स्पेनयात अःपुगु प्रतिद्वन्द्वी

एजेन्सी- नकआउट चरणय् थौं जुइगु न्हापांगु कासाय् ग्वसाः देय् रसियां विश्वकप विजेता जुइधुंकूगु स्पेनया सामना यायेत्यंगु दु । मेगु कासाय् डेनमार्कं क्रोएसियाया सामना याइगु जुइ ।

थौंया समीकरणय् स्पेनयात मेगु तुलनाय् अःपूगु प्रतिद्वन्द्वी लाःगु दु । विश्वकप सुरु जूबलय् छनोट चरण तकं पार याइमफइगु अनुमान यानातःगु रसियां स्पेनयात थ्वयां न्ह्यव जूगु खुगू धेंधेंबल्लाखय् छगू नं कासा बुके फुगु नं मदुनि ।

लिग चरणय् बांलाःगु प्रदर्शन यानावःगु स्पेनयात थुगु विश्वकपया प्रवल दावेदार कथं कयातःगु दु । बल्लाःगु प्रतिद्वन्द्वीया सामना यायेगु निंतिं थौं रसियायात घरेलु समर्थकतय् तःधंगु हौसलाया आवश्यक जुइ । घरेलु समर्थकतय् तच्वःगु सःया दथुइ दावेदार स्पेनयात म्हितेत दबाब लाइगु जुइ । अथे खःसां थुगु कासा लिपा क्वार्टरफाइनलय् वनेगु निंतिं स्पेन हे न्ह्यःने दु ।

मोरक्कोलिसे बराबरी म्हितूगु स्पेनया टिमय् प्रशिक्षक फर्नान्डो हियरों छुं हिउपाः हयेत्यंगु दु । गोलकिपर डेभिड डे गाया थासय् हियरों केपा एरिजाबालागायात म्हितके त्यंगु दु । अथेहे थ्व कासाय् डेभिड सिल्भां नं मम्हितेफु ।

रुसं धाःसा उरुग्वेलिसेया कासाय् ह्याउँगु कार्ड नःम्ह इगोर मालनिकोवया थासय् मारियो फर्नान्डेसयात म्हितकेत्यंगु दु ।

मेखे समूह चरणय् स्वंगुलिं कासा त्याकावःगु क्रोसिया थौं डेनमार्कया सामना याइबलय् उच्च मनोबल सहित मैदानय् कुहां वइगु जुइ । अर्जेन्टिनायात स्वंगू गोल नका वःगु क्रोसिया निंतिं लुका मोडरिक, इभान राकिटिकं हे मू भूमिका म्हितीगु जुइ । राकिटिकया कथं थौं थःपिनिगु निंतिं तःधंगु चुनौति कथं डेनमार्कया मिडफिल्डर क्रिस्टियन इरिक्सन वइगु जुइ । राकिटिकं धाःगु दु, ‘उमिसं विपक्षी टिमयात आक्रमणया म्हो जक ह्वःताः बी अले उपिं आक्रमणया निंतिं नं तसकं खतरनाक दु । उमिके इरिक्सन थेंज्याःम्ह विश्वया हे छम्ह उत्कृष्ट प्लेमेकर दु ।’