ने. सं. ११४४ ञलाथ्व नवमी -

मुद्दा लायेवं माओवादी थारान्हुल

येँ (नेपालभाषा टाइम्स)- नेकपा (माओवादी केन्द्रंं) प्रधानमन्त्री लिसें पार्टी अध्यक्ष पुष्पकमल दाहालयात द्वन्द्वकालय् जूगु व्यक्ति हत्या सम्बन्धी मुद्दाय् ज्वनाः अनुसन्धान यायेत माग यासें सर्वोच्च अदालतय् निवेदन दर्ता जूगु खँय् आपत्ति प्वंकूगु दु ।

पार्टी महासचिव देव गुरुङं म्हिगः विज्ञप्ति पिथँसें बदर जुइधुंकूगु निवे–दनयात सर्वोच्च अदालतया न्याया– धीशपिं ईश्वर खतिवडा व हरि फुयालया मंकाः इजलासं हाकनं दर्ता यायेत बिउगु आदेशयात कयाः आपत्ति प्वंकूगु खः ।

महासचिव गुरुङया विज्ञप्तिइ धयातःगु दु, ‘थुगु पार्टीया अध्यक्ष क. पुष्पकमल दाहाल ‘प्रचण्डं’ संविधान प्रदत्त वाक् स्वतन्त्रताया उपभोग यानाः अमुक सार्वजनिक ज्याझ्वलय् प्वंकूगु बिचाःयात अतिशयोक्तिपूर्ण ढंगं व्याख्या व तर्क यानाः उगु अभिव्यक्तियात कारबाहीया विषय दयेमाः धकाः कलुषित पूर्वाग्रही भावनां ग्रसित जुयाः दायर याःगु रिट निवेदन न्यायिक पुनरावलोकनया सामान्य सिद्धान्त अःखः व वर्तमान नेपाःया संविधानं बिउगु विचार अभिव्यक्तिया स्वतन्त्रता प्रतिकूल जूगुलिं सम्बद्ध निकाययात अवगत याकाच्वना ।’

उकथं हे विज्ञप्तिइ झिदँया जनयुद्धया झ्वलय् जूगु घटनाया सम्बन्धय् वृहद् शान्ति सम्झौताकथं सत्य निरुपण तथा बेपत्ता छानबिन आयोग नीस्वनेधुंकूगु दु धासें विज्ञप्तिइ धयातःगु दु, ‘उगु आयोगत संक्रमणकालीन न्यायिक कारबाही यायेत ताः इलंनिसें क्रियाशील जुयाच्वंगु परिप्रेक्ष्यय् उगु आयोगया अधिकार क्षेत्र दुने लाःगु विषययात प्रतिकूल लिच्वः लाइ कथं गुगुं नं अधिकार क्षेत्र ग्रहण यायेत, कारबाही न्ह्यःने न्ह्याकेत व थ्व सम्बन्धय् छुं नं निर्णय यायेमजिउगु खँ नं लुमंकाच्वना ।’

तत्कालीन विद्रोही नेकपा (माओवादीं) स्याःम्ह रामेछापया टिकाराज आरणया काय् ज्ञानेन्द्रराज आरण सहित झिंन्हय्म्हेस्यां माओवादी– पाखें विस्थापित नापं घाःपाः जूम्ह रामेछापया हे कल्याण बुढाथोकी लगायत च्याम्हेस्यां बिउगु निवेदन दर्ता यायेत सर्वोच्च अदालतं आदेश बिउगु खः ।
उमिसं वंगु कार्तिक १४ य् सर्वोच्च अदालतय् बिउगु निवेदनयात कार्तिक २४ गते सर्वोच्च प्रशासनं दरपीठ याःगु खः । उकिया विरुद्ध निवेदकतय्सं तप्यंक सर्वोच्च अदालतया इजलासय् निवेदन बिउगु खःसा वंगु शुक्रवाः उकी सुनुवाइ यासें शुक्रवाःया इजलासं दर्ता यायेत आदेश बिउगु खः ।

थ्वहे झ्वलय् सर्वोच्चया आदेश–यात नेपाल समाजवादी पार्टीया अध्यक्ष लिसें पुलांम्ह प्रधानमन्त्री डा. बाबुराम भट्टराईं नं आलोचना यानादीगु दु । म्हिगः छगू ज्याझ्वलय् न्ववासें भट्टराईं धयादिल, ‘माओवादी जनयुद्धयात अपराधीकरण यायेगु प्रवृत्ति जूगु दु, बहालवाला प्रधानमन्त्रीयात मुद्दा तयेगु धइगु निहुँ खोजे याःगु मखुला ? स्वदँ न्ह्यः धाःगु सामान्य खँयात कयाः बहालवाला प्रधानमन्त्रीयात ज्वनेगु ला ? मुद्दा तयेमाः धायेगु खःसा थ्व त्वहः जक माःगु मखुला ? थ्व हायेकेत जकं स्वःगु मखुला ?’