बेलायतयात ४४ दँ लिपा मिसापाखें ग्रान्डस्लाम उपाधी

एजेन्सी- बेलायती कासामि एम्मा राडुकानुं युएस ओपन उपाधी त्याकूगु दु । निम्ह युवा कासामि दथुइ जूगु फाइनलय् बेलायतया १८ दँ दुुम्ह कासामि राडुकानुं क्यानाडाया १९ दँ दुम्ह कासामि लेला फर्नान्डेजयात उपाधी ल्हातय् लाकूगु खः । राडुकानुं लेलायात ६–४ व ६–३ या सेटय् बुकूगु खः ।

एम्मा राडुकानुं बेलायतया निंतिं ४४ दँ लिपा न्हापांखुसी मिसापाखेया ग्रान्ड स्लामया उपाधि त्याकूगु खः । थ्वयां न्ह्यः बेलायतया नितिं सन् १९७७ य् भर्जिनिया वेडं विम्बल्डन उपाधी त्याकूगु खः । राडुकानुं सन् २००४ य् मारिया सारापोभा धुंकाः ग्रान्डस्लाम त्याकूम्ह दकलय् क्वकालिम्ह कासामि नं जूगु दुसा सन् २०१४ य् सेरेना विलियम्स धुंकाः छगू नं सेटय् मबुसे उपाधि त्याकूम्ह कासामि नं जूगु दु ।

एम्मा राडुकानुयात बेलायतया महारानीं युवा उमेरय् चूलाकूगु थ्व असाधारण सफलता छगू कडा मिहेनत व समर्पणं यानाः जूगु खः धासें बधाई बिउगु दु । राडुकानु व फाइनलय् राडुकानुया प्रतिद्वन्द्वी लेलाया प्रदर्शनं आः वइगु पुस्ताया टेनिस कासामितय्त प्रोत्साहित याइगुलि शंका मदु धकाः नं बेलायतया महारानी एलिजावेथं धाःगु दु । अथे हे बेलायतया प्रधानमन्त्री बोरिस जोनसनं नं राडुकानुयात बधाइ बिउगु दु ।

राडुकानु आः विश्वया २३ औं वरियताया कासामि जूगु दु । अथे हे राडुकानु बेलायतया शीर्ष वरियताया कासामि नं जूगु दु । राडुकानुं कासा त्याकेधुकां ट्विट यासें थःत ग्वाहालि याःपिं व समर्थन याःपिं सकसित सुभाय् बिउगु दु । राडुकानुं उपाधी लिसें १ करोड ८० लाख पाउण्ड दां सिरपाः ल्हातय् लाकूगु खः ।