लिभरपुलयात च्याम्पियन्स लिग

कासा सुरु जूगु छगू मिनेट लिपा हे वःगु पेनाल्टि व कासा क्वचाये स्वंगू मिनेट न्ह्यः याःगु निगू गोलया ग्वाहालिं लिभरपुलं थुगुसीया च्याम्पियन्स लिग उपाधि त्याकूगु दु । लिभरपुलया थ्व खुक्वःगु च्याम्पियन्स लिग उपाधी खः । वंगु सिजनय् फाइनलय् रियल मेड्रिडलिसे फःगु पराजययात ल्वःमंकाः लिभरपुल मेड्रिड शहरय् हे जूगु थुगुसीया फाइनलय् टोटनह्यामयात बुकूगु खः ।

उपाधी ल्हातय् लाकेगु निंतिं मोहम्मद सलाहं कासाया निगू मिनेटय् पेनाल्टिपाखें न्हापांगु गोल यातसा डिभोक ओरिगीं कासा क्वचायेत्ययेकाः गोल याःगु खः ।टोेटनह्यामया माउसा सिसोकाें डिबक्स दुने ह्यान्ड याःगुलि लिभरपुलयात पेनाल्टी चूलाःगु खः । कासाया ८७ औं मिनेटय् ओरिगीं निगुगू गोल याःगु खः ।

ओरिगी ५८औ मिनेटय् रोर्बटो फर्मेनोया थासय् मैदानय् दुहां वःम्ह खः । च्याम्पियन्स लिगय् न्हापांखुसी फाइनलय् थ्यंगु टोटनह्यामं लिभरपुलयात दबाबय् तःगु खःसां गोल धाःसा यायेमफुत । टोटनह्यामया सन हेङ मिन, लुकास मौरा व क्रिष्टियन एरिक्सनया प्रहारयात लिभरपुलया ब्राजिलियन गोलकिपर एलिसनं तःक्वः विफल यानाबिउगु खः ।

लिभरपुलं १४ दँ लिपा च्याम्पियन्स लिगया उपाधि त्याकूगु खः । खुक्वगुखुसी उपाधि त्याकूगु लिभरपुलं दकलय् लिपा सन् २००५ य् उपाधि त्याकूगु खः । लिभरपुलं थ्वयां न्ह्यव सन् १९७७, १९७८, १९८१, १९८४ व २००५य् च्याम्पियन जूगु खःसा १९८५, २००७ व २०१८ य् उपविजेता जूगु खः ।

रियल म्याड्रिडं दकलय् अप्वः १३क्व उपाधि त्याकातःगु दुसा एसी मिलानं न्हय्क्व उपाधि त्याकेधुंकूगु दु । सन् २००८ लिपा न्हापाखुसी निगू इंग्लिस क्लब दथुइ थुगुसी च्याम्पियन्स लिगया फाइनल जूगु खः । सन् २००८य् चेल्सी व म्यानचेस्टर युनाइटेड दथुइ जूगु फाइनलय् युनाइटेड त्याःगु खः।

सम्बन्धित बुखँ

LEAVE YOUR COMMENTS