करिम बेन्जिमां विश्वकप म्हितेमखनीगु

एजेन्सी- कतारय् आइतवाः निसें न्ह्याःगु फिफा विश्वकप २०२२ य् करिम बेन्जिमां म्हितेमखनीगु जूगु दु । फ्रान्सया फरवार्डं म्हितीम्ह करिम बेन्जिमा अभ्यासया झ्वलय् घाःपाः जूगुलिं विश्वकप म्हितेमखनीगु जूगु खः ।

फ्रान्सया फुटबल फेडेरेसनं बेन्जिमा स्ववाः तक म्हितेमफइगु जानकारी बिउगु दु । बेन्जिमां टिमय् मदइगु जुइवं फ्रान्सयात थप समस्या जूगु दु । फ्रान्सया मिडफिल्डर पाउल पोग्बा व एङ्गोलो कान्टे नं चोटया कारण टिमय् मदु । अथेहे घाःपाः जुयाच्वंम्ह डिफेन्डर राफायल भारनं पुनरागमन यायेत स्वयाच्वंगु दुसां तयार धाःसा जूगु मदुनि । फ्रान्सया मेम्ह फरवार्ड क्रिस्टोफोर एनकुनक नं घाःपाः जूगुलिं विश्वकपं पिने लायेधुंकूगु दु ।

३४ दँ दुम्ह बेन्जिमां फ्रान्सया निंतिं ९७ गू कासा म्हिता ३७ गोल यायेधुंकूगु दु । थुगुसी रियल म्याड्रिडयात ला लिगा व च्याम्पियन्स लिगया उपाधि त्याकेत तःधंगु भूमिका म्हितूम्ह बेन्जिमां सन् २०२२ य् बोलेन डी ओर नं त्याकूगु खः । बेन्जिमां थुगुसीया विश्वकप लिपा अन्तर्राष्ट्रिय फुटबलं संन्यास कायेफूगु हल्ला दुगु खः ।

फ्रान्सं विश्वकपया न्हापांगु कासा अस्टे«लियालिसे नोभेम्बर २२ तारिखय् म्हिती । अथेहे २६ तारिखय् डेनमार्क व ३० तारिखय् ट्युनिसियालिसे फ्रान्सया कासा दु ।

सम्बन्धित बुखँ

LEAVE YOUR COMMENTS