कोरोना भाइरस : सीपिं ४ लख थ्यन, संक्रमित थ्यंमथ्यं ७० लख

येँ – कोरोना भाइरस (कोभिड-१९)या महामारीया कारणं हलिन्यंक सीपिं ४ लखं अप्व जूगु दु । जोन्स हप्किन्स विश्वविद्यालयया कथं थौं तक ४ लख २ सय ४३म्ह मनूत सीगु दु । अथेहे कोभिड-१९पाखें संक्रमिततय् ल्याः ६९ लख २३ हजार ८ सय ३६म्ह थ्यंगु दु ।

संक्रमणपाखें दकलय् अप्व अमेरिका प्रभावित जूगु दु । अन १९ लख २० हजार ६१म्ह मनूतय्त संक्रमण जूगु दुसा १ लख ९ हजार ८ सय २म्ह मनूत सीधुंकूगु दु । अथेहे ब्राजिलय् ६ लख ७२ हजार, रुसय् ४ लख ६७ हजार व बेलायतय् २ लख ८६ हजार मनूतय्त संक्रमण जुइधुंकूगु दु ।

अथेहे भारतय् नं संक्रमणया ल्याः अप्वया वंगु दु । भारतय् संक्रमितत २ लख ४८ हजार थ्यंगु दु । हलिं दकलय् अप्व संक्रमिततय् धलखय् भारत न्यागूगु स्थानय् लानाच्वंगु दु ।

नेपालय् नं संक्रमिततय् ल्याः न्हिया न्हिथं अप्वयाच्वंगु दु । थौं जक नेपालय् थप २ सय १३म्हेसित कोरोना भाइरसया संक्रमण जूगु खः । नेपालय् संक्रमिततय् ल्याः ३ हजार ४ सय ४८म्ह थ्यंगु दुसा सीपिं १३म्ह थ्यनेधुंकल ।