प्रदेश सरकारयात बजेट दयेकेत हाथ्या

येँ – आर्थिक दँ २०७५÷७६ या बजेट दयेकेगु तयारी यानाच्वंगु प्रदेश सरकारयात मुख्य रुपं स्वंगू कथंया हाथ्या वयाच्वंगु दु । बजेट दयेकेगु निंतिं गनं ध्यबा दुहां वइ धयागु स्रोत क्वःछिइगु लिसें कर्मचारी मगाःगु व कार्यान्वयन यायेत आवश्यक निकायया स्पष्टता थें ज्याःगु स्वंगू मू हाथ्या वयाच्वंगु दु ।

साउनं निसें सुरु जुइगु न्हूगु आर्थिक दँया निंतिं प्रदेश सरकारं असार १ गते हे बजेट हयेमाःगु कानुनी प्रावधान दु । प्रदेशया बजेट स्रोत मूख्य यानाः संघीय सरकारपाखें वइगु अनुदान व थःगु स्रोतपाखें वइगु राजश्व जुइ । थ्वपालय् निसें संघीय ढाँचा कथं स्वंगुलिं तहलं बजेट हइ । संघीय सरकारं जेठ १५ गते बजेट हःगु झिंन्यान्हु लिपा प्रदेश सरकारं बजेट हयेमाःसा थ्वयां झिन्हुति लिपा स्थानीय सरकारं बजेट हयेमाः ।

थुगुसी न्हापांखुसी बजेट दयेकाच्वंगु प्रदेश सरकारया अर्थमन्त्रीतय्त धाःसा बजेट दयेकेगु ज्याय् यक्व कथंया हाथ्या वयाच्वंगु दु । उमित दकलय् अप्वः ध्यबाया स्रोत मगाइगु चिन्ता जुयाच्वंगु दु ।प्रदेश सरकारयात संघीय सरकारपाखें अनुदान कथं अप्वलय् झिंन्यागू अर्ब तक जक ध्यबा वइ । मेगु ध्यबा थःगु हे स्रोतपाखें राजश्व म्हयाः चूलाकेमाः । संविधानं प्रदेश व स्थानीय तहयात राजश्वया उठे यायेगु निंतिं न्यायोचित वितरण धयातःगु दु ।

प्रदेश सरकारया अर्थमन्त्रीतय्सं राजश्व परिचालन बारे संविधानय् उल्लेख जूसां थुकिया थप स्पष्ट व्याख्या जुइमाःगु खँ धयाच्वंगु दु ।थ्वपालय्या बजेटय् राजश्व म्हयेगु लिसें अनुदान हे मू स्रोत जूसां तर थुकिया सीमा धाःसा तसकं हे म्हो जक दुगु फुक्क प्रदेश सरकारतय् गुनासो दु । प्रदेश १ या आर्थिक मालिला तथा योजना मन्त्री इन्द्रबहादुर आङ्बो अधिकतम सीमा कथं हे अनुदान वःसां व तसकं म्हो जक जुइगु खँ धाःगु दु ।

‘थ्व बजेट तसकं हे म्हो जक दु । जिमिगु प्रदेशया आधारभूत आवश्यक्ताया ल्याखं नं थुलिं मगाः । जिमिसं थ्व स्वयां यक्व राजश्व ला म्हयेगु जुइ, तर केन्द्र गुगु कथं समानिकरण अनुदानया सीमा तोके याःगु दु, व धाःसा अजूचायापुगु जूगु दु’ मन्त्री आङ्बों बिबिसीलिसे खँ ल्हासें धयादीगु दु ।

बजेटया निंतिं ध्यबा मगाइगु चिन्ता यानाच्वंपिं अर्थ मन्त्रीतय्त ध्यबा गुकथं खर्च यायेगु व गुगु निकायपाखें खर्च यायेगु धयागु नं चिन्ता जुयाच्वंगु दु । कर्णाली प्रदेशया आर्थिक मामिला तथा योजना मन्त्री प्रकाश ज्वालां धयादीगु दु, ‘ध्यबा गुकथं खर्च यायेगु, छु निकायपाखें खर्च यायेगु स्पष्ट मदु ।’

‘केन्द्रं क्षेत्रीय व जिल्लास्तरया ज्याकू व उमिसं याना वयाच्वंगु ज्याया जिम्मा अझं प्रदेशयात लःल्हाःगु मदुनि । उकिं जिमिसं हयेगु बजेट कार्यान्वयन यायेत तसकं समस्या खनेदयाच्वंगु दु । छु ज्याकू मार्फत वा छु संयन्त्रपाखें बजेट कार्यान्वयन यायेगु धयागु हे प्रदेश सरकारयात अलमल जुयाच्वंगु दु’ ज्वालां धयादिल ।

ध्यबाया म्हयेगु व खर्च यायेगु चिन्ताया दथुइ प्रदेश सरकारयात तत्कालया हाथ्या धयागु कर्मचारीतय् अभाव हे जुयाच्वंगु दु । प्रदेश नं. २ या आर्थिक मामिला तथा योजना मन्त्री विजय यादवं धयादिल, ‘प्रदेश सरकारं सकलें कर्मचारी थ्यंगु मदुनि । ५० प्रतिशतति जक थ्यन जुइ । जिगु हे मन्त्रालयय् २५ म्ह कर्मचारीया दरबन्दी दुगु खःसा आःतक झिंनिम्ह जक दु ।

थ्वहे दकलय् तःधंगु हाथ्या जुयाच्वंगु दु ।’हाथ्या न्ह्याथें ज्याःगु दुसां फुक्कं प्रदेशतय्सं जनताया आकांक्षा सम्बोधन जुइकथं बजेटया प्राथमिकता तयाच्वनागु खँ धाःगु दु । अप्वः थें प्रदेशया प्राथमिकता कृषि, पूर्वाधार विकास, पर्यटन, शिक्षा व स्वास्थ्य हे जुयाच्वंगु दु ।

सम्बन्धित बुखँ

LEAVE YOUR COMMENTS