ने. सं. ११४६ चिल्लागा तृतीया - नाला करुणामय जात्रा

नेतृत्व विकास तालिम क्वचाल

येँ – हाम्रो महिला उत्थान समूह, येँ १८ वडाया ग्वसालय् निन्हुयंकं न्ह्याःगु नेतृत्व विकास प्रशिक्षण ज्याझ्वः क्वचाल । वंगु असार ६ व ७ गते निन्हुयंकं जूगु उगु प्रशिक्षण कन्या मन्दिर मा.वि.इ जूगु खः । समूहया नायः चिनु श्रेष्ठया सभापतित्वय् जूगु ज्याझ्वलय् सुशिल श्रेष्ठं प्रशिक्षण बियादीगु खःसा तालिमय् मुक्कं नीच्याम्हेसिया सहभागिता दुगु खः ।

तालिम समापन ज्याझ्वलय् मूपाहांकथं येँ मनपा १८ वडाया वडाअध्यक्ष न्हुछेकाजी महर्जन झायादीगु खः । वय्कलं थुकथंया प्रशिक्षण निरन्तर रुपं न्ह्याना च्वनेमाःगु खँय् बः बियादिल । प्रशिक्षार्थी देवनारायण महर्जन व गीता खड्गीं तालिमया अनुभव न्यंकादीगु ज्याझ्वलय् प्रशिक्षक श्रेष्ठ व न्वचु प्रशिक्षक नरेशसिंह मल्लं नं थःथःगु नुगःखँ प्वंकादीगु खः ।