ने. सं. ११४६ तछलाथ्व चौथी -

यल अध्ययन केन्द्रया नेपालभाषा पाठवाचन ज्याझ्वः

यल (नेपालभाषा टाइम्स) – यल अध्ययन केन्द्रया ग्वसाः व अष्टमाया फाउण्डेशनया ग्वाहालिइ ‘नेपालभाषा पाठवाचन ज्याझ्वः-११४६’ जूगु दु ।

ज्याझ्वलय् यलया सामुदायिक व संस्थागत ब्वनेकुथिइ ब्वनाच्वंपिं मस्तय्सं ‘जिगु ब्वनेकुथि’ शीर्षकय् नेवाः भासं पाठ वाचन याःगु खः । यल महानगरपालिकां थनया सामुदायिक ब्वनेकुथिइ इसीडी तगिं निसें न्यागू तगिं तक नेपालभाषा ब्वंका वयाच्वंगु दु । यल महानगरं थनया सामुदायिक ब्वने कुथिइ अनिवार्य रुपं नेपालभाषा लागु यानातःगु दुसा संस्थागत ब्वने कुथिइ ऐच्छिककथं तयातःगु दु । यल महानगर दुने नेपालभाषा ब्वंका वयाच्वंगु ब्वने कुथिया ब्वनामितय् दथुइ नेपालभाषा पाठवाचन धेंधेंबल्लाः जूगु खः । धेंधेंबल्लाखय् सामुदायिक ब्वनेकुथिया स्वीखुम्ह व संस्थागत ब्वनेकुथिया झिंछम्ह यानाः पीन्हय्म्हेसिनं ब्वति काःगु खः । ब्वति काःपिं ब्वँमितय् दथुइ वंगु मंगलवाः यलया आदर्श माविइ छनोट चरण जूगु खः ।

छनोटय् उत्कृष्ट जूपिं सामुदायिक ब्वनेकुथिया झिम्ह व संस्थागत ब्वने कुथिया निम्ह यानाः झिंनिम्हेसित फाइनलय् चरणय् पाठ रचना याकूगु खः । फाइनल धेंधेंबल्लाखय् थ्यंपिंमध्ये सामुदायिक ब्वनेकुथिया झिम्हं ब्वँमिपिं गैर नेवाःत लाःगु खः । थुपिं झिम्हे सिनंतसकं न्ह्यइपुक नेपालभाषां पाठ रचना यानाः न्यंकूगु खः । गुकी श्री श्रमिक बालविज्ञान आधारभूत विद्यालयया आर्षित ढुंगेल न्हाप, मिननाथ आदर्श शिक्षासदन आधारभूत ब्वनेकुथिया प्रिज्मा लामा लिउ व चण्डी आदर्श सरल माध्यमिक विद्यालयया वर्षा राई लियांलिउ लाःगु खः ।

छनोट चरणय् नेपालभाषाया समालोचक पूर्ण ताम्राकार, स्यनामि राम महर्जन व नेपाल प्रज्ञा प्रतिष्ठानया पुलांम्ह प्राज्ञ अगिब बनेपालीं उत्कृष्ट विद्यार्थीपिं ल्ययादीगु खःसा शनिवाः अशोक हलय् जूगु फाइनल चरणय् पुलांम्ह प्राज्ञ बनेपालीं निर्णायकया भूमिका म्हितादीगु खः ।

धेंधेंबल्लाखय् त्याःपिं व सहभागीपिंत मूपाहां यल महानगर पालिकाया प्रमुख चिरिबाबु महर्जनं दसिपौ लःल्हानादीगु खःसा अष्टमाया फाउण्डेशनया बाबुराजा महर्जन व सरिता महर्जनं दां सिरपाः व उपहार लःल्हानादीगु खः । अथे हे उत्कृष्ट जूगु ब्वनेकुथिया नेपालभाषा शिक्षक शिक्षिकापिंत नं दां सिरपाः लःल्हाःगु खः ।

अध्ययन केन्द्रया नायः तुलसीलाल सिंहया सभापतित्वय् जूगु ज्याझ्वलय् न्ववानादिसें मूपाहां यल महानगरपालिकाया प्रमुख महर्जनं थौं मस्तय्सं नेवाः भासं न्ववाःगु धयागु ब्वने कुथिइ स्थानीय भाय् लागु यानागुया बांलाःगु लिच्वः खने दुगु खँ धयादिल । वय्कलं यल महानगरय् आः न्यागू तगिं तक स्थानीय नेवाः भाय् लागु याना तयागु जूसां याकनं हे च्यागू तगिं तक लागू यायेगु प्रतिबद्धता नं प्वंकादिल ।

ज्याझ्वःया विशेष पाहां यल महानगरपालिकाया उपप्रमुख मञ्जली शाक्यं आः सामुदायिक ब्वने कुथिइ जक नेवाः भाय् अनिवार्य जुयाच्वंगुलिइ याकनं हे संस्थागत ब्वने कुथिइ नं अनिवार्य यानायंके गु प्रतिबद्धता प्वंकादिल ।

ज्याझ्वलय् थीथी ब्वने कुथिया मस् तय्सं पाठय् दुगु म्येँय् हुलाप्याखं नं न्ह्यब्वःगु खः ।