थारुतय्त बियातःगु ६.६ ५ आरक्षण खारेज
येँ (नेपालभाषा टाइम्स)÷सर्वोच्च अदालतं थारु समुदायया नितिं निजामती व सरकारी सेवाया प्रत्येक विज्ञापनय् ६.६ प्रतिशत आरक्षण छुटे यायेमाः कथं न्हापा बियातःगु अन्तरिम आदेशयात रद्द याना बिउगु दु । थ्व स्वयां न्ह्यः सर्वोच्च अदालतं ६.६ प्रतिशत सिट थारु समुदायया मनूतय्गु लागिं छुटे यानाः तयेमाः धासें अन्तरिम आदेश बिउगु खः ।
सर्वोच्च अदालतया न्यायाधीशपिं प्रकाशमानसिंह राउत व कुमार चुडालया मंकाः इजलासं वंगु मंसिर ११ गते उगु अन्तरिम आदेश जारी याःगु खः । अन्तरिम आदेशया लिखित प्रति धाःसा म्हिगः सार्वजनिक याःगु खः ।
सर्वोच्च अदालतं थारु कल्याणकारी सभाया केन्द्रीय महामन्त्री प्रेमीलालप्रसाद चौधरी समेतया निवेदनय् अन्तरिम आदेश जारी याःगु खः । उगु अन्तरिम आदेश रद्द यायेमाः धकाः प्रधानमन्त्री तथा मन्त्रिपरिषदया कार्यालयपाखें सचिव मधुकुमार मरासिनीं रिट दायर याःगु खः ।
अन्तरिम आदेश कायम याना तयेबलय् देय्या सार्वजनिक सेवा प्रवाहलय् गम्भीर लिच्वः लायेफइ धासें संवेदनशील अवस्था व परिस्थितियात मध्यनजर यानाः अन्तरिम आदेश खारेज यायेमाःगु खँ आदेशय् धयातःगु दु । थारु समुदायया मनूतय्त निजामती सेवाय् गुलि प्रतिशत छुटे यायेमाःगु खः धइगु खँ अन्तिम आदेशय् क्वःजीगु खँ नं आदेशय् धयातःगु दु ।
सरकारं थारु समुदायया मनूतय्सं मधेशी व आदिवासी÷जनजाति निगुलिं क्लस्टरं ब्वति काइगु जुयाः प्रतिनिधित्वया सुनिश्चितताय् द्विविधा मदुगु तर्क यासें अन्तरिम आदेश खारेजीया माग याःगु खः ।
LEAVE YOUR COMMENTS