प्यक्वःगु ताम्रकार फुटसल उपाधि भैरवनाथ आइरनयात

यल – ताम्रकार फुटसलया प्यक्वःगु संस्करणया उपाधि भैरवनाथ आइरन इण्डष्ट्रिजं त्याकल । ताम्र्रकार समाजया युवा तथा खेलकुद उपसमितिया ग्वसालय् वंगु शनिवाः उपाधिया निंतिं जूगु प्रतिस्पर्धात्मक फाइनलय् भैरवनाथं वि.के. सुनचाँदी पसलयात १–० गोलं बुकाः उपाधि ल्हातय् लाकूगु खः ।

द ब्रिटिस कलेजया मुख्य प्रायोजनय् जूगु कासाय् फाइनलय् दुहां वनेगु झ्वलय् भैरवनाथं टेक म्याक्स टाइगरयात १–० गोलं व वि.के. सुनचाँदीं लिपांगु संस्करणया विजेता करुणामय मेटल क्राफ्टयात ट्राइब्रेकरय् २–१ गोलं बुकूगु खः । शनिवाः हे जूगु अण्डर १४ कासाया फाइनलय् ड्रागन ह्याण्डिक्राफ्टं सिटी ह्याण्डिक्राफ्टयात २–० गोलं बुकाः उपाधि ल्हातय् लाकल ।

अथे हे मिसापाखे खुल्ला, १० दँ क्वय्या व भेट्रान टीमया दथुइ मैत्रीपूर्ण कासा नं जूगु खःसा मेखे आयोजक ताम्रकार अल स्टार व मुख्य प्रायोजक ब्रिटिस कलेज दथुइ जूगु मैत्रीपूर्ण कासाय् ताम्रकार अल स्टार ५–२ गोलया अन्तरं विजयी जुइत सफल जुल ।

असोज ४ व ११ गते शनिवाः सानेपाया फिल्ड फुटसल ग्राउण्डय् जूगु कासाय् भैरवनाथया युमन ताम्रकार उत्कृष्ट गोलरक्षक, वि.के. सुनचाँदीया दीप वाराही उत्कृष्ट कासामि, दिल ह्याण्डिक्राफ्टया लिउसन राजकर्णिकार व दिनेश ताम्रकार भैरवनाथया आशिष ताम्रकारं मंकाःकथं उच्च गोलकर्ताया अवार्ड ल्हातय् लाकेत सफल जुल ।

अथे हे अण्डर १४ य् सिटी ह्याण्डिक्राफ्टया रेहान बाराही उत्कृष्ट कासामि घोषित जुल ।विजेता व उपविजेता टीमयात नेपाल प्रहरीया प्रहरी नायब महानिरीक्षक पिताम्बर अधिकारी, समाजया नायः रविन्द्रराज ताम्रकार, मुख्य प्रयोजक ब्रिटिस कलेजया प्रिन्सिपल जोय फोस्टर इलिस, कासा उपसमितिया संयोजक सजेश ताम्राकार, कासाया संयोजक अनिस ताम्रकार लगायतं ट्रफी, पदक, दसिपौ व नगद सिरपाः लःल्हानादीगु खः ।

कासाया विजेता भैरवनाथं उपाधिलिसें नीद्वः तका ल्हातय् लाकूगु दुसा उपविजेता वि.के. सुनचाँदी झिद्वः तका प्राप्त याःगु दु । विजेता व उपविजेता निगुलिं टीमं थःपिंत प्राप्त जूगु नगद सिरपाः समाजया ज्येष्ठ नागरिक कोषयात निंतिं लःल्हाःगु खः ।

सम्बन्धित बुखँ

LEAVE YOUR COMMENTS