन कथं प्रदेश व स्थानीय तहया कर्मचारीतय्सं नं संघीय निजामति सेवाय् प्रतिस्पर्धा यायदइकथं व्यवस्था हयेत्यंगु दु । थथे प्रतिस्पर्धा याइबलय् उमेर हदबन्दी लगे जुइमखुसा समान पदय् नं प्रतिस्पर्धा याये दइ ।

कानुन मन्त्तालयं छुं बुँदा थप यानाः स्वीकृत जुइधुंकूगु विधेयक आः प्रधानमन्त्री तथा मन्त्रिपरिषद्या ज्याकुथिइ पेश यायेधुंकूगु दु । थप याःगु बुँदाय् ऐनया मस्यौदाय् प्रदेश निजामति सेवा व स्थानीय सेवाया लागि कर्मचारी प्रदेश लोकसेवां परिपूर्ति यायेगु व्यवस्था यानातःगु दु ।

मस्यौदाय् कर्मचारीया नियुक्तिया उमेर, अवकाश उमेर, शैक्षिक योग्यताय् स्थानीय, प्रदेश व संघ दुइ एकरुपता हयेगु न्ह्यथनातःगु दु ।
प्रवक्ता अधिकारीं न्हूगु ऐन कथं छगू प्रदेशया कर्मचारीं मेगु प्रदेशय् प्रतिस्पर्धा याना वनेदइगु खँ नं कनादिल । छगू हे पदय् छगू प्रदेशं मेगु प्रदेशय् प्रतिस्पर्धा यानाः वनेबलय् उमेरया हदबन्दी लागू मजुइगु व समान पदय् नं वने दइगु खँ ऐनय् न्ह्यथनातःगु दु ।