
येँ – राष्ट्रिय गौरव व रणनीतिक महत्वया येँ–निजगढ फास्ट ट्र्याकया विस्तृत परियोजना प्रतिवेदन (डीपीआर) दयेकेत कोरियाली परामर्शदाता कम्पनी छनोट जूगु दु । सेनाया फास्ट ट्र्याक आयोजन प्रमुख लिसें उपरथी योगेन्द्रबहादुर खाँणं डीपीआरया निंतिं छनोट जूगु कोरियाया सुुसुङ कम्पनी लिसे थ्वहे महिनाया निगूगु वालय् निर्माणसम्बन्धी सम्झौता जुइगु जानकारी बियादिल ।
उगु डीपीआर दयेकेत १० करोड १५ लाख तका तुइगु खँ धाःगु दु । भारतीय कम्पनी आइएल एण्ड एफएसको माग याःगु स्वयां ५१ करोड दंक डीपीआर दयेकेगु तयारी जूगु खँ धाःगु दु । सम्झौता जूगु प्यलाया दुने उगु कम्पनीं डीपीआर तयार याइ ।
एशियाली विकास बैंकं २००८ य् तयार याःगु सम्भाव्यता अध्ययन प्रतिवेदनयात आधार दयेकाः थौंकन्हय् सेनां निर्माण सम्बन्धी आधारभूत व प्रारम्भिक ज्या याना वयाच्वंगु दु । फास्ट ट्र्याक दयेकेत माःगु ९० प्रतिशत जग्गा अधिग्रहण व द्रुतमार्ग क्षेत्रय् लाःगु २० हजार सिमा पालेगु ज्या क्वचायेधुंकूगु दु ।
आयोजना न्ह्यःने न्ह्याकेगु झ्वलय् छोक्रेडाँडा निसे बाँदरे खोल्सी तकया करिब १२ किलामिटर क्षेत्रय् स्वंगू सुरुङ मार्ग दयेकेगु कथं सडकया रेखांकनय् हिउपाः हःगु दु । उगु रेखांकन हिउपाः हयाः सुरुङ मार्ग दयेकल धाःसा झिगू तां व बागू दर्जन स्वयां अप्वः कल्भर्ट दयेके म्वाःलीगु खँ सेनां धाःगु दु ।
उगु सुरुङ मार्ग दयेकेधुंकाः थ्व स्वयां न्हापा प्रस्तावित ७६.२ किलोमिटरया उगु लँपुया दुरी थ्यंमथ्यं स्वंगूत्या किलोमिटर कम जुइसा १ अर्ब ८० करोड लागत अप्वइगु खँ धाःगु दु । विसं २०७४ साल वैशाख २१ गते मन्त्रिपरिषदं नेपाली सेनाया व्यवस्थापनाय् येँ–निजगढ द्रुतमार्ग दयेके बीगु निर्णय याःगु खः । द्रुत मार्गया प्रारम्भिक अनुमानित लागत १ खर्ब ११ अर्ब यानातःगु दु ।
LEAVE YOUR COMMENTS