
किपू- किपू नगरपालिकाया ग्वसालय् न्ह्यानाच्वंगु किपू सि·िङ आइडल–११४२ निगूगु चरणय् थ्यंगु दु । नगरपालिकाया ग्वसालय् न्ह्यानाच्वंगु थुगु सांगीतिक ज्याझ्वः ब्वति काःपिंसं निगूगु चरणय् ट्रायकय् थःगु प्रस्तुति न्ह्यब्वइ ।
किपू नगरपालिकां नेपाल संवत् ११४२ न्हूदँया लसताय् किपू नगरस्तरय् थुगु सांगीतिक कासा याःगु खः । कासाय् किपू देय्या मुक्कं १८ म्ह कासामिपिंसं ब्वति कयाच्वंगु दुसा कासाय् ब्वति कायेत कासामिपिंसं छ्वया हःगु म्येँ वंगु कछलाथ्व पारु (कात्तिक १९ गते) म्हपुजाकुन्हु हे युट्युबय् अपलोड याःगु खः ।
न्हापांगु चरणय् ब्वति काःपिं सकसिगुं म्येँ ‘कीर्तिपुर सिङ्गिङ आइडल–११४२’या युट्युबय् अपलोड यायेधुंकाः सकसितं निगूगु चरणय् प्रवेश याकूगु खः । ब्वति काःपिंत निगूगु चरणय् प्रवेश याकेगुलिसें ट्रायक (खाराओके)य् गुकथं म्येँ हालेगु धकाः वंगु वाःया मंगलवाः व वंगु शनिवाः यानाः निगू चरणय् अभ्यास नं याकूगु खः । नेपालभाषा एकेदेमिया हलय् जूगु अभ्यासय् ब्वति काःपिं सकसिनं थम्हं ल्यःगु म्येँ ट्राय्क न्ह्यब्वःगु खः ।
किपू नगरपालिकां किपू नगरया ल्याय्म्हतय्के दुगु प्रतिभा न्ह्यःने हयेगु ल्याखं उगु कासाया ग्वसाः ग्वःगु खः । नगरया ल्याय्म्हतय्त लक्षित यानाः ग्वसाः ग्वःगु थुुगु कासाय उद्देश्य इमित सांगीतिक क्षेत्रय् आकर्षित यायेत जूगु नगरपालिकां न्ह्यथंगु दु ।
थुगु ज्याझ्वः ताःलाकेया निंतिं नेपालभाषाया नांजाःम्ह संगीतकःमि हरिशरण साय्मिया संयोजकत्वय् छगू समिति गठन यानातःगु खःसा निगूगु चरण अन्तर्गत जूगु अभ्यासय् संयोजक साय्मि नापं समितिया दुजःपिं ज्ञानेश्वर ‘निभाः’, सतिश महर्जन, तीर्थ माली, कृष्णहरि महर्जन सहितया उपस्थितिइ ब्वति काःपिंसं अभ्यास याःगु खः ।
LEAVE YOUR COMMENTS