ने. सं. ११४४ कौलाथ्व एकादशी - चालं

कोरोना महामारीया दथुइ टोकियो ओलम्पिकया उलेज्या, नेपाःया कासा शनिवाःनिसें

एजेन्सी- कोरोना महामारीया दथुइ आपतकाल घोषणा यानाः जापानया टोकियोय् ओलम्पिकया उद्घाटन जूगु दु । ओलम्पिकया फुटबल व सफ्टबलया कासा बुधवाःनिसें शुरु जुइधुंकूगु खःसा शुक्रवाः छगू विशेष ज्याझ्वःया दथुइ ओलम्पिकया उद्घाटन जूगु खः । नेपाःया ईकथं ४ः४५ बजे ओलम्पिकया उद्घाटनं जूगु खः । नेपाः पाखें ओलम्पिकय् न्याम्ह कासामि ब्वति कायेत्यंगु दु । उद्घाटन समहरोहय् जूगु मार्च पासय् नेपाःया पौडी कासामि गौरिका सिहं व एलेक्जेन्डर शाहं (एलेक्स) नेपाःया ध्वाँय् ज्वंगु खः ।

नेपालं ओलम्पिकय् शनिवाः जुडो व सुटिङय् धेंधेंबल्ला याइ । नेपाःया कासामि सोनिया भट्टं जुडोया ४८ केजी समुहय् रसियन कासामि इरिनालिसे म्हिती । सोनियां नेपालय् जूगु १३ औं दक्षिण एसियाली कासाय् कास्य पदक त्याकूगु खः । सोनिया वाइल्ड कार्ड मार्फत ओलम्पिकय् छनोट जूगु खः । अथे हे शनिवाः सुटिङया धेंधेंबल्लाखय् नेपाःया कल्पना परियारं १० मिटर एयर राइफलय् ब्वति काइ । कल्पना परियार नं वाइल्ड कार्डं हे ओलम्पिकय् छनोट जूगु खः ।

नेपाः पाखें पौडीइ ब्वति काःम्ह एलेक्जेण्डरया कासा जुलाइ २७ मंगलवाः व गौरिका सिहं जुलाइ २८ बुधवाः कुन्हु प्रतिस्पर्धा याइ । एलेक्जेण्डर व गौरिका सिहं १०० मिटर फ्रिस्टाइलय् धेंधेंबल्ला याइ । एलेक्जेण्डर व गौरिका निम्हं राष्ट्रिय किर्तिमानधारी कासामि खः । अथे हे जुलाइ ३० य् जुइगु १०० मिटर दौडय् एथ्लेटिक्सया कासामि सरस्वती चौधरीं धेंधेंबल्लाः याइ ।

थुगसीया ओलम्पिकय् ३३ गू फरक विधाया ३३९ कासा जुइ । ओलम्पिकय् झिछद्वलं मल्याकं कासामितय्सं ब्वति काःगु दु । कोेरोना भाइरसया कारणं दछि लिपा जूगु ओलम्पिकया दक्व कासा खाली स्टेडियमय् जुइ । अथे हे थुगुसी कासामितय्सं पदक नं थःपिंसं हे क्वखायेगु नियम दयेकूगु दु । कोरोनायात कयाः उच्च सतर्कताया दथुइ ओलम्पिक न्ह्याकेत्यंगु खःसां आःतक ओलम्पिकय् ब्वति कयाच्वपिं ८० म्ह सिबें अप्वसित कोरोना खनेदयेधुंकल ।