तःधंगु वडाय् पूर्वाधार कमजोर
देय्या राजधानी अले सांस्कृतिक सहर, पुलांगु नगरपालिकामध्ये छगू जक मखु, देय्या हे दकलय् न्हापांगु महानगरपालिका । येँ महानगरपालिकाया तःधंगु वडाय् पूर्वाधार सन्तुलित विकास जुइ फयाच्वंगु मदु । देय्या महानगरया तःधंगु वडाय् हे पूर्वाधारया सन्तुलित विकास जुइ मफुगु खँय् स्थानीय वडावासीतय् दुःख दु ।
येँ महानगरपालिकां महानगर दुनेया सीमित सहरी क्षेत्रय् जक ध्यान बिया वयाच्वंगुलिं मेमेगु नगरपालिकालिसे स्वानाच्वंगु ततःधंगु वडाया सतक पूर्वाधार कमजोर जू वंगु दु । चिधंगु क्षेत्रफल व म्हो जनसंख्या दुगु व तःधंगु क्षेत्रफल व आपालं जनसंख्या दुगु वडायात छगू हे कथंया बजेट बिउगु वडा तहया जनप्रतिनिधिया धापू दु ।
महानगरपालिकां वडाय् स्वंगू करोड स्वयां अप्वः ध्यबा विनियोजन याःगु मदु । महानगरपालिकाया कूल बजेट १३ गू अर्ब दु । दक्वं वडाय् यानाः छगू अर्ब नं इना मबिउगुलिं पूर्वाधार निर्माण जुइ मफुगु येँ मनपा १६ वडाअध्यक्ष मुकुन्द रिजालं धयादिल । येँया दक्वं नगरपालिकायात महानगरपालिकां छगू छगू करोड बजेट बिउगु दु ।
पूर्वाधारय् कमजोर वडायात धाःसा आवश्यक मात्राय् ध्यान मबिउगुलिं लिउने लाःगु दु । सतक संरचना अस्तव्यस्त जूगुलिं चिकुलां धुफ्वः दनीगु व बर्खाया इलय् वा वयाः ध्याचः जुइगुलिं वयेवने यायेत समस्या जुइगु यानाच्वंगु दु ।राजधानीया हे महानगरपालिका व नगरपालिका स्वाइगु सतक निर्माणय् सरोकार दुगु निकायया ध्यान वने फयाच्वंगु मदु ।
येँ महानगरपालिकाया तःधंगु वडामध्येय् लाःगु वडा नं. १६ व तारकेश्वर नगरपालिका स्वाइगु सतक जीर्ण जूगुलिं वयेवने यायेत हे समस्या जूगु दु । स्थानीय रामबहादुर रानामगरं थौंकन्हय् निभाः त्वइगु इलय् धुफ्वः दनाः सतक हे खने मदइगुलिं न्यासि वनेबलय् दुर्घटनाय् लाइगु ग्याःचिकु दुगु धयादी ।
सतकया विषयय् तःक्वः तक्वः सरोकार दुगु निकायया ध्यानाकर्षण याःसां नं सुयागुं ध्यान वने मफयाच्वंगु वय्कलं धयादिल । येँ मनपा १६ वडाअध्यक्ष रिजालं सतकया दूरावस्थाबारे ज्याकुथिइ तःक्वः तःक्वः गुनासो दर्ता जूसां नं क्षेत्राधिकार दुने मलाmगुलिं थगुने छुं हे याये मफुगु धयादी ।
‘जनता गुनासो यायेत वयेधुंकाः थ्व सतक निर्माणया निंतिं येँ महानगरपालिकां ज्या शुरु याःगु दु। थ्व सतक कानूनकथं प्रदेश सरकारं निर्माण यायेमाःगु खः, निगू स्थानीय तह स्वाइगु सतक प्रदेश सरकारं दयेकेमाःगु जूसां नं प्रदेश ३या सरकारया ध्यान वने फयाच्वंगु मदु, थगुने प्रदेश सरकारया बजेट फ्रिज जुल थज्याःगु सतक दयेके मफुत’, वय्कलं धयादिल ।
महानगरं तारकेश्वर स्वाइगु सतक निर्माणया निंतिं निगू करोडया लागतय् महानगरपालिकां बोलपत्र आह्वास प्रक्रिया शुरु याःगु वडाअध्यक्ष रिजालं न्यंकादिल । उगु हे वडाया एराहितिं नागार्जुन नगरपालिका वनेगु सतकया अवस्था नं अथे हे दु । थुकी नं प्रदेश सरकारं ध्यान मबीवं महानगरपालिकां हे दयेकेत्यंगु दु ।
उकिया निंतिं बागमति कन्स्ट्रक्सनलिसे सम्झौता जुइधुंकूगु वडा ज्याकुथिं न्ह्यथंगु दु । पर्यटकीय क्षेत्र थँबहीलिसे स्वानाच्वंगु पकनाजोल–क्षेत्रपातिया सतकय् नं गाःया गाः जक दु । न्हियान्हिथं पर्यटकत वये वने याइगु थ्व सतकया जीर्णतां विश्वय् नेपाःया बदनाम जुयाच्वंगु स्थानीय बुद्धकृष्ण चित्रकारं धयादिल ।
सतकया हे कारणं पर्यटक मार्फत बांलाःगु सन्देश मवनीगु जूगुलिं इलय् सतक दयेकेगुपाखे ध्यान बीमाःगु वय्कःया धापू दु । थुकिं नेपाल भ्रमण वर्ष २०२० यात नं लिच्वः लाकेफु । भूगोलया ल्याखं तःधंगु व जनसंख्या आपालं दुगु येँ महानगरपालिकाया ६, १४ व १६ विकास निर्माणय् लिउने लानाच्वंगु दु । थनया पूर्वाधारया अवस्था नं तसकं कमजोर दु ।
लिउने लानाच्वंगु थज्याःगु वडायात न्ह्यःने यंकेगु विषयय् महानगरपालिकां ध्यान मबिउगु वडाअध्यक्षया धापू दु । वडा नं ६ या वडाअध्यक्ष दीपेन्द्रकुमार लामां दक्वं वडायात समानुपातिक ल्याखं स्वंगू करोड बजेट बीगु स्वयां नं भूगोलया ल्याखं तःधंगु व यक्व जनसंख्या दुगु ग्रामिण भेगतकं स्वानाच्वंगु वडाया पूर्वाधार विकासय् विशेष बः बीमाः धयादी ।
वडा नं. ६ या चुच्चेपाटी–खास्ति महांकालया सतकया अवस्था नं दयनीय दु । सतक निर्माण शुरु जूगु दँ दँ दयेधुंकूसां आतक नं सम्पन्न जुइ फुगु मदुनि । सतकया दथुइ ततःधंगु गालय् वा वइगु इलय् लः मुना पुखू जुइगु यानाच्वंगु दु । पुखुलिइ चिचिग्वःगु सवारी साधन डुबे जुइगु स्थानीय छिरिङ तामाङं कनादिल ।
महानगरया केन्द्रय् लाःगु वडा १, २, ५, १२, १७, १८, १९, २०, २१, २२, २४, २५ व ३० यानाः झिंस्वंगू वडाया मुक्कं भूगोल व वडा नं. ६, १४ व १६ या एकल भूगोल उथेंउथें च्वं । तर बजेटय् तःधंगु अन्तर मदुगुलिं न्हियान्हिथं हे वडाय् गुनासो वयेगु यानाच्वंगु दु ।
स्वनिगलं पिहां वनेगु वडा नं. १४ य् लाःगु मुख्य नाका कलंकीलिसें वडा नं. १५ व ३२ या सतकया अवस्था नं मछालापुसे च्वं ।
LEAVE YOUR COMMENTS