इटली युरोकपया निगूगु चरणय् थ्यंगु न्हापांगु टिम, स्वीट्जरल्यान्डयात ३ गोलं बुकल

येँ – युरो कपया समूह ए अन्तर्गत बुधवाः चान्हय् जूगु कासाय् इटलीं सहज जित चूलाकूगु दु । थुकिया लिसें इटली युरो कप २०२० या निगूगु चरणय् थ्यंगु न्हापांगु टिम नं जूगु दु ।

रोमाय् जूगु कासाय् इटलीं स्वीट्जरल्यान्डयात ३–० गोलं बुकूगु खः । घरेलु दर्शकतय्त लय्तायेकेगु झ्वलय् इटलीया निंतिं म्यानुअल लुकाटेलिं निगू गोल यातसा सिरो इम्मोेबिलें छगू गोल याःगु खः ।

कासाया २६ औं मिनेटय् लुकाटेलिं बेर्राडिया पासय् न्हापांगु गोल याःगु खः । लङ पासय् वःगु बलयात बेर्राडिं स्पीडं न्ह्यःने यंकुसें लुकाट्टियात पोस्ट न्ह्यःने पास बिउगु खःसा उकियात लुकाटिं याउँक गोल यानाबिउगु खः । कासाया ५२ औं मिनेटय् लुकाटेलिं आकर्षक प्रहार यासें मेगु गोल याःगु खः । अथेहे कासा क्वचायेत छगू मिनेट जक ल्यं दनिबलय् इमोबिलें नं आकर्षक सट थ्वासें गोल याःगु खः ।

थ्वयां न्ह्यःया कासाय् नं इटलीं टर्कियात ३–० गोलं बुकूगु खः । थ्व विजय लिसें समूह ए य् इटलीया ६ अंक जूगु दुसा वेल्सया ४ अंक दु । अथेहे स्वीट्जरल्यान्डया १ व टर्किया शून्य दु । इटलीया थ्व विजय लिसें वेल्सयात नं निगूगु चरणय् याउँक थ्यनीगु सम्भावना ब्वलंगु दु । आः मेगु कासाय् स्वीट्जरल्यान्डं टर्कियात बुकूसा व वेल्स इटली पाखें पराजित जूसां निगुलिं टिमया ४–४ अंक जुइ, तर गोल अन्तरया ल्याखं धाःसा वेल्सया सम्भावना अप्वः जुइ ।