सभामुख पद नं खाली यायेत रिट

येँ (नेपालभाषा टाइम्स)- प्रतिनिधिसभाया सभामुख अग्निप्रसाद सापकोटा व उपसभामुख पुष्पा भुसालया पद खाली यायेमाःगु माग यासें सर्वोच्च अदालतय् रिट दायर जूगु दु ।

अधिवक्तापिं किशोर पौडेल, जगन्नाथ दुलाल व अनुपम भट्टराईं म्हिगः प्रधानमन्त्री तथा मन्त्रिपरिषदया ज्याकू, कानुन मन्त्रालय व संघीय संसद सचिवालययात विपक्षी दयेकाः सभामुख व उपसभामुख विरुद्ध रिट दायर याःगु
खः ।

निर्वाचन आयोगं प्रतिनिधिसभाया समानुपातिकपाखेया बन्दसूची पिथनेधुंकाः मुद्दाया अन्तिम किनारा मजूतले सभामुख व उपसभामुखया रुपय् बीगु सेवा सुविधा बन्द यायेत नं रिटय् माग यानातःगु दु । रिटयात कयाः थौं पेशी तयातःगु दु । प्रतिनिधिसभाया निंतिं जुइगु मेगु निर्वाचनया उम्मेदवारी दाखिला जुइ छन्हु न्ह्यः तक जक पदय् च्वने धइगु व्यवस्था दुगु धासें सभामुख व उपसभामुख पद खाली यायेत माग याःगु खः ।
संसदीय प्रणालीइ संसद मदुसां नं वहालवाला सभामुख व उपमुख धाःसा कायम हे जुयाच्वनीगु व्यवस्था दु ।

उकथं हे निर्वाचन आयोगं म्हिगः निसें ‘अस्थायी मतदाता’ या नां मुनेगु शुरु याःगु दु । सर्वोच्च अदालतया आदेश कथं निर्वाचन आयोगं सरकारी कर्मचारी, सुरक्षाकर्मी व कैदीबन्दीतय्त नं समानुपातिक निर्वाचनय् भोट कुर्के बीगु जूगु कारणं अज्याःपिं अस्थायी मतादाताया नां मुनेगु शुरु याःगु खः ।

सर्वोच्च अदालतं सरकारी कर्मचारी, सुरक्षाकर्मी व कैदीबन्दीयात प्रतिनिधिसभा व प्रदेशसभा निर्वाचनय् मतदान याये दइगु व्यवस्था यायेत आदेश बिउगु खः । तर आयोगं समानुपातिक निर्वाचन प्रणालीपाखे जक मतदान यायेदइगु व्यवस्था याःगु दु ।