थौं सुरुङमार्गया उलेज्या

येँ (नेपालभाषा टाइम्स) – थानकोट–नागढुंगाय् दयेकूगु नेपाःया हे न्हापांगु सुरुङ मार्ग थनिंनिसें संचालनय् वइगु जूगु दु । भौतिक पूर्वाधारमन्त्री सुनिल लम्सालं थौं सुरुङ मार्गया उलेज्या यानादी । पूर्वाधार मन्त्री लम्सालं त्वाःदेवाय् मत च्याकाः ज्याझ्वःया उलेज्या यानादी । उलेज्याझ्वलय् सतक विभागया महानिर्देशक डा. विजय जैशीं परियोजना बारे जानकारी बियादी । ज्याझ्वलय् जापान सरकार व जाइकाया प्रतिनिधिपिंसं नं ब्वति काइगु ज्याझ्वः दु ।

जाइकाया अध्यक्ष डा. तानाका अकिहिको व नेपाःया निंतिं जापानया राजदूत माएदा तोरुं नं ज्याझ्वलय् संबोधन याइगु ग्वसाः दु । मन्त्री लम्साल, नेपाःया निंतिं जापानी राजदूत, जाइकाया अध्यक्ष, भौतिक पूर्वाधार तथा यातायात मन्त्रालयया सचिव व सतक विभागया महानिर्देशकं मंकाःकथं रिबन चानाः सुरुङ मार्गया उलेज्या यानादी ।

मन्त्री लम्सालं नेपाःपाखें ल्वहंपौया अनवरण यानादीसा जापानपाखें राजदूत व जाइकाया अध्यक्षं मंकाः कथं स्मारक अनावरण याइगु ज्याझ्वः दु । वयां लिपा मन्त्री लम्साल, जापानी राजदूत व जाइकाया अध्यक्षं सुरुङ दुने गाडी चले यानाः उलेज्या यानादीगु ज्याझ्वः दु ।

थौं उलेज्या जूसां सुरुङ पूर्ण रुपय् संचालनय् धाःसा मवइगु खँ धाःगु दु । आःया निंतिं परीक्षण यायेगु ल्याखं आकस्मिक व सुरक्षा निकायया सवारी साधनयात जक वये वने याकेबीगु धाःगु दु । आयोजनाया प्रमुख सौजन्य नेपालं तत्काल मेगु सवारी साधन चले मजुइगु जानकारी नं बियादीगु खः ।