आईएलओया प्रतिवेदन सार्वजनिक : रोजगारीया म्होतिं थीथी देशय् जेनजी आन्दोलन !
येँ (नेपालभाषा टाइम्स) – अन्तर्राष्ट्रिय श्रम संगठन (आईएलओं) विश्वन्यंक सुस्त आर्थिक वृद्धि व कमजोर रोजगारी ब्वलनाच्वंगुलिइ युवातय्त श्रम बजारय् वनेगु ह्वःताः थाकुया वनाच्वंगुली थीथी देशय् राजनीतिक उथलपुलथ जुइ कथं आन्दोलन जूगु खँ धाःगु दु । आईएलओ वंगु मंगलवाः सार्वजनिक याःगु प्रतिवेदनय् उगु खँ न्ह्यथनातःगु दु । आईएलओं सार्वजनिक याःगु ‘ग्लोबल इम्प्लोयमेन्ट ट्रेन्डस फर युथ २०२६ : ब्याक टु दु फ्युचर’ प्रतिवेदनय् उगु खँ न्ह्यथनातःगु दु ।
प्रतिवेदनय् रोजगारीया ह्वःता म्हो जुयाः सामाजिक असन्तोष अप्वया वनाच्वंगु विषययात आईएलओया प्रतिवेदनय् प्राथमिकता बियातःगु दु । सन् २०२४ व २०२५ स केन्याय् जूगु जेनजी प्रर्दशन रोजगारीया अभाव, भ्रष्टाचार व राजनीतिक संस्थां युवातय् अपेक्षा पूवंके मफुगुलिइ जूगु खँ प्रतिवेदनय् न्ह्यथनातःगु दु । अथे हे बंगलादेश, नेपाः व श्रीलंकाय् खनेदुगु अवस्था नं थ्व स्वयां बिस्कं मजूगु आईएलओया धापू दु । आईएलओया प्रतिवेदनय् धयातःगु दु, ‘अन रोजगारीया अभाव मर्यादित ज्याया ह्वःताःया म्होतिया असन्तुष्टि राजनीतिक उथलपुथलय् हिउगु दु ।’
आईएलओया प्रतिवेदन कथं सन् २०२५ स विश्वव्यापी युवा बेरोजगारी दर १२.४ प्रतिशत थ्यंगु दु । थ्व १५ निसें २४ दँ दुपिं उमेर समूहया थ्यंमथ्यं ६ करोड ७० लाख बेरोजगार युवातय् ल्याः खः। आईएलओं न्हू लिसे युवा श्रमशक्तिया निंतिं प्रवेशस्तरया रोजगारीया ह्वःताः म्हो जुयावंगु खँ न्ह्यथनातःगु दु । उत्तर अमेरिका, युरोप व भारतय् शिक्षाया पहुँच व शैक्षिक योग्यता अप्वया वंसां नं शैक्षिक बेरोजगारी अप्वया वनाच्वंगु खँ नं प्रतिवेदनय् न्ह्यथनातःगु दु ।
सन् २०२३ निसे २०२५ दथुइ विश्वया ११ उपक्षेत्र मध्ये च्यागू उपक्षेत्रय् युवा बेरोजगारी दर अप्वःगु, सुस्त आर्थिक वृद्धि, कमजोर रोजगारी सिर्जना, भूराजनीतिक तनाव व तीव्र प्राविधिक हिउपालं विश्वयात युवा रोजगारी संकट पाखे यंकाच्वंगु निष्कर्ष नं प्रतिवेदन पिकानातःगु दु ।
आईएलओया महानिर्देशक गिल्बर्ट एफ हौङवों सम्मानजनक रोजगारी चूलाके मफइगु पुस्तां थःगु भविष्यप्रति आत्मविश्वास पूर्वक योजना दयेकेम मफइगु धासें धयादीगु दु, ‘गबलय् ल्याय्म्हत गुणस्तरीय रोजगारीं वञ्चित जुइ, देशं प्रतिभा, उत्पादकत्व व सामाजिक एकता तंकी । युवातय्गु निंतिं सम्मानजनक रोजगारी सिर्जन यायेगु केवल सामाजिक आवश्यकता जक मखु गुगुं नं देशं यायेफइगु दलबय् बुद्धिमानी लगानीय मध्ये छगू खः ।’
कृत्रिम बुद्धिमत्तां हिलाच्वंगु रोजगारया स्वरुप
प्रतिवेदनं कृत्रिम बुसिद्धमत्ता (एआई) सहितया प्राविधिक हिउपालं युवातयेगु निंतिं उपलब्ध रोजगारीया ह्वःताःया स्वरुप हिलावनाच्वंगु खँ नं आईएलओं धाःगु दु । प्रतिवेदन कथं १५ निसे २९ दँया उमेर समूहया युवा यानाच्वंगु ६.१ प्रतिशत रोजगारी एआई लिसे सम्बन्धित हिउपालं उच्च रुपय् प्रभाविक जुइफइगु पेसाय् लाः । उकथं प्रतिवेदनय् विज्ञान, स्वास्थ्य तथा इन्जिनियरिङ थेंज्याःगु ज्ञानया आधारित प्राविधिक क्षेय् धाःसा रोजगारीया माग अप्वया वनाच्वंगु खँ आईएलओया प्रतिवेदनं धयातःगु दु ।
प्रतिवेदनं अनिश्चित जुयाच्वंगु श्रम बजारय् युवातय्त ग्वाहालि यायेत सरकार व नीतिनिर्मातातय्त पत्काल पलाः ल्ह्वनेत इनाप नं याःगु दु । थुकिया निंतिं आईएलओं एआई सम्बन्धी शासन व्यवस्थापय् मावन केन्द्रित दृष्टिकोण नालेत, गुणस्तरीय शिक्षा, जीवनपर्यन्त सिकाइ व प्रतिक्षार्थी ज्याझ्वलय् लगानी अप्वयेकेत सुझाव बिउगु दु ।
LEAVE YOUR COMMENTS