न्याक्वःगु ताम्रकार फुटसल क्वचाल
यल(नेपालभाषा टाइम्स)÷ताम्रकार समाज अन्तर्गतया युवा तथा खेलकुद उपसमितिया ग्वसालय् जूगु न्याक्वःगु संस्करणया ताम्रकार फुटसल कासा क्वचाःगु दु । द ब्रिटिस कलेजया मुख्य प्रायोजनय् जूगु न्यागूगु संस्करणया उपाधी बीके लुँवह पसलं त्याकल ।
शनिवाः जूगु फाइनलय् बीके लुँवह पसलं मेडस् मार्ट फार्मेसीयात तसकं रोमाञ्चक व प्रतिपस्र्धात्मक कासाय् १–०या गोल अन्तरं बुकाः उपाधी त्याकूगु खः । न्याक्वःगु संस्करणया उपाधी विजेता बीके लुँवह पसः प्यक्वःगु संस्करणया उपविजेता खः ।
शनिवाः हे जूगु छगू ज्याझ्वःया दथुइ विजेता व उपविजेटा टिमयात ट्रफी, मेडल, प्रमाणपत्रलिसें नगद पुरस्कार लःल्हाःगु दु । यल महानगरपालिकाया उपप्रमुख मञ्जली शाक्य ‘आस्था’, समाजया नायः विनोद ताम्राकार, कलेजया प्रशासननिक प्रमुख अमरदीप मण्डल उपसमितिया संयोजक अनिश ताम्रकार लगायतं विजेता व उपविजेता टिमयात ट्रफी, मेडल, प्रमाण पत्र व नगद पुरस्कार लःल्हानादीगु खः । कासाय् विजेता टीमं स्वीद्वः व उपविजेता टिमं झिंन्याद्वः नगद पुरस्कार प्राप्त याःगु खः ।
कासाय् उत्कृष्ट गोलरक्षक बिक्सन ताम्राकार (मेडस् मार्ट फार्मेसी), उत्कृष्ट कासामि कुशल राजकर्णिकार (बीके लुँवह पसः), दकलय् अप्वः गोल याःम्ह कासामि लिउसन राजकर्णिकार (बीके लुँवह पसः) व बादल शिल्पकार (मेडस् मार्ट फार्मेसीं) त्याकूगु दुसा प्रेसिडेन्ट च्वाइस अवार्ड मेडस मार्ट फार्मेसीया युसन ताम्रकारं त्याकूगु दु ।
अथे हे यु १४पाखेया कासाय् प्रभु हिरोजं सिटी प्रिमियर रेन्जर्सयात ३–१ गोलं बुकाः उपाधी त्याकूगु दु । मेखे मिसातय् खुल्ला, १० दँ क्वय् व भेट्रान टिमया दथुइ प्रदर्शनी कासा नं जूगु खः ।
थुगु कासा वंगु कात्तिक १९ व २६ गते शनिवाः सानेपास्थित फिल्ड फुटसल ग्रायण्डय् जूगु खः ।
LEAVE YOUR COMMENTS