नेपालय् लगानीया बांलाःगु अवसर

येँ – नेपाल लगानी सम्मेलन २०१९ य् सहभागी थीथी देय्या प्रतिनिधित्सं नेपाःया न्हूगु संविधान व राजनीतिक स्थिरता लिसें लगानी व विकासया निंतिं बांलाःगु ह्वःताः वःगु खँ धाःगु दु । थःपिनि देय्या विकासया अनुभव न्यंकेगु झ्वलय् उमिसं नेपालं सम्मेलन यानाः वैदेशिक लगानीया निंतिं बांलाःगु लँ चायेकूगु खँ नं धाःगु दु ।
प्रधानमन्त्री केपी ओली शुक्रवाः उलेज्या यानादीगु थ्व सम्मेलन शनिवाः क्वचाःगु खः ।

नेपाःया निंतिं दक्षिण अफ्रिकाया राजदूत साडिक जाफेरं थःगु देशं खुल्ला अर्थतन्त्रय् विश्वास याइगुव नेपालं जःलाखःला भारतलिसे व्यापारिक स्वापू विकसित याना यंकाच्वंगु इलय् नेपालय् लगानी हयेत थाकु मजुइगु खँ कनादिल । संयुक्त अरब इमिरेट्सया अर्थ मन्त्रालयया वैदेशिक व्यापार उपसचिव अब्दुल्लाह अल सालेहं वैदेशिक लगानी आकर्षित यायेत लगानी संरक्षण सम्झौता व दोहोरो कर उन्मुक्ति सम्झौता आवश्यक जूगु खँ कनादिल ।

लगानीकर्तायात छुं नं कथंया कानुनी व्यवधान वयेके मबिइत सतर्क जुइमाःगु धासें वय्कलं थुकिया निंतिं नेपाः सरकारं सहजीकरण यायेमाःगु खँय् बः बियादिल । वय्कलं मेमेगु देशय् तुलनाय् नेपालय् लगानी यात धाःसा लगानीकर्तातय्सं उच्च प्रतिफल चूलाकेफइगु अवस्था दुगु खँ नं धयादिल । वय्कलं धयादीगु दु, ‘वैदेशिक लगानी धयागु रकम जक मखु, प्रविधि, ज्ञान व दक्षता नं खः ।’

राजनीतिक स्थिरतालिसें न्ह्याः वंगु मुलुकय् लगानीया प्रचुर सम्भावना दुगु न्ह्यथँसें वय्कलं नेपाःया निगू जःलाखःया देय् थनया उद्यमीतय् निंतिं तःधंगु बजार जूगु खँ धयादिल । चीन युएईया न्हापांगु व भारत निगूगु तःधंगु व्यापारिक साझेदारी देय् खः । युएई नेपाःया निंतिं स्वंगूगु तःधंगु साझेदार देय् जूगु तथ्य न्ह्यब्वसें वय्कलं निगू देय् दथुइ ३० करोड अमेरिकी डलर बराबरया व्यापार जुयाच्वंगु खँ कनादिल ।

मलेसियाया लगानी विकास सम्बन्धी प्राधिकरणया प्रमुख कार्यकारि शिव सूर्यमूर्ति सुन्दर राजां थःपिं सुरुइ लगानी दुत हयेत विश्वया मू मू देशय् थःपिनिगु लगानी बोर्डया ज्याकू चायेकागु व सम्पर्क विस्तार यानागु अनुभव कनादिल । वय्कलं लगानी बोर्डयात अध्यागमन निकायलिसे तालमेल यानाः लगानीकर्ताया निंतिं प्रमाणपत्र वितरण व लगानीया लागि सहजीकरण यायेगु प्राधिकार दयेमाःगु सुझाव नं बियादिल ।

नेपाःया ज्योति समूहया अध्यक्ष पद्मज्योतिं विकसित देशय् लगानी व विकासया सफलताया अनुभवं थःपिंत नं ऊर्जा चूलाःगु धयादिसें नेपाः विकास व समृद्धिया मार्गय् न्ह्याः वनेफइगु सम्भावना खनेदुगु खँ धयादिल ।

कृषिइ लगानीया सम्भावना

लगानी सम्मेलनय् नेपालं कृषिया आधुनिकरणया निंतिं लगानी सुरक्षाप्रति आश्वास्त यासें कृषि क्षेत्रय् लगानी यायेत आह्वान याःगु दु । कृषि क्षेत्रय् तःधंगु लगानी दुत हयाः व्यावसायिक दयेकाः भौगोलिक व हावापानीया विविधताया लिसें निगू तःधंगु जःलाखःला देशय् बजारया सम्भावनायात परणाममुखी दयेकेगु योजना सहित सरकारं दातृ निकाय, उद्यमी, व्यवसायी व थीथी देय्या लगानीकर्तातय् लगानीया निंतिं छुं कानुनी व्यवधान मदु धासें आश्वास्त याःगु खः ।

लगानी सम्मेलनया निन्हुया न्हि कुन्हु कृषि व वन उत्पादनलिसे सम्बन्धीत सत्रय् थ्व क्षेत्रया विज्ञ व लगानीकर्तायात कृषि तथा पशुपंक्षी मन्त्री चक्रपाणि खनालं सरकारं लगानीयात माक्व सुरक्षा बीगु प्रतिबद्धता प्वंकादिसें कृषि क्षेत्रय् ढुक्क जुयाः लगानी यायेत इनाप यानादीगु खः ।सरकारं कृषिइ लगानीया निंतिं रासायनिक मल प्लान व चितवन, सुर्खेत, काभ्रे, कैलाली, कास्की, पर्सा, रुपन्देही व मोरङ्गय् एकीकृत कृषि सम्बन्धी च्यागू परियोजना न्ह्यःने हःगु खः ।

मन्त्री खनालं सरकारं मह, कफि व चिया जक मखु एग्रो फोरेस्ट व एग्रो पर्यटनय् नं प्रसस्त लगानी सम्भावना दुगु खँ कनादिसें कानुन परिमार्जन यानाः लगानीमैत्री नीति नियम दयेकाः मन्त्रालय न्ह्याः वनाच्वंगु खँ कनादिल । मन्त्रालयया सहसचिव योगेन्द्रकुमार कार्कीं कषि क्षेत्रया समग्र वस्तुस्थितिया बारे प्रस्तुति न्ह्यब्वयादिसें हाल ६६ प्रतिशत जनसंख्या कृषिइ दुगु खँ कनादिल ।

कृषि क्षेत्रया आधुनिकीकरणया नितिं पूर्वाधारय् तःधंगु लगानी आवश्यक दुगु खँ न्ह्यथँसें वय्कलं सरकारं कृषि क्षेत्रयात बीमा व बैंकिंग क्षेत्रलिसे स्वाये चाहे जूगु खँ कनादिल । बहुराष्ट्रिय कम्पनी डाबर भारत लिमिटेडया सार्क प्रमुख हर्किरतसिंह वेदीं थःगु संस्थां नेपालय् ज्या यानागु २० वर्षया अनुभव न्यंकादिसें थन लगानी यायेत यक्व क्षेत्र दुगु खँ कनादिल ।

अथेहे कफि क्षेत्रय् लगानी याना वयाच्वंगु हेष्टर वायो साइन्सया प्रमुख कार्यकारी अधिकृत राजीव गान्धीं नेपाःया कफि गुणस्तरीय जूगु व थुकियात विश्व बजारय् यंकेफइगु खँ धयादिल । अथेहे नेस्टले इण्डियाया वरिष्ठ उपाध्यक्ष सञ्जय खजुरीयां थ्व क्षेत्रय् दुरु व दुरुजन्य उद्योगया सम्भावना बारे थःगु अनुभव न्यंकादिसें नेपालय् नं प्रशोधन माध्यमपाखें कृषि उत्पादनया गुणस्तरय् सुधार हयेफइ धयादिल ।कार्यक्रमया संयोजन यासें गोल्यान समूहया अध्यक्ष पवनकुमार गोल्यानं नेपाःया कृषि क्षेत्रय् लगानी सम्भावना बारे थःगु बिचाः तयादीगु खः ।

 

सम्बन्धित बुखँ

LEAVE YOUR COMMENTS