बागमति प्रदेशय् ६४ अर्ब ५४ करोडया बजेट
बागमति प्रदेश सरकारं वइगु आर्थिक दँया निंतिं ६४ अर्ब ५४ करोड ४ लाख ३१ हजारया बजेट हःगु दु । असार १ गते शनिवाः बागमति प्रदेश सभाय् आर्थिक मामिला तथा योजना मन्त्री जगन्नाथ थपलियां न्ह्यब्वःगु थ्व बजेट चालु आर्थिक दँया स्वयां छगू अर्ब ८४ करोड अप्वः खः । चालु आर्थिक दँय् ६२ अर्ब ७० करोड ९० लाखया बजेट विनियोजन याःगु खः ।
आर्थिक दँ २०८१÷८२या निंतिं फ्याःगु बजेटय् चालुपाखे २६ अर्ब १० करोड ८२ लाख दुसा पुँजीगतपाखे ३६ अर्ब ९३ करोड ८७ लाख ४९ हजार दु । वित्तीय व्यवस्थापनपाखे १ अर्ब ५० करोड तका फ्याःगु दु ।
प्रदेश सरकारं वइगु आर्थिक दँया खर्चया निंतिं कर राजश्वपाखें २७ अर्ब ३८ करोड ५७ लाख, मेमेगु राजस्वपाखें ६ अर्ब ५१ करोड १६ लाख ७९ हजार म्हयेगु व संघीय वित्तीय हस्तान्तरणपाखें १५ अर्ब छ७ करोड ५६ लाख हयेगु व २०८०÷८१ या संञ्चित कोष व मेमेगुपाखें १४अर्ब ८६ करोड १४ लाख ५१ हजार तका वइगु अनुमान याःगु दु ।
बागमति प्रदेशय् दकलय् अप्वः भौतिक पूर्वाधार मन्त्रालयया निंतिं २२ अर्ब ६४ करोड तका फ्याःगु दु । अथेहे खानेपानी, ऊर्जा व सिँचाइ मन्त्रालयया निंतिं ६ अर्ब ९३ करोड फ्याःगु दु । बागमति सरकारं थुगुसी कृषि पूर्वाधार व कृषिइ लगानी दँ कथं हनेगु घोषणा यासें कृषि तथा पशुपंक्षी विकास मन्त्रालयया निंतिं २ अर्ब ६२ करोड तका फ्याःगु दु । थ्व योजना अन्तर्गत प्रदेश दुने जग्गा बालं कयाः केरा खेती याइपिं किसानतय्त जग्गा बालं बीगु निंतिं बिघाया २० हजार तका अनुदान बीगु, पशुस्रोत केन्द्र विकास, उच्च प्रविधियुक्त च्याउ उत्पादनय् ग्वाहालि यायेगु खँ धाःगु दु ।
अथेहे उपेक्षित, उत्पीडित व अतिसिमान्तकृत समुदायया निंतिं कार्यक्रम संचालन यायेगु घोषणा यासें सामाजिक विकास मन्त्रालयया निंतिं ३ अर्ब ९१ करोड बजेट तःगु दु । अथेहे संस्कृति, पर्यटन तथा सहकारी मन्त्रालयया निंतिं २ अर्ब ४६ करोड तका फ्याःगु दु । संस्कृति मन्त्रालयमार्फत
अथेहे सरकारं वन तथा वातावरण मन्त्रालयया निंतिं ३ अर्ब २१ करोड, रोजगार तथा यातायात मन्त्रालयाय निंतिं ९३ करोड दां फ्याःगु दुसा युवा तथा खेलकूद मन्त्रालयया निंतिं ७४ करोड तका फ्याःगु दु । थुकी मधये १० करोड दां चितवनय् दयेकाच्वंगु गौतमबुद्ध अन्तर्राष्ट्रिय क्रिकेट रंगशालायात बीगु जूगु दु । अथेहे आन्तरिक मामिला तथा कानुन मन्त्रालयया निंतिं ४४ करोड, आर्थिक मामिला तथा योजना मन्त्रालय अन्तर्गत वित्तीय क्षेत्रया निंतिं २४ करोड २ लाख व मुख्यमन्त्री तथा मन्त्रिपरिषद् कार्यालयया निंतिं ५० करोड ६४ लाख बजेट विनियोजन याःगु दु ।
सरकारं प्रदेशया सामुदायिक विद्यालयय् संचालन जुयाच्वंगु छगू विद्यालयय् छम्ह नर्स कार्यक्रमयात निरन्तरता बिउगु दु । थुकिया लिसें स्वास्थ्य मन्त्रालयया निंतिं ४ अर्ब ६२ करोड तका बजेट विनियोजन याःगु दु ।
आर्थिक मामिला मन्त्री थपलियां न्ह्यब्वःगु बजेटयात कयाः मुख्यमन्त्री शालिकराम जमकट्टेल हे असन्तुष्ट जूगु खँ नं पिहां वःगु दु । आर्थिक मामिलामन्त्री थपलियां सिलिङ स्वयां अप्वः बजेट हःगु धासें मुख्यमन्त्री असन्तुष्ट जूगु खः । थपलियां सिलिङ स्वयां अप्वः बजेट हयाः एमालेया कार्यक्रमत अप्वयेकूगु धापु मुख्यमन्त्रीया दु । बागमति प्रदेशया मुख्यमन्त्री जमकट्टेल माओवादी केन्द्रयाम्ह खःसा आर्थिक मामिला मन्त्री थपलिया एमालेयाम्ह खः ।
मेखे सरकारं हःगु बजेटयात प्रतिपक्षीतय्सं धाःसा जनताया भावना व रोजगारी सृजना जुइकथं ह. मजूगु टिप्पणी याःगु दु । नेपाली कांग्रेसया संसदीय दलया नेता बहादुर सिंह लामां बजेट मनगढन्ते व दिशाहीन जूगु धासें थुकिं जनताया चाहना व भावनायात सम्बोधन यायेमफुगु खँ धाःगु दु । बजेटं रोजगारी अप्वयेकीगु व आर्थिक समृद्धिइ ग्वाहालि याइमखु धासें वय्कलं घाटा बजेटं समस्या झन तच्वयेकीगु खँ धयादीगु दु ।
अथेहे राष्ट्रिय प्रजातन्त्र पार्टीया संसदीय दलया नेता उद्धव थापां संघीय सरकारपाखें वइगु अनुदान म्हो जूगु इलय् चालु आर्थिक दँया स्वयां तःधंगु बजेट हःगु दु, गुगु कार्यान्वयन जुइफइमखु धाःगु दु ।
LEAVE YOUR COMMENTS