पेरु त्यात, भेनेजुएला व इक्वेडर बराबरी

एजेन्सी – कोपा अमेरिकाय् पेरुं कोलम्बियायात बुकूगु दु । सोमवाः सुथय् जूगु समुह बीया कासाय् पेरुं कोलम्बियायात २–१ गोलं बुकूगु खः । ब्राजिलया पेड्रो स्टेडियमय् जूगु कासाय् पेरुं न्हापांगु हाफया १७ औ मिनेटय् पेनाया गोलं अग्रता काःगु खः । कासाया निगूगु हाफया ५३ औं मिनेटय् कोलम्बियाया बोर्जां बराबरी गोल यात । बोर्जां पेनाल्टीं गोल याःगु खः । कासाय् मेगु गोल आत्मघाती जुल । कासाया ६३ औ मिनेटय् कोलम्बियाया येरी मिनां आत्मघाती गोल यायेवं पेरु २–१ गोलं कासा त्याकल ।

सोमवाः हे जूगु समूह बी या मेगु कासाय् भेनेजुएला व इक्वेडरं निगू निगू गोलया बराबरी म्हितल । कासाय् इक्वेडरया निंतिं एडुअर प्रसेडिआें ३९ औं मिनेटय् व गोन्जालो प्लाटों ७१ औं मिनेटय् गोल याःगु खःसा भेनेजुएलाया निंतिं एडसन कास्टिलां ५१ औं मिनेटय् व हर्नान्डेजं निगूगु हाफया इन्जुरी टाइमय् गोल याःगु खः ।

थ्व समुहय् ब्राजिल शीर्ष थासय् दु । अथेहे पेरुलिसें कासाय् बूसां कोलम्बिया गोल अन्तरया कारणं निगूगु थासय् दु । कोलम्बियायासिबें छगू कासा कम म्हितुगु पेरु स्वंगूगु थासय् दु । भेनेजुएला प्यंगूगु थासय् व इक्वेडर अन्तिमय् दु ।

सम्बन्धित बुखँ

LEAVE YOUR COMMENTS