न्हूम्ह आइजीपी नियुक्तिइ वरिष्ठतय् विरोध
येँ (नेपालभाषा टाइम्स)÷सरकारं धिरजप्रताप सिंहयात न्हूम्ह प्रहरी महानिरीक्षक (आईजीपी) नियुक्त याःगु दुसा उकियात कयाः असन्तुष्टि नं पिहां वयेगु शुरु जूगु दु । प्रहरीया वर्तमान महानिरीक्षक शैलेश थापा क्षेत्री म्हिगःनिसें ३० दँया सेवा अवधि पूवंकाः अवकाशय् वनेवं न्हूम्ह आईजीपी नियुक्त याःगु खः ।
उकथं हे सशस्त्र प्रहरीया महानिरीक्षक पदय् अतिरिक्त महानिरीक्षक राजु अर्यालयात बढुवा याःगु दु । सशस्त्रया वर्तमान महानिरीक्षक पुष्पराम केसी ३० दँया सेवा अवधि पूवनाः थनिंनिसें अवकाशय् वनीगु जुइवं अर्यालयात महानिरीक्षकय् बढुवा याःगु खः ।
थ्वहे झ्वलय् सिंहयात प्रहरीया महानिरीक्षक पदय् बढुवा याःगु विरोधय् निम्ह सिनियर एआइजीपिं अदालत वनीगु जूगु दु । थः स्वयां जुनियरयात आईजीपी नियुक्त यायेवं एआईजी विश्वराज पोखरेल व सहकुलबहादुर थापां उकिया विरुद्ध सर्वोच्च अदालत वनेगु तयारी यानादीगु खः ।
पोखरेल व थापा एआईजी जूगु दछि लिपा तिनि सिंह एआईजी नियुक्त जूम्ह खः । पोखरेल व थापां वरिष्ठता व कार्यसम्पादनया आधारय् थःपिं महानिरीक्षक जुइमाः धइगु माग यासें अदालतय् रिट तयेत्यंगु खँ धाःगु दु ।
च्वंगु बैठकय् नेकपा माओवादी केन्द्रया अध्यक्ष पुष्पकमल दाहाल व नेकपा एकीकृत समाजवादी पार्टीया अध्यक्ष माधव नेपालं वरिष्ठताया आधारय् आईजीपी नियुक्त यायेमाः धकाः सुझाव बियादीगु खःसां प्रधानमन्त्री देउवां कनिष्ठम्ह सिंहयात हे आईजीपी नियुक्त यानादीगु खँ सीदुगु दु ।
नेपाली कांग्रेसया नेता शेखर कोइरालां नं आः जूगु आईजीपी नियुक्ति प्रक्रियायात विरोध यानादीगु दु । सरकारं आईजीपी नियुक्ति यायेगु ज्याय् वरिष्ठता व विधि मिचे याःगु धासें नेता कोइरालां उकियात कयाः विरोध प्वंकादीगु खः ।
LEAVE YOUR COMMENTS