उरुग्वें इक्वेडरयात बुकल

कोपा अमेरिकाया कीर्तिमानी विजेता उरुग्वें नं थुगुसी नं विजय सुरुवात याःगु दु । झिंन्याक्वः तक कोपा अमेरिका त्याकेधुंकूगु उरुग्वें म्हिगः चान्हय् इक्वेडरयात ४–० गोलं बुकल । निकोलस लोडेइरों उरुग्वेयात दकलय् न्हापां अग्रता बीधुंकाः स्टार कासामिपिं लुइस स्वारेज व इडिसन काभानिं नं छगू छगू गोल यात ।

मेगु छगू गोल धाःसा इक्वेडरया अर्टुरो मिनां याःगु आत्मघाती गोलपाखें जुल । कासाया २४ औं मिनेटय् जोसे क्वन्टेरोयात ह्याउँकार्ड नकेगुलिं नं उरुग्वेयात झिम्हय् सीमित इक्वेडरयात बुकेत अःपुल । कासाया खुगू मिनेटय् हे मिडफिल्डर लोडेइरों उरुग्वेयात अग्रता बिउगु खः ।

कासाया ३३ औं मिनेटय् पेरिस सेन्ट जर्मनया काभानीं एक्रोब्याटिक बाइसाइकल किक पाखें मेगु गोल यातसा ४४ औं मिनेटय् बार्साया स्टार लुइस स्वारेजं गोल यासें थःगु अन्तर्राष्ट्रिय गोल ल्याः ५७ गू थ्यंकल ।

न्हापांगु हाफय् ३–० गोलं लिउने लायेधुंकूगु इक्वेडरयात निंतिं ७८ औं मिनेटय् मिनां आत्मघाती गोल यानाबिल ।म्हिगः हे समूह बीइ पाराग्वे व कतार दथुइया कासा २–२ गोलया बराबरीइ क्वचाःगु दु ।