काबुल विमानस्थलय् हाकनं आक्रमण जुइफुगु शंका

एजेन्सी- काबुल विमानस्थलय् हाकनं आतंकवादी आक्रमण जुइफुगु खँ अमेरिकी सेनां धाःगु दु । अमेरिकी सेनां थप आक्रमण जुइफुगुलिं विमानस्थलय् उच्च सतर्कता नालाच्वनागु व आक्रमण जुल धाःसा सामना यायेत अमेरिकी सेना तयार दुगु खँ धाःगु दु । विमानस्थलय् रकेट आक्रमण वा सवारी साधन छ्यलाः आक्रमण जुइफुगु सेनां धाःगु दु ।

मेखे बिहिवाः सनिलय् स्थानीय ईकथं ५ ता इलय् अफगानिस्तानया काबुल विमानस्थलय् जूगु बम विस्फोटय् लानाः सीपिनिगु ल्याः ९० म्हं मयाक दयेधुंकूगु दु । विस्फोटय् १५० म्ह सिबें अप्वः मनूत घाःपाः जूगु खः । अमेरिकी सेनाया कथं विस्फोटय् १३ म्ह अमेरिकी सैनिक नं सीगु दु । थीथी अन्तर्र्राष्ट्रिय सञ्चार माध्यमया कथं विस्फोटय् २८ म्ह तालिबानत नं सीगु दु । तालिबानया प्रवक्ता जबिहुल्लाह मुजाहिदं धाःसा विस्फोटय् तालिबानत मलाःगु धाःगु दु ।

बिहिवाः अफगानिस्तानया विमानस्थलय् इस्लामिक स्टेटं निगः बम बिस्फोट याःगु खः । न्हापांगु बिस्फोट मूल गेटय् व निगूगु बिस्फोट बेलायतया अधिकारीत च्वनाच्वंगु होटेलय् जूगु खः । अफगानिस्तान विमानस्थलय् दुगु हुलयात लक्षित यानाः बिस्फोट याःगु खः । विस्फोट लिपा लाःलाःथे गोली कयेकेगु शुरु जूगु खः ।

अमेरिकाया राष्ट्रपति जो बाइडेनं आक्रमणकारीतय्त याकनं मालेगु व उमित सजाय बीगु धाःगु दु । आक्रमणं थःपिं विचलित मजुयागु व उद्धारया ज्या मदिइगु नं बाइडेनं धाःगु दु । अस्ट्रेलिया, न्यूजिल्याण्ड व क्यानाडां धाःसा उद्धारया ज्या दिकूगु दु । अमेरिकां छगू लाखसिबें अप्वः मनूतय्गु उद्धार यायेधुंकूगु दु ।

बम विस्फोट जूसां शुक्रवाः नं विमानस्थलय् पिहां वनीपिनिगु हुल म्हो मजूनि । शुक्रवाः नं मनूतय्सं अफगानिस्तान त्वःताच्वंगु दुसा हवाइ उडान नं जुया हे च्वंगु दु ।