इहिपा लिपा बलिउडया हिरोइनत

बलिउडय् विशेष यानाः हिरोइनया रुपया चले जुयाच्वंपिं, हिट जुयाच्वंपिं स्टारतसें आकाझाकां इहिपा याइमखु धाइ । तर सदां अथे मजुइ यः । थगुने बलिउडया सुपरस्टार हिरोइन धयातःम्ह दिपिका पादुकाणें बलिउडया हे हिरो रणवीर कपुरलिसे इहिपा यात । दीपिका बलिउडया छम्ह तसकं नांजाया च्वंम्ह हिरोइन जक मखसे हलिउड फिल्मय् तकं म्हिते धुंकूम्ह हिरोइन खः ।

दीपिका जक मखु हलिउडय् थःगु बिस्कं थाय् दयेकेत ताःलाःम्ह प्रियंका चोपडां नं थगुने हलिउड सेलिब्रिटीलिसे इहिपा यात । थुकथं बलिउडया हिरोइनतसें थः बय्बय् जुयाच्वंगु इलय् हे इहिपा याइमखु धयागु खँ न्ह्याब्लें सत्य जुइमखु धयागु थुमिसं क्यनाबिउगु दु । थन अज्याःपिं मेपिं हिरोइनतय्गु बारे नं चर्चा याये, गुपिंसं थः हिट जुयाच्वंगु इलय् हे इहिपा यानाः क्यन ।

बलिउडया हिरोइनतसें थः बय्बय् जुयाच्वंगु इलय् हे इहिपा याइमखु धयागु खँ न्ह्याब्लें सत्य जुइमखु धयागु थुमिसं क्यनाबिउगु दु ।

प्रियंका चोपडां ला बलिउड फिल्म मम्हितूगु हे ताः दयेधुंकलसा आः इहिपा लिपा हलिउड फिल्म नं म्हितूगु मदुनि । बरु दीपिकां इहिपा लिपा नं थःगु बलिउड यात्रायात निरन्तर हे यानातःगु दुसा थौंकन्हय् व छगू रियल स्टोरी धकाः धयातःगु ‘छपाक’ नांया फिल्मय् व्यस्त दु ।

ऐश्वर्या राय
स्टारया रुपय् तसकं बय्बय् जुयाच्वंगु इलय् इहिपा याःम्ह छम्ह ल्वःमंके मजिउम्ह हिरोइन ऐश्वर्या राय नं खः । मिस वल्र्ड जुइधुंकूम्ह ऐश्वर्याया बलिउड यात्रा तसकं बांलानाच्वंगु इलय् हे वं बलिउडया मेगास्टार अमिताभ बच्चनया स्टार काय् अभिषेक बच्चनलिसे इहिपा याःगु खः ।

थ्व सिबें न्हापा ऐश्वर्याया नां सलमान खान व विवेक ओबेराय थेंज्याःपिं बलिउड स्टारतलिसे स्वानाच्वंगु खःसा अभिषेक बच्चनया ला मेम्ह बलिउड हिरोइन करिश्मा कपुरलिसे इन्गेजमेन्टतक जुइधुंकूगु खः । अनं लिपा अभिषेक बच्चनया नां मेम्ह बलिउड हिरोइन रानी मुखर्जीलिसे नं स्वाना वःगु खः ।

ऐश्वर्यां इहिपा लिपा ‘जज्बा’, ‘सर्बजित’, ‘फन्नेखां’ थेंज्याःगु फिल्म म्हितल तर फ्लप जुलसा वयागु रणवीर कपुरलिसे हट सिन दूगु ‘ऐ दिल है मुश्कील छगू धाःसा हिट जूगु फिल्म खः ।

रानी मुखर्जी
रानी मुखर्जीया नां अभिषेक बच्चनलिसे छक्व स्वाना वःगु खःसां थ्व स्वापु ताःतक कायम जुइमफुत । खय्त ला वयागु नां बलिउडया कमेडी किंग हिरो गोविन्दालिसे नं छक्वः मस्वाःगु मखु, तर थ्व स्वापू नं ताःतक म्वानाच्वने मफुत । अनं लिपा वयागु नां बलिउडया नांजाःम्ह फिल्म मेकर आदित्य चोपडालिसे स्वात ।

न्हापा हे इहिपा जुइधुंकूम्ह आदित्यलिसे हे वयागु इहिपा जूगु इलय् रानी मुखर्जी बलिउडया स्टारया हे रुपय् नां कमे यानाच्वंगु खः । इहिपा लिपा रानी मुखर्जीं थः हे जहानया कम्पनीं दयेकूगु ‘मदार्नी’ व ‘हिचकी’ नांयागु फिल्म म्हितूगु दु ।

करिना, करिश्मा व बबिता कपूर
अभिषेक बच्चनलिसे इन्गेजमेन्ट त्वादले धुंकाः संजय कपुर नांयाम्ह छम्ह व्यापारीलिसे इहिपा याःम्ह करिश्मा कपुर उबलय् छम्ह स्टार कथं हे बयबय् जुयाच्वंम्ह खः । संजयलिसे डिभोर्स धुंकाः करिश्मा ‘डेन्जर्स इश्क’ नांयागु फिल्म म्हितल तर वयागु कमब्याक धाःसा सुथां मलात ।

करिश्मा कपुरया मां बबितां नं रणधीर कपुरलिसे इहिपा याःगु इलय् हिट स्टार हे जुयाच्वंगु खः । तर बबितां इहिपा लिपा फिल्म म्हितेगु त्वता बिल । अथेहे तुं करिश्माया केहँे करिना कपुरया सैफ अलि खानलिसे इहिपा जूगु इलय् व नं छम्ह स्टार हे खःसा इहिपा लिपा वं आःतक नं फिल्म म्हिताच्वंगु दनि ।

डिम्पल कपाडिया÷ट्वींकल खन्ना
डिम्पल कपाडिया ‘बबी’ फिल्मया कारणं बय्बय् जुयाच्वंगु इलय् आकाझाकां हे उगु इया सुपर स्टार राजेश खन्नालिसे इहिपा याःगु खःसा वयागु हाकनं फिल्म म्हितेगु इच्छाया कारणं उमि दथुइ बाय्भु वःगु खः । राजेश खन्नालिसे बायेधुंकाः डिम्पलं हाकनं फिल्म म्हितेगु शुरु यात ।

अले छुं ईतक हिरोइन हे जुयाः म्हितलसा लिपांगु इलय् क्यारेक्टर आर्टिस्ट जुयाः तकं म्हितल । राजेश खन्ना व डिम्पलया तःधिकःम्ह म्ह्याय् ट्वींकल खन्नां नं थःगु चले जुयाच्वंगु फिल्मी क्यारियर त्वःताः अक्षय कुमारलिसे इहिपा याःगु खःसा इहिपा लिपा फिल्म म्हितेगु मति तकं मतः ।

माधुरी दिक्षित÷जुही चावला
धकधक गर्लया रुपय् बय्बय् जूम्ह हिरोइन माधुरी दीक्षित बलिउडय् ताःतक सुपर स्टारया रुपय् टिके जुयाच्वंम्ह हिरोइन खःसा थःगु बांलाना च्वंगु क्यारियर त्वःताः वं डा. श्रीराम नेनेलिसे इहिपा याःगु खः । वया हे समकालिन हिरोइन जुही चावलां जय मेहतालिसे इहिपा याःगु खः ।

माधुरीं लिपा कमब्याक जुइगु कुतः कथं ‘आजा नचले’ नांयागु फिल्म म्हितल तर थ्व फिल्म धाःसा चले मजुल । इहिपा लिपा वयागु देवदास नांयागु छगू फिल्म चलेजुलसा थुगुसी वयागु न्हूगु फिल्म ‘कलंक’ नं चले मजुल । जुही चावला व माधुरी नापं म्हितूगु ‘गुलाब ग्यांग’ नं फ्लप हे जुल ।

 

श्रीदेवी
बलिउडय् मिसाम्ह सुपरस्टार धकाः धयातःम्ह हिरोइन खः– श्रीदेवी । वयागु थेंज्याःगु थाय् मेपिनिगु मदु धकाः नं धाइ । थुकथं बय्बय् जुयाच्वंगु इलय् वं बोनी कपुरलिसे इहिपा याःगु खः । लिपा वनाः वं ‘इंग्लीस विंग्लीस’ व ‘मम’ थेंज्याःगु फिल्म म्हितल । थ्व निगुलिं फिल्म हिट नं जूबले हाकनं फिल्मय् पलाः न्ह्याकेगु मति तयाच्वंम्ह श्रीदेवीं आकाझाकां थ्व संसार त्वतावन ।

काजोल
बलिउड स्टार अजय देवगनलिसे इहिपा याःगु इलय् काजोल बलिउडया स्टारया रुपय् नांजायाच्वंम्ह खःसा लिपा वनाः काजोलं शाहरूख खानलिसे ‘दिलवाले’ फिल्म म्हितल । छगू इलय् सुपरहिट जोडीया रुपय् कयातःगु शाहरूख व काजोल जोडीया ‘दिलवाले’ धाःसा हिट मजुल । वयागु लिपांगु फिल्म ‘हेलिकोप्टर इला’ नं फ्लप हे जुल ।

थुकथं स्वयेबलय् बलिउडय् इहिपा जूगु इलय् हिट जुयाच्वंसां इहिपा लिपा अज्याःपिं हिरोइनतय्गु पलाः उलि ताःलाःगु खनेमदु धायेमाः ।

सम्बन्धित बुखँ

LEAVE YOUR COMMENTS