
एजेन्सी- विश्वकप अन्तर्गत थौं स्वंगू कासा जुइत्यंगु दु । न्हापांगु कासाय् स्वीडेनं दक्षिण कोरिया लिसे म्हितीसा निगूगु कासाय् बेल्जियम व पानामा दथुइ । दकलय् लिपा इंग्ल्यान्ड व ट्युनिसिया दथुइ धेंधेंबल्लाः जुइ । समूह एफ पाखें धेंधेंबल्लाः यानाच्वंगु स्वीडेन व दक्षिण कोरिया दथुया कासा बराबरीया धेंधेंबल्लाः जुइगु खः । मखे समूह जी पाखे इंग्ल्यान्ड व बेल्जियमया सम्भावना अप्वः दु । इंग्ल्यान्ड, बेल्जियम, ट्युनिसिया व पानामा दुथ्याःगु समूह जी पाखें थुपिं हे निगू टिम नकआउट चरणय् दुहां वनीगु जुइ ।
इंग्ल्यान्डलिसे थौं धेंधेंबल्लाः यायेत्यंगु ट्युनिसियां सन् १९७८ लिपा विश्वकपय् छगू नं कासा त्याकेफुगु मदुनि । मेखे पानामा थुगुसी न्हापांखुसी विश्वकपय् म्हितेत्यंगु खः । लिपांगु छुं छुं कासाय् ट्युनिसियां थःगु कासाय् सुधार याना हयाच्वंगु दु । थ्व ल्याखं इंग्ल्यान्डं ट्युनिसियायात कमजोर तायेकल धाःसा थ्व इंग्ल्यान्डया गल्ती जुइफु । सन् १९६६या विश्व विजेता इंग्ल्यान्डं सन् २०१६ या युरो कपय् आइल्यान्डयात थथे हे कमजोर तायेकूगुलिं पराजय फयेमाःगु खः । उकिं थ्व पालय् इंग्ल्यान्डं ट्युनिसियायात कमजोर तायेकेगु गल्ती याइमखु जुइमाः ।
मेखे एशियाली टिम दक्षिण कोरियालिसे प्रतिस्पर्धा यायेत्यंगु स्वीडेन सन् २००६ लिपा न्हापांखुसी विश्वकपय् दुहां वयेत ताःलाःगु टिम खः । दक्षिण कोरिया धाःसा झ्वःलाक्क गुक्वःखुसी विश्वकप म्हितेत्यंगु दु ।
सन् २००२ लय् आयोजक राष्ट्र जूबलय् दक्षिण कोरिया सेमिफाइनल तक थ्यंगु खः । मेखे स्वीडेन नं सन् १९५८ य् विश्वकपया फाइनल तक थ्यनेधुंकूगु दु । उबलय् स्वीडेन ब्राजिललिसे बूगु खः । स्वीडेन व द. कोरिया दथुइ सन् २००५ य् लिपांगु धेंधेंबल्लाः जूगु खः । उबले थ्व कासा निगू निगू गोलया बराबरीइ क्वचाःगु खः ।
बेल्जियम व पानामा दथुइ धाःसा दकलय् न्हापांखुसी धेंधेंबल्लाः जुइत्यंगु दु । विश्वकप छनोटय् अपराजित यात्रा यानावःगु प्यंगू युरोपेली टिम मध्ये बेल्जियम छगू नं लाः । थ्व ल्याखं विश्वकपय् डेब्यु यायेत्यंगु पानामाया न्ह्यःने बेल्जियम बल्लाःगु खनेदु । थ्व ल्याखं विश्वकपया वार्मअप कासाय् डेनमार्क, स्वीट्जरल्यान्ड व नर्वेलिसे पराजित जूगु पानामां बेल्जियमयात पनेगु खःसा कडा मेहनत यायेमालीगु जुइ ।
LEAVE YOUR COMMENTS