मेलम्चीया लः वइगु अनिश्चित

येँ – मेलम्चीया लः वइगु अनिश्चित जूगु दु । खुसिबालं क्षतिग्रस्त जूगु मेलम्ची खानेपानी आयोजना याकनं ज्या क्वचायेकाः थ्वहे वइगु वैशाख तक येँ लः हयेगु योजना दुगु खः । तर आः तकं आयोजनां ठेकेदार तकं ल्ययेगु व छु प्रक्रियां ठेक्का बीगु धइगु खँ हे क्वःछी मफयाच्वंगु दु ।

सरकारं ठेक्का गुकथं बीगु धइगु निर्णय मयायेवं आयोजनाया ज्या प्रभावित जूगु खः । आयोजनां क्षतिग्रस्त जूगु पुनर्निर्माणया निति न्हापा हे ज्या यानाच्वंगु चिनियां ठेकेदार कम्पनी सिनो हाइड्रोयात हे बीगु प्रस्ताव याःगु खःसां नं सरकारं निर्णय मयायेवं मेलम्चीया लः येँय् हयेगु मिति नं लिहां वनिगु सम्भावना अप्वया वनाच्वंगु दु । ।

आयोजनां खुसिं ल्हाकूगु मुहानय् सफा यायेगु ज्याया नितिं पुलांगु हे ठेक्का भेरियसन यानाः ज्या न्ह्याकेगु योजना दयेकूगु खः । तर सरकारं इलय् निर्णय मयायेवं ज्या न्ह्याकेत थाकुयाच्वंगु दु । आयोजनाया कथं मेपिं ठेकेदखार हयेत मेगु प्रक्रियाय् वनेमाः । करोडौंया ज्या जूगुलिं कोटेशन ठेकेदार ल्ययेत कानुनी रुपं पंगः दु । अथेजुयाः ठेक्काया म्याद थप यानाः भेरियसन यायेगु विकल्प माःगु खः ।

आयोजना पुनर्निर्माणया ज्या मोहनी न्ह्यः हे ज्या यायेगु धाःसा नं न्हूपिं ठेकेदार ल्ययेगु ज्याय् सरकार अलमलय् जुयाच्वंगु दु । सार्वजनिक खरिद ऐनया दफा ६६ कथं विशेष परिस्थिति ब्वलनाः तत्काल खरिद मयात धाःसा सार्वजनिक निकाययात थप हानी नोक्सानी जुइगु अवस्था ब्वलना धाःसा सार्वजनिक निकायं तत्काल खरिद यायेत व याकेगु व्यवस्था दु ।