नेपाःया राष्ट्रिय फुटबल टिम प्रशिक्षणया निंतिं कतार वन
येँ – नेपाःया राष्ट्रिय फुटबल टिम विशेष प्रशिक्षणया निंतिं शुक्रवाः कतार वंगु दु । माल्दिभ्सय् थ्व हे वइगु असोज १५ गते निसें ३० गते तक जुइगु साफ च्याम्पियनसीपया तयारीया निंतिं नेपाःया राष्ट्रिय टिम कतार वंगु खः । कतारय् नेपालं निवाः तक प्रशिक्षण काइसा थ्व लिपा साफ च्याम्पियनसिप म्हितेत अनं तुं माल्दिभ्स वनी । नेपाःया मुख्य प्रशिक्षक अब्दुल्लाह सोमवाः हे कतार वनेधुंकूगु दु ।
प्रशिक्षक अलमुताइरी टिमया व्यवस्थापन यायेत न्हापा हे कतार वंगु खः । कतारय् अलमुताइरीं मैत्रीपूर्ण कासा म्हितेगु निंतिं पहल यायेगु नं धाःगु दु । अखिल नेपाल फुटबल संघ (एन्फां) राष्ट्रिय फुटबल टिमयात बिहिवाः हे बिदाइ बिउगु खः ।
नेपालं साफ च्याम्पियनसिपया तयारीया निंतिं वंगु वालय् तिनि भारतनाप निगू मैत्रीपूर्ण कासा म्हितूगु खः । न्हापांगु मैत्रीपूर्ण कासाय् नेपालं भारतलिसे छगू छगू गोलया बराबरी म्हितूगु खःसा निगूगु कासा भारतं नेपाःयात २–१ गोलं बुकूगु खः ।
माल्दिभ्सय् थुगुसी जुइगु साफ च्याम्पियनसिपय् न्यागू टिमं जक ब्वति काःगु दु । साफ च्याम्पियनसिपय् नेपाल, माल्दिभ्स, भारत, बंगलादेश व श्रीलंकां जक ब्वति काइ । भुटानं कोरोनाया कारणं ब्वति मकाःगु खःसा पाकिस्तानयात फिफां प्रतिबन्ध तयातःगुु खः । साफ च्याम्पियनसीपय् नेपालं न्हापांगु कासा असोज १५ गते माल्दिभ्स नाप म्हिती । अथे हे नेपालं असोज १८य् श्रीलंका, असोज २४य् भारत व असोज २७ य् बंगलदेशनाप म्हिती । राउण्ड रोबिनया लिधंसाय् जुइगु धेंधेंबल्लाखय् शीर्ष निगू टिमं फाइनल म्हिती ।
LEAVE YOUR COMMENTS