किजापुजाबलय् स्वनिगलय् १७ लाख स्वांमाः आवश्यक
येँ – तरकारी, खाद्यान्नया उत्पादन थें स्वांया उत्पादन नं कृषि पेशा खः धयागु थुइके मफयाः स्वां आयात म्हो याये मफयाच्वंगु दु । थुगुसी नं स्वन्तिबलय् थ्यंमथ्यं स्वंगू लाख स्वांमाः भारतं आयात जुइगु अनुमान जुयाच्वंगु दु ।फ्लोरिकल्चर एशोसियसन नेपालया अध्यक्ष कुमार कसजुया कथं स्वन्तिबलय् स्वांमाः मगाइ थें च्वंगुलिं थ्यंथ्यं झिंछगू करोड तका बराबरया ४५ गू जातया स्वंगूलाख स्वांमाः आयात जुइत्यंगु दु ।
किजापुजाबलय् जक स्वनिगलय् १५ लाख निसें १७ लाख स्वांमाः आवश्यक दुगु खँ वय्कलं धयादीगु दु ।स्वन्तिबलय् तसकं यक्व स्वां खपत जुइगु जूगुलिं नेपालय् हे किसानतय्सं स्वांया मौसमी बाली नं याना वयाच्वगु दु । तर मौसमी बालीं जक स्वांया आवश्यकता पूमवनीगु जूगुलिं स्वांया आयात म्हो जुइमफुगु खँ धाःगु दु ।
नेपाःया किसानत आः नं व्यावसायिक रुपं स्वांया खेती यायेत आकर्षित जुयाच्वंगु मदुनि । तफ्वः स्वां व ग्वय् स्वां स्वन्तिबलय् विशेष महत्व दु । निगुलिं जातया स्वां पिइगु निंर्तिं िर बुँया आवश्यकता मदु ।स्वांया व्यवसाय मौसमय् निर्भर जुइगु जूसां थुकी गाक्क आम्दानी दइगु जूगुलिं बुँया द्यांचा, सितिकं वनाच्वंगु जग्गाय् याउँक पिइजिउ, तर किसानतय्के थुकिया बारे बांलाक जानकारी मदयाः परम्परागत बुँज्याय् जक सीमित जुयाच्वंगु खँ धाःगु दु ।
फ्लोरिकल्चर एशोसियसनया महासचिव विश्वमणि पोखरेलं स्वां मियाः जीवन न्ह्याकेत जक मखु, कुगाक्क आम्दानी नं यायेफइ धयागु ध्यान किसानतय्त मवंतसें स्वां आयात प्रतिस्थापन यायेफइमखु धयादीगु दु । नेपालय् स्वांया खेती १५५ हेक्टर क्षेत्रफलय् जक जुयाचवंगु दु । गुगु मुक्कं खेतीयोग्य बुँया ०.००५० प्रतिशत जक खः ।
स्वन्तिबलय् स्वांमाः मगाइ थें च्वंगुलिं थ्यंथ्यं झिंछगू करोड तका बराबरया ४५ गू जातया स्वंगूलाख स्वांमाः आयात जुइत्यंगु दु ।
थौंकन्हय् ३० लाख ९१ हजार हेक्टर जग्गा बुँज्या जुयाच्वंगु दु । अथेहे खाद्यान्न बाली यायेमफुगु जग्गा जक १० लाख ३० हजार हेक्टर दु ।
नेपालय् २०११ सालं निसें नेपाल प्राइभेट नर्सरी स्थापना यानाः सामान्यस्तरं स्वांया बुँज्या सुरु जूगु खः । थ्व व्यवसाय आःतकया दुने ४३ गू जिल्लाय् विस्तार जुइधुंकूगु दु ।
थौंकन्हय् एशोसियसनय् ६९७ म्ह स्वां व्यवसायीत आवद्ध जुयाच्वंगु दुसा ४३ हजार ५०० म्ह मनूत थ्व व्यवसायय आवद्ध दुगु खँ धाःगु दु । वंगु आर्थिक दँय् जक छगू अर्ब ८७ करोड तका बराबरया स्वांया कारोवार जूगु खः। थुकी मध्ये ११ करोड तकाया स्वां आयात जूगु खः ।
स्वन्तिबलय् ग्वय्स्वां, तफ्वःस्वां यक्व चुइ ।
दकलय् अप्वः तफ्वःस्वां १३ लाख, ग्वय् स्वां स्वंगू लाख व गोदावरी स्वां छगू लाख स्वांंमाः खपत जुइ । थुकी थ्यंमथ्यं ३० प्रतिशत भारतं आयात जुइ । स्वन्तिया स्वन्हु जक स्वनिगलय् स्वां, स्वांमाः व स्वां दुगु गमला यानाः थ्यंमथ्यं १६करोड तकाया कारोवार जुइ । स्वनिगलय् ख्वपया गुण्डु, येँया इचंगु, थानकोट, साँखु, ककनी, धादिंग, नुवाकोट व काभें्र स्वां दुहां वइ ।
यक्व सम्भावना दुगु स्वां व्यवसाय प्रवद्र्धन यायेगु निंतिं सरकारं पुष्प प्रवद्र्धन नीति २०६९ कार्यान्वयनय् हःगु दु । आर्थिक दँ २०७१ – २०७२ निसें स्वां व्यवसायया निंतिं छगू करोड बजेट विनियोजन याःगुली थ्व दँय् प्रदेश नं. ३या भूमि व्यवस्था तथा कृषि तथा सहकारी मन्त्रालयं स्वां विकास केन्द्रया विकासया निंतिं १६ लाख तका विनियोजन याःगु दु ।
बजारय् स्वांया माग अप्वःसां आवश्यकता कथं उत्पादन याये फयाच्वंगु मदु । नेदरल्यान्ड, हल्याण्ड, थाइल्यान्ड, अमेरिका थेंज्याःगु देशं गुलाफ, कारनेसन, जर्वेरा, ग्लाडियोलस, तफ्वः स्वां, गोदावरी स्वांया नेपाली कट फ्लावर माग न्हियान्हिथं अप्वयाच्वंसां नेपालं निर्यात धाःसा याये फयाच्वंगु मदु ।
सरकारं कृषि ख्यलय् अनुदान अप्वयेका यंकाच्वंसां स्वांया उत्पादन धाःसा सन्तोषजनक मजूगु खँ धाःगु दु । मीगु निंतिं स्वांया बजाः दु, तर उत्पादन मदु । थ्यंमथ्यं न्यागू अर्ब स्वयां अप्वः लगानी दुगु स्वां व्यवसायय् मनूतय् आकर्षत धाःसा अप्वया वनाच्वंगु दु । विश्वय् स्वा.या कारोवार जक २०० अर्ब डलरया दु । थुकी मध्ये८० अर्बया कारोवार नेदरल्यान्ड याकःचां हे याइ ।
LEAVE YOUR COMMENTS