बलिउड स्टारतय्गु ब्रेकअप स्टोरी

बलिउडया सेलिब्रिटीतय् मतिना जुइगु बे्रकअप जुइगु व हाकनं मेम्ह लिसे मतिना जुइगु धइगु छुं न्हूगु खँ मखु । अज्याःगु हे छगू दसु शाहिद कपुरया मतिना खः । शाहिद कपुर नांयाम्ह बलिउड स्टारया मीरा राजपुत नांयाम्ह छम्ह मिसालिसे इहिपा जुल । वसिबें न्हापा छगू इलय् शाहिद कपुरया नां बलिउड हिरोइन करीना कपुरलिसे स्वानावयाच्वंगु खः । इमि दथुया मतिना छगू इलय् तसकं हे बय्बय् नं जूगु खः ।

मतिना कालबिलया झ्वलय् इमि दथुया “किसिङ्ग” किपा नं लिक जुल । थुकथं थवंथवय् मतिना ब्याकाच्वंपिनि दथुइ आकाझाकां बे्रकअपया खबर वल । अनं लिपा करीना कपुरया नां सैफ अलि खानलिसे स्वात । सैफ व करीना दथुइ इहिपा हे जुल । करीनालिसे बाय्भु वयेधुंकाः शाहिदया नां मेपिंलिसे उलि स्वानावःगु खनेमदु । छक्वः प्रियंका चोपडा मय्जुलिसे हिमचिम अप्वया वःगु खँ ला पिहां वल, तर व खँ फय्गं साबित जुल ।

शाहिद व प्रियंका छगू हे बिल्डिंगय् च्वनीपिं जूगुलिं जक मखसे उगु इलय् इपिं निम्ह “कमीने” नांयागु छगू फिल्मय् नापं म्हिताच्वंगुलिं नं छक्वःनिक्वः इपिं नापनापं जुइगु खनेदुगु नं खः तर इमि दथुइ मतिना हे धाःसा जूगु मखु । गनतक प्रियंका चोपडाया खँ दु वय्कः मय्जुया नां मतिनाया स्वाहाने त्वाथलय् लिउने हे लानाच्वंगु खनेदु । छक्वःनिक्वः मतिनाया हुइनाभुइना जूसां आखिरय् वनाः अज्याःगु खबर फय्गं साबित जूगु खनेदु ।

शाहिदलिसे थें हे प्रियंकाया नां हर्मन बावेजा लिसे स्वाकाः चर्चा जुल । तर व चर्चा धाःसा इपिं निम्हं नापं म्हिताच्वंगु “ह्वाट्स योर राशी”या प्रचार स्टण्ट जक साबित जुल । हेरी बावेजा नांयाम्ह फिल्म डाइरेक्टरया काय् हर्मन बावेजाया नां लिपा वनाः विपाशा बसुलिसे स्वात । इमि दथुइ ला इहिपा हे जुइगु धकाः तकं बय्बय् जुल । तर लिपा वनाः इमि दथुया मतिनाया खँ अथें हे तनावन । मतिनाया खँय् विपाशा बसु न्ह्याब्लें हे आशां द्याःगु हे जक खनेदु ।

तर विपाशा बसु छम्ह धाःसा मतिनाय् आपाः यानाः आशां द्याःगु हे खनेदु । छाय्धाःसां डिनो मोर्य नांयाम्ह बलिउड हिरोलिसे “राज” फिल्म म्हितूगु इलय् इमि दथुइ यःत्यः जूगु खँ बलिउडय् साप हे बय्बय् जूगु खः । तर लिपा वनाः इमि दथुइ नं ब्रेकअप जुलसा “दम मारो दम” फिल्म म्हितूगु इलय् विपाशाया नां राना दगुबतिलिसे नं स्वात । साउथया स्टार राना दगुबतिया बलिउड क्यारीयर जहाँ थी मफुथें हे विपाशालिसेया मतिनाया स्वां नं तफ्वः जुइमफुत ।

विपाशा बसुया मतिनामिपिनिगु धलः भतिचा ताहाकः । उकी मध्ये नं जोन अब्राहमलिसेया मतिना ला सकसिनं तारीफ हे याःगु खः । थुभनं चर्चा जूसां विपाशा व जोनया मतिनाया स्वां छन्हू वनाः झ्वाः हे जुया बिल । जोन लिसेया बे्रकअप धुंकाः विपाशाया नां हर्मन बावेजालिसे नं घाकल । इमि दथुइ नं इहिपा हे जुइ धइथेंजाःगु खँ पिहां वःगु खः । तर लिपा वनाः बिपाशा बसुं करण ग्रोवर नांयाम्ह छम्ह मेम्ह हे कलाकारलिसे मतिनाया स्वां ह्वयेकल अले इहिपा नं यात ।

बलिउड स्टारतय् मतिनाया बाखनय् गबले बाय्भूया खँ वइ धकाः सुनाः धाये मफु । छगू इलय् रणवीर कपुर व दिपिका पादुकोणेया यःत्यः बलिउडया हट केक बराबर जूगु खः । इमिं निम्हं नापं म्हितूगु फिल्मय् “बचना ए हसिनों” छगू खःसा लिपा बे्रक अप जुइधुंकाः नं इमिसं “ये जवानी हे दिवानी” नांयागु फिल्म म्हितल । थ्व फिल्म ला हिट नं जुल । तर मतिनामिया रुपय् इमिसं छम्हेसिनं मेम्हेसित अनफिट हे तायेकल ।

छम्ह रणवीरयात त्वःते धुंकाः दिपिका मय्जुं मेम्ह रणवीर यानि कि रणवीर सिंहयात ज्वन । “गोलियों का रास लीला रामलीला” नांयागु फिल्मय् म्हितूबलय् थवंथवय् मतिना कालबिल याःपिं रणवीर व दिपिका दथुइ मतिनाया स्वां न्हियान्हिथं तफ्वः जुयावयाच्वंगु दुसा थुम्ह रणवीरया थ्वसिबें न्हापा अनुष्का शर्मा नांयाम्ह छम्ह हिरोइनलिसेया लभस्टोरी फ्लप जुइधुंकूगु खः ।

बलिउडय् थथे ताःमलाःगु लभस्टोरी यक्व हे दु । उकी मध्ये अक्षय कुमार व शिल्पा शेट्टी अले अक्षय कुमार व रविना टण्डन दथुया लभस्टोरी नं खः । सलमान खानया ला छपुनिपु जक मखु यक्व हे लभस्टोरी ताःमलाये धुंकल । उकी मध्ये दकलय् बय्बय् जूगु धइगु सलमान खान व ऐश्वर्या राय दथुया लभस्टोरी खः । सलमान व ऐश्वर्याया लभस्टोरी चलेजुयाच्वंगु इलय् सलमानं ऐश्वर्यायात थःगु हे कब्जाय्तयेगु कुतः तकं यात ।

उगु हे इलय् ऐश्वर्या राय व शाहरूख खानयात कया “चलते चलते” नांयागु छगू फिल्म दयेके ज्या न्ह्यात । तर सलमान भाजुं उगु फिल्मया शुटिंग जुयाच्वंगु इलय् ऐश्वर्या मय्जुयात थुलि डिस्टर्ब यानाबिल कि वय्कः मय्जुं शुटिंग हे बांलाक याये मफुत । अले वयागु थासय् रानी मुखर्जीयात काल । सलमान धुंकाः ऐश्वर्याया लभस्टोरी विवेक ओबेरायलिसे न्ह्यात तर इमि दथुया लभस्टोरी नं फ्लप हे जुल । सलमान खानया फ्लप लभस्टोरीया धलखय् संगीता बिजलानीनिसें सोमी अलितक जक मखसे केटरीना कैफ तकया ताःहाकःगु धलः दु ।

केटरीना कैफ व सलमान खानया लभस्टोरी नं तसकं हे बय्बय् जूगु खः । न्ह्याक्व हे बय्बय् जूसां ताःलाये धाःसा मफुत । छगू इलय् केटरीना व रणवीर कपुर दथुइ नं बःचाहाकःगु लभस्टोरी चलेजूगु खःसा उदय चोपडा नांयाम्ह हिरो व काजोलया केहें तनीषा दथुइ नं मतिनाया स्वां ह्वःगु खः । तर स्वां झ्वाः जुल । बलिउडय् ताःमलाःगु लभस्टोरीया आगं प्वलेबलय् त्वःफिके मजिउगु छगू धइगु गुरुदत्त व वहिदा रहमान दथुया लभस्टोरी नं खः ।

विवाहित गुरुदत्त व अविवाहित वहिदा रहमान दथुइ ताः ई तक मतिनाया स्वां ह्वल । तर लिपा वनाः थ्व मतिनाया बाखंया अन्त टे«जेडी हे जुल । छगू इलय् देव आनन्द व सुरैया दथुइ नं मतिना क्वातुक्क ब्वलनसा इमि दथुया मतिना नं फ्लप हे जुल । अथे हे तुं मधुबाला व दिलिप कुमार दथुइ नं ताः ई तक मतिना जुल । “मुगल ए आजम” थेंज्याःगु ज्वःमदुगु फिल्मय् इमिसं याःगु अभिनय आःतक नं फिल्मया इतिहासय् हुइमफइगु खँ कथं कयातःगु दु ।

इमि निम्हेसियागु जोडीं मेमेगु नं आपालं फिल्म म्हितूगु दुसा बी आर चोपडाया “नया दौर”य् तकं मधुबालायात हे हिरोइन कथं कयातःगु खः । दिलिप कुमार व मधुबाला दथुया मतिनाया खँ बय्बय् जुयाच्वंगु इलय् मधुबालाया अबुं मधुबालायात बम्बईसिबें पिने शुटिंगय् ब्वति कायेके मबिउबलय् छगू फिल्मय् वया थासय् बाध्य जुयाः बैजयन्ती मालायात हिरोइन दयेकेमाःगु खः । उगु जमानाय् नापनापं फिल्म म्हितूपिं स्टारत दथुइ मतिनाया स्वां ह्वःगु दसु यक्व हे दु ।

उकी मध्ये मीना कुमारी व नांजाःम्ह फिल्म मेकर कमाल अमरोहीलिसे मतिना नं फ्लप हे जूगु लभस्टोरी खः । मधुबालां लिपा म्येहालामि कथं नांजाःम्ह स्टार किशोर कुमारलिसे इहिपा नं यात । तर इहिपाया छुं ई लिपा हे मधुबाला ल्वचं कया मंत ।
पुलांगु जमानाया लभस्टोरी राजकपुर व नर्गिस दथुया लभस्टोरी नं ताःलायेमफूगु लभस्टोरी हे खः। श्री ४२०, बरसात, आह, आग, आवारा, अन्दाज लगायत झिंखुगू फिल्मय् नापनापं म्हितूपिं राज कपुर व नर्गिस दथुइ मतिनाया स्वां ह्वःगु खःसा राज कपुरं थः विवाहित जूगुलिं नर्गिसयात नालेगु मस्वः ।

मतिनाय् थुकथं हार नःम्ह नर्गिसया जीवनय् सुनिल दत्त मवःगु जूसा वयागु हालत नं मीना कुमारी वा मधुबाला थें मजुइ धका धायेमफु । छगू जमानाय् सुपर स्टार धकाः बय्बय् जूम्ह राजेश खन्ना व अन्जु महेन्द्रु अले राजेश खन्ना व टिना मुनिम अनंलि सञ्जय दत्त व टिना मुनिम दथुया लभस्टोरी नं फ्लप लभ स्टोरी खःसा दकलेसकले बय्बय् जूगु फ्लप लभ स्टोरी धइगु व महानायकया दर्जाय् लाःम्ह अमिताभ बच्चन व रेखा दथुया लभस्टोरी खः ।

“दो अन्जाने”, “खून पसिना”, “मुकद्दरका सिकन्दर” थेंज्याःगु आपालं फिल्मय् हिरो हिरोइन जुयाः म्हितूबलय् इमि दथुइ मतिना क्वातुगु खःसां तबिनं थ्वसिबें न्हापा हे अमिताभ भाजुया जया भादुरी नाप इहिपा जुइ धुंकूगुलिं यानाः थ्व लभ स्टोरी नं फ्लप लभ स्टोरीया हे धलखय् लाःवंगु खँ आपाःसिनं हे सिउ जुइमाः ।