नेवाः फिल्मय् कलिउडया स्टार

नेवाः फिल्मया यात्रा न्ह्याःगु नं स्वीदँसिबें अप्वः जुइधुंकल । वि.सं. २०४४ सालय् पिदंगु “सिलु” निसें न्ह्याःगु थ्व यात्राय् आःतकया दुने १५० गू ति नेवाः फिल्म पिदने धुंकूगु अनुमान दु । थुकिया ल्याःचाः थुलि हे जुल धका आःतक यकीन यायेफुगु मदुनि । स्वीदँ–स्वीनिदँया थ्व यात्राया दुने आपालं कलाकारतसें नेवाः फिल्म म्हिते धुंकल ।

उकी मध्ये छुं छुं अज्याःपिं कलाकारतसें नेवाः फिल्म म्हितूगु दु, गुम्ह कलाकारं नेवाः फिल्म सिबें न्हापा कलिउड धकाः धयातःगु खस भाय्या फिल्म म्हिताः स्टारया रुप कायेधुंकूपिं खः, अज्याःपिं मध्ये थौंकन्हय् बय्बय् जुयाच्वंपिं निम्ह स्टार धइपिं धिरेन शाक्य व कर्मा शाक्य खः ।

कर्मा शाक्यं थौंकन्हय् म्हिताच्वंगु नेवाः फिल्म “कर्म” खःसा धिरेन शाक्यं म्हिताच्वंगु फिल्मया नां “घोषक” खः । छगू संजोग हे धायेमालीकी उपिं निम्हं शाक्य थरयापिं खःसा उपिं निम्हेसिनं म्हिताच्वंगु फिल्म निगुलिं बुद्धकालिन बाखनय् आधारित फिल्म खः ।
धिरेन शाक्यं “घोषक” फिल्मय् छम्ह बुद्धकालिन जुजुया भूमिकाय् म्हिताच्वंगु दु ।

“घोषक”या निर्देशक अमृतचन्द्र श्रेष्ठ खःसा कर्मां म्हिताच्वंगु “कर्म” फिल्मया निर्देशक रामकृष्ण खडगी खः । कर्मां थ्वसिबें न्हापा निर्देशक रामकृष्ण खड्गीया हे निगू फिल्म “पटाचारा” व “कृषा गौतमी” म्हिते धुंकूगु दु । थ्व निगुलिं फिल्मय् कर्मालिसे हिरोइन् जुयाः म्हितूम्ह मेलिना मानन्धर खः ।

मेलिना मानन्धर नं नेवाः फिल्म म्हितेसिबें न्ह्यः हे कलिउडया स्टार कथं लोकंह्वाये धुंकूम्ह खः । मेलिना मानन्धरं मेगु छगू नेवाः फिल्म “धम्मवति” नं म्हितूगु दुसा व धुंकाः लिपा मेगु नेवाः फिल्म म्हितूगु मदुनि । गन तक धिरेन शाक्यया खँ दु, धिरेनं थ्व सिबें न्हापा “त्याग” नांयागु छगू नेवाः फिल्म म्हिते धुंकूगु दुसा छुं छुं नेवाः म्युजिक भिडियोय् नं म्हितूगु दु ।

आपासिनं शायद मसिउ जुइमाः धिरेन शाक्ययात दकलय् न्हापां नेवाः फिल्मय् इन्ट्री याकेगु ग्वसाः ग्वःम्ह सुरेन्द्र तुलाधर खः । नेवाः फिल्मख्यःया छम्ह नांजाःम्ह फिल्ममेकर सुरेन्द्रं धिरेनयात “छंगु हे नामय्” नांयागु फिल्मय् म्हितकेगु ग्वसाः ग्वःगु जक मखसे भिं साइततकं चूलाकूगु खः ।

तर उगु फिल्मया शुटिंग हे न्ह्याये मफुत । थ्व हे “छंगु हे नामय्” फिल्मय् झरना बज्राचार्ययात हिरोइन जुयाबीत इनाप याःगु खः, तर झरनालिसे खँ मिले मजुइवं वया थासय् अनु शाह नांयाम्ह कलिउड स्टारयात कयाः फिल्मया भिंसाइत ज्याझ्वः यात । तर थ्व फिल्मया यात्रा वसिबें अप्वः न्ह्यावने मफुत ।

नेवाः फिल्मय् कलिउड स्टारतय्त नं म्हितकेमा धइगु खँय् न्ह्यचिलीम्ह सुरेन्द्र तुलाधरं थःगु निर्देशनया डेब्यु फिल्म “अंश”य् छपु आइटम म्येय् प्रेरणा शर्मायात प्याखं हुइकूगु खः । वयां लिपा निर्माता दिपक कपालीया “तिनतिकः महाबिकः” फिल्मया छपु म्येय् ला कलिउडया हे नांजाःम्ह आइटम गर्ल सुष्मा कार्कीयात तकं प्याखं हुइकल ।

कर्मा व मेलिनायात नेवाः फिल्मय् इन्ट्री याकूम्ह निर्देशक रामकृष्ण खडगीं नेपाःया नांजाःम्ह एक्शन स्टार शिव श्रेष्ठयात नं नेवाः फिल्मय् इन्ट्री याकेगु ह्वताः चूलाकल । शिव श्रेष्ठं रामकृष्ण खडगीया “कृषा गौतमी” फिल्मय् छगू मेन रोल म्हितूगु दु । थ्वहे फिल्मय् म्हितूम्ह लुनिभा तुलाधर नं कलिउडया फिल्मया नापनापं खस नेपाली भाय्या नाटक ख्यःया नांजाःम्ह कलाकार खः ।

थुकथं नेवाः फिल्मय् न्ह्यानाच्वंगु कलिउड स्टारतय्गु यात्राया चर्चा यायेबलय् दकलय् न्हापां वइगु नां धइगु नेपाःया ख्यालिजुजुपिं मदनकृष्ण श्रेष्ठ व हरिवंश आचार्यपिनिगु नां खः । उमिसं म्हितूगु न्हापांगु नेवाः फिल्मया नां “सिलु” खः । उमिसं “सिलु” धुंकाः “राजमति” फिल्मय् नं नापं म्हितल ।

ख्यालिजुजु मदनकृष्ण श्रेष्ठं ला “चाण्डालिका”, “तुयुमति” निसें कयाः न्हूगु फिल्म “कर्म”तक म्हिताच्वंगु दु । “राजमति”या खँ ल्हायेगु खःसा थ्व फिल्मया छम्ह मेन लिड कलाकार श्रीकृष्ण श्रेष्ठ नं कलिउड स्टार हे खः । श्रीकृष्ण श्रेष्ठं थ्व हे छगू जक नेवाः फिल्म म्हितूगु दु । लिपांगु इलय् “पानबति” फिल्मय् छगू विशेष भुमिका म्हितेत इनाप याःबलय् श्रीकृष्ण श्रेष्ठं म्हितेधयाथें खँ ल्हाःगु नं खः तर म्हिते मखन ।

“पानबति” फिल्मय् हिरो जुयाः म्हितूम्ह विनोद श्रेष्ठ नं कलिउडय् थःगु अभिनय यात्रा न्ह्याकाच्वंम्ह कलाकार खःसा विनोदं थ्वसिबें न्हापा हे “थःगु छेँ” नांयागु छगू नेवाः फिल्म नं म्हितूगु खः । निर्देशक सुर्य श्रेष्ठया थ्व फिल्म धाःसा शुटिंग क्वचाःसां रिलिज धाःसा मजूगु फिल्म खःसा लिपा वनाः विनोद श्रेष्ठं “त्याग” व “ब्याहा याये म्हा” नांयागु फिल्म म्हितल ।

विनोद श्रेष्ठया “कीर्तिपुर ः द लिजेन्ड अफ कीर्तिलक्ष्मी” फिल्म नं पिहां वयेत्यंगु दु । थ्व खस भाषाया फिल्म खःसां नेवाः लकसं भय्बिउगु फिल्म खः । थ्व “कीर्तिपुर ः द लिजेन्ड अफ कीर्तिलक्ष्मी” फिल्मय् हे म्हिताच्वंपिं लक्ष्मी गिरी व मदनदास श्रेष्ठपिं कलिउडया नांजाःपिं कलाकार खः ।

मदनदास श्रेष्ठ व लक्ष्मी गिरीं “पटाचारा”लगायत छुं छुं मेगु नेवाः फिल्मय् नं म्हितूगु दु । कलिउडया फिल्म म्हिते धुंकाः नेवाः फिल्म म्हितूम्ह मेम्ह छम्ह स्टार धयाम्ह राजेन्द्र खड्गी खः । राजेन्द्र खड्गी धयाम्ह नेपाःया नांजाःम्ह फाइट डाईरेक्टर खः । राजेन्द्र खडगीं छुं छुं कलिउड फिल्मय् मेन भिलेनया रोल नं म्हितूगु दु ।

कलिउडया फिल्मया अभिनयया ख्यलय् नं म्हितूम्ह राजेन्द्र खडगीं “राजमति” फिल्मय् चिकंचा जुयाः म्हितूगु खःसा व धुंकाः राजेन्द्र खड्गीं “तुयुमति” नांया छगू फिल्म नं म्हितूगु दु । अथे हे तुं नेपाःया नांजाःम्ह कलाकार सुभद्रा अधिकारीं नं “राजमति” व “चाण्डालिका” फिल्मय् म्हितूगु दु ।

विशेष यानाः कलिउडय् नं नांजाःपिं स्टारत मध्ये नेवाः कलाकारपिंसं हे जक नेवाः फिल्म म्हितूगु खनेदुसां सुभद्रा अधिकारी, लक्ष्मी गिरीपिंसं नेवाः फिल्म म्हितूगु खँ थन च्वछायेबहजू । थ्वहे झ्वलय् “यलेबाथः” फिल्मय् छगू मेन रोल म्हितूम्ह मिथिला शर्माया नां ल्वःमंके मजिउ । मिथिला छम्ह गैरनेवाः कलाकारजक मखसे कलिउडय् तसकं हे नांजाःम्ह कलाकार खः ।

कलिउडया हे नांजाःम्ह कलाकार रमेश बुढाथोकीं निर्देशक सुरेश स्थापितया “ल्हाः हुस्लुं प्वाः फुस्लुं” फिल्मय् म्हितूगु दु । छम्ह नेवाः जुयाः नं खस नेपाली फिल्मय् बिस्कं हे म्हसीका कायम यायेत ताःलाःम्ह धइम्ह गौतमरत्न तुलाधर नं खः ।

गौतमरत्न तुलाधरं उलि अप्वः फिल्म ला म्हितूगु मदु, तर म्हितूगु छगू फिल्म “कुमारी”या जुजुभाई नांयागु रोलं हे वयात चर्चाया च्वकाये थ्यंकाबिउगु खःसा गौतमरत्नं लिपा वनाः “बांला मय्जु” नांयागु फिल्मय् हिरो जय श्रेष्ठ महर्जनया दाजु जुयाः म्हितूगु खःसा थ्वहे फिल्मय् म्हितूम्ह सानु ताम्राकार नं खस नेपाली फिल्म ख्यलय् अभिनय याना वयाच्वंम्ह खः ।

थुकथं खस नेपाली फिल्मया स्टारतसें नेवाः फिल्म म्हितूगु दुसा आशिष्मा नकःमि व नबिना श्रेष्ठं धाःसा नेवाः फिल्मं थःगु यात्रा शुरु यानाः खस नेपाली फिल्मय् नं थःगु पलाः क्वातुकेत ताःलाःगु खँ नं लुमंकेबहजू ।

सम्बन्धित बुखँ

LEAVE YOUR COMMENTS