बार्सा बराबरीइ, मेसीया ५० गोल

स्पेनिस ला लिगाया अन्तिम कासाय् बार्सिलोनां बराबरीइ चित्त बुझे् यायेमाःगु दु । ला लिगा उपाधि त्याकेधुकूगु बार्सिलोनां एइबर नाप निगू निगू गोलया बराबरी म्हितुगू खः । बराबरी लिसे बार्सिलोनां ३८ कासाय् मुक्क ८७ अकं दयेकल । थ्व झ्वलय् बार्सां २६ गू कासा त्याकलसा, ९ थू बराबरी म्हिताः स्वंगुलिइ पराजय फयेमाल ।

आइतवाः जूग अन्तिम लिग कासाय् जूगु प्यंगुलिं गोल न्हापांगु हाफय् जूगु खः । कासाया २० आंै मिनेटय् एइबरं मार्क कुकुरिलाया गोलं अग्रता काःगु खः । तर ११ मिनेट लिपा बार्सिलोनाया कप्तान लियोनल मेसीं झ्वलाक निगू गोल यात । मेसीं छगू मिनेट दुने निगू गोल याःगु खः । कासाया ३१ औं व ३२ औं मिनेटय् थ्व गोल जूगु खः ।

न्हापांगु हाफया अन्तिम इलय् एइबरया डि ब्लासिस बराबरी गोल यानाबिल ।ला लिगाया मेगु कासाय् रियल म्याड्रिड धाःसा पराजित जुल । थ्व सिजनय् खराब प्रर्दशन याना वयाच्वगु रियल म्याड्रिडयात रियल बेटिसं २—० गोल बुकूगु खः । न्हापांगु हाफ बराबरी जूगु कासाय् लिपांगु हाफया ६१ औ मिनेट बेटिसया मोरोनं व ७५ औं मिनेटय् जेसें गोल याःगु खः ।

रियल म्याड्रिड लिगय् ३८ गू कासा म्हिताः २२ गू त्याकूगु दुसा न्यागू बराबरी म्हिताः झिंनिगुलिं पराजित जूगु खः । रियल थ्व सिजनय् स्वंगूगु थासय् लाःगु दु ।ला लिगाया अन्तिम कासाय् निगू गोल यासें मेसीं थ्व सिजनय् थःगु व्यक्तिगत ५० औं गोल नं पूवंकल ।

मेसीं ला लिगाय् ३६, च्याम्पियन्स लिगय् १२ व कोपा डेल रेय् निगू गोल याःगु खः । ला लिगाय् दकलय् अप्वः गोल यानाः मेसीं खुक्वःगुखुसी पीचीची अवार्ड नं त्याकल । अथेहे जारी सिजनय् ५० गोल यानाः मेसी गोल्डेन शुया निंतिं प्रमुख दावेदार नं जूगु दु ।

सम्बन्धित बुखँ

LEAVE YOUR COMMENTS