फास्ट ट्र्याकं बुंगद्यः जात्राय् लिच्वः

येँ – फास्ट ट्र्याक दयेकेत बुँ अधिग्रहण याइबलय् उकिया लिच्वः बुंगद्यः जात्राय् नं लाःवनीगु जूगु दु । बुंगद्यः जात्राया बोसी खान्की गुथिं नं थीथी संस्कार यायेमाः । तर थ्व गुथिया २५ रोपनी जग्गा नं अधिग्रहण लाइगु जूगु दु । यदि बुँ अधिग्रहणय् लात धाःसा गुथिया पुतवारतय्सं बुँ मदयेधुंकाः थःपिंसं परम्परा निसें याना वयाच्वंगु ज्या मयाइगु खःला धइगु न्ह्यसः ब्वलंगु खँ स्थानीय सुरेन्द्र खड्गीं कनादीगु दु ।

खान्की गुथिया जग्गा सरकारी जग्गा जुयाच्वंगु व पुतवारतय् गुथि पाःलाःपिंसं बुँज्या नं पाःपाः यानाः थःपिनि आवश्यकता पूवंकाच्वंगु खः । आः बुँ नं मदइगु, तलब नं मदइगु जुल धाःसा परम्परा निसें याना वयाच्वंगु ज्या यायेत थाकुइफुगु बिचाः वय्कलं प्वंकादीगु दु ।
खान्की गुथिया गुथियारपिंसं बुंगद्यःया द्यःखः दयेकेत माःगु सिमाः ल्ययेगुया लिसें सिमा पाःलाः रथ दयेकेत माःगु साइज कथं सिँ मिले यायेगु ज्या याइगु खः ।

स्थानीय इन्द्रमान तुलाधरं नं जग्गा मदयेधुंकाः ज्या मयाइगु खःला धइगु चिन्ता प्वंकादिसें धयादिल, ‘फास्ट ट्र्याक लिसें झीगु न्हापांगु सरोकार धइगु उचित मुआब्जा खःसा मेगु सरोकार धइगु झीगु संस्कृति, जात्रा, पर्व आदिया निरन्तरता खः ।’ भाजु तुलाधरया कथं पान्जु गुथि व पर्जा गुथिया नं बुँ अधिग्रहणय् लाःगु दु ।

बुँ मदयेधुंकाः थज्याःगु गुथियात नं समस्या जुइफु । थ्व स्वंगुलिं गुथिया यानाः १५० रोपनी जग्गा फास्ट ट्र्याकय् लाइगु जूगु दु । पान्जु गुथिया गुथियारतय्सं द्यः पुजा यायेगु आदि ज्या याइगु खःसा पर्जा गुथिया ज्या बुंगद्यः यलय् हइगु इलय् बुंगद्यःया सम्पत्ति ल्ह्ययेगु ज्या याइ । पर्जा गुथियात धन्कु गुथि नं धायेगु यानाच्वंगु दु ।