ध्यान प्रस्तुतिइ मखु ध्यबाय् !

बलिउड फिल्म उद्योगय् कलाकारत अभिनय यायेगु ज्याय् जक सीमित मजू । बलिउडय् जुयाच्वनीगु आपालं अवार्ड ज्याझ्वलय् नं इमिसं थःगु प्रस्तुति बियाः स्वकुमिपिनिगु ध्यान थःपाखे आकर्षित यायेत स्वयाच्वंगु दइ । ज्याझ्वलय् प्रस्तुति बीगुनापं सु कलाकारं छु अवार्ड ल्हातय् लाकी धइगु खँय् नं स्वकुमितय्सं उलि हे ध्यान बियाः स्वयाच्वंगु दइ ।

स्वकुमि वा प्रशंसक जक मखु स्वयम कलाकारयात थःत छु अवार्ड लाइ, लाइ वा मलाइ धइगु खँय् उत्सुकता जुयाच्वनी । थ्व स्वाभाविक खः । तर लिपांगु इलय् बलिउड कलाकारतय् ध्यान अवार्डय् स्वयां नं ज्याझ्वलय् गज्याःगु प्रस्तुति बीगु धइगुपाखे केन्द्रीत जुयाच्वंगु खँ पिहां वयाच्वंगु दु । अले ज्याझ्वलय् उपस्थित जुइपिं दशर्कया ध्यान नं उखेपाखे हे केन्द्रीत जुयाच्वंगु खँ चर्चाय् वयाच्वंगु दु ।

लिपांगु इलय् बलिउड फिल्म उद्योगय् जुइगु अवार्ड ज्याझ्वलय वयाच्वंगु हिउपाःलिसें उकी प्रस्तुति बीपिं कलाकारया पारिश्रमिक नं अप्वया वनाच्वंगु दु । बलिउडया नं. १ डान्सरया रुपय् अभिनेता ऋतिक रोशनयात कायेगु याः । थ्व ल्याखं ऋतिकं छगू अवार्ड ज्याझ्वलय् थःगु प्रस्तुति बीत स्वंगू करोड न्यय्गू लाख तक कायेगु यानाच्वंगु दु ।

अथे हे बलिउग अभिनेत्री दीपिका पादुकोणंनं ४–५ मिनेटया ‘स्टेज शो’या निंतिं छगू करोड स्वीन्यागू लाख तक कायेगु यानाच्वंगु दु । इनर्जेटिक प्रस्तुतिया निंतिं चर्चित नायक रणवीर सिंहं छक्वः दबुलिइ वयाः प्याखं हूगु वापत निगू करोड पारिश्रमिक काइ ।दबुलिइ वयाः मात्र थःगु प्रस्तुति बीगु जक मखु स्वकुमिपिंत गाक्कं मनोरञ्जनतकं बीम्ह नायक खः सलमान खान । सलमानं छक्वः दबुलिइ वयाः प्रस्तुति बीत ५ करोड तका पारिश्रमिक कायेगु यानाच्वंगु दु ।