लुँया ज्या व न्याये–मी ठप्प

येँ (नेपालभाषा टाइम्स)- नेपाःया लुँ वहः बजारय् लुँया भावं हाकनं न्हूगु रेकर्ड कायम याःगु दु । म्हिगः लुँ तोलांं १ लाख ६ हजार ९०० तका थ्यंगु दु । म्हीग जक सछि तका कुहां वःगु लुँया भाः म्हिगः हाकनं थहां वनाः न्हूगु रेकर्ड कायम जूगु खः । लुँयागु भाः थहां वंगु कारणं स्वनिगः दुने लुँ न्याये–मी यायेगु लिसें लुँया तिसा दयेकेगु ज्या समेत शुन्य धइथें जूवंगु दु ।

नेपाल सुनचाँदी व्यवसायी संघया पुलांम्ह नायः निरञ्जन रत्न शाक्यया कथं बजाः भाः थहां वनेवं लुँ न्याइपिं म्हो जूगु दु । वय्कःया कथं लुँया भाः थहां वनेवं लँु न्याइपिं ग्राहक दथुइ अन्यौल ब्वलनाच्वंगुलिं लुँ न्याइपिं जक मखु लुँ थिके जुइगु इलय् लुँ मीपिं ग्राहक नं वयाच्वंगु मदु । वय्कलं ‘नेपालभाषा टाइम्स’ लिसे खँ ल्हासें धयादिल, ‘लुँया भाः थहां वनाः लुँ न्याइपिं नं मदु, मीपिं नं मदु, थ्व इलय् लुँ न्याइपिं व मीपिं ग्राहक दथुइ अन्यौल ब्वलनाच्वंगु दु ।’

लुँया ज्या ठप्प जुयाः स्वनिगलय् लुँवहः ज्यासःत ज्या मदयाः प्रभावित जूगु खँ धाःगु दु । वंगु माघ १० गते लुँ तोलां १ लाख ६ हजार ३०० तकाया न्हूगु रेकर्ड कायम याःगु खः । थ्व स्वयां २०७८ फागुन २५ गते लुँया भाः दकलय् अप्वः १ लाख ५ हजार ५०० तका थ्यंगु । छवाःया दुने हे निक्वः रेकर्ड ब्रेक यानाः लुँया भावं न्हूगु रेकर्ड कायम याःगु खः । अन्तर्राष्ट्रिय मुद्रा बजारय् मुद्रास्फिति अप्वया वनेवं लुँया भाः थहां वनाच्वंगु खः । म्हिगः अन्तर्राष्ट्रिय बजारय् लुँ प्रतिऔंश १९४८ डलर कायम जूगु खः ।

नेपाल सुनचाँदी व्यवसायी महा– संघया पुलांम्ह अध्यक्ष लिसें बजाः विश्लेषक तेजरत्न शाक्यया कथं थ्व भाः अझ नं थहां वनीगु सम्भावना दु । वय्कःया कथं अमेरिकी फेडरल बैंंकं बिया वयाच्वंगु ब्याजदर अप्वयेकल धाःसा लुँया भाः छुं भचा कुहां वयेफइगु सम्भावना दुसां नं बैंकं तत्काल निर्णय मयाःगुलिं बजाः भाः थहां वनेफइगु सम्भावना अप्वः दु । फेडरल बैंकं थ्व वाःया दुने ब्याजदर थकायेगु बारे निर्णय यायेगु तयारी यानाच्वंसां नं तत्काल लागू याइ मयाइ धइगु अन्यौल ब्वलनाच्वंगुलिं नं लुँया बजारय् उकिया लिच्वः लानाच्वंगु खः ।

अन्तर्राष्ट्रिय बजारय् थ्वहे महिनाया दुने लुँ प्रतिऔंश २ हजार डलर तक थ्यने फइगु अनुमान जुयाच्वंगु दु । यदि अन्तर्राष्ट्रिय बजारय् लुँ प्रतिऔंश २ हजार डलर कायम जुल धाःसा नेपालय् लुँ तोलां १ लाख १० हजार तक थ्यनी ।