अस्ट्रेलियाया बैंकय् तःधंगु छानविन

अस्ट्रेलियाय् बैंक व वित्तीय संस्थातय्सं याइगु गलत ज्यायात कयाः छगू तःधंगु छानविन अभियान सुरु जूगु दु । सार्वजनिक छानविन याइगु देय्या हे तःधंगु निकाय ‘द रोयल कमिशन’ (शाही आयोगं) वित्तीय क्षेत्र गलत ज्या यानाच्वंगु द्वपंयात कयाः छानविन सुरु याःगु खः । अस्ट्रेलियाया बैंकतय्सं सेवाग्राहीयात शोषण याइगु व ततःधंगु व्यापारिक निकायलिसे जानाः ठगे याइगु द्वपं लानाच्वंगु दु । अस्ट्रेलियाया बैंकत विश्वय् हे दकलय् अप्वः नाफा नइगु बैंकतय् धलखय् लाः । थ्व सम्बन्धय् आयोगं सोमवाः मेलबर्नय् न्हापांगु सुनुवाई याःगु खः ।

आयोगया आयुक्त केनेथ हायनीं वित्तीय क्षेत्रं यानाच्वंगु मापदण्ड व अपेक्षा स्वयां क्वय्या व्यवहारयात कयाः अनुसन्धान जुइगु खँ धाःगु दु ।वय्कलं अस्ट्रेलियाया वित्तीय सेवा विश्वया हे बल्लाःगु स्थिर सेवा मध्ये लाःसां गलत व्यवहार याःगु उदाहरणत दुगुलिं थुकिं थीथी न्ह्यसः ब्वलंगु खँ धयादीगु दु । बैंकिङ सेवा बाहेक निवृत्तिभरण्ढा व निवृत्ति योगदान, बीमा व सम्पत्ति व्यवस्थापन कम्पनीतय् बारे नं छानविन जुइगु खँ धाःगु दु । आयोगं ततःधंगु त्यासा बीगु संस्थायात निं प्राथमिकताय् छानविन यायेत्यंगु खः । थज्याःगु संस्थां सेवाग्राहीयात स्वयां नं नाफायात अप्वः महत्व बियाः ज्या यानाच्वंगु दु ।