ने. सं. ११४४ कौलाथ्व चौथी -

सुपरस्टार व मल्टिस्टारर होलि म्येँ

रङ्गया उत्सव कथं हनावयाच्वंगु होलि न्ह्यःने वःलिसे थुकिया लिच्वः मनोरञ्जन व संगीत ख्यलय् नं लानावःगु दु ।थ्वहे झ्वलय् थुगुसी निपु न्हूगु होलि म्येँ पिहां वयेत्यंगु दुसा उकी मध्ये छपु होलि म्येँय् नेवाः सुपरस्टार अवार्डया दाबेदारया रुपय् बय्बय् जुयाच्वंपिं निम्ह स्टारत खनेदयेकः वयेत्यंगु दु । उकी मध्ये छम्ह संकिपा ख्यःया लोकंह्वाःम्ह हिरोइन भिन्तुना जोशी खः ।

‘होलि होलि…’ बोलया थ्व म्येँय् मेम्ह सुपरस्टार अवार्डया दाबेदार रुपेन श्रेष्ठ ‘थक्वाः’यात मेनरोलय् खनेदइगु जूगु दु । थ्व म्येँया मू म्येँहालामि हसना शाक्य खःसा राजु शाक्यया नं सः नं न्यनेदइ । नांजाःम्ह संगीतकार सचिन सिहं लसय् हनादीगु थ्व म्येँ ‘सौभाग्य’ नांया म्येचाकय् पिदनाच्वंगु म्येँ खः ।

म्युजिक भिडियोया छायाँकन व सम्पादन सोहन मानन्धरं यानादीगु दुसा कलाकारपिंत समाः यायेगु ज्या सरिता बज्राचार्यं यानादीगु दु । शुटिङ्गय् सनि शाक्यं ड्रोन अपरेट यानादीगु खःसा सः ह्वलेगु ज्या उजय शाहीं यानादीगु खः । थ्व होलि म्येँ थुगुसीया होलिया लसताय् पिदनीगु जूगु दु ।

आः पिहां वयेत्यंगु मेगु होलि म्येँय् नेवाः म्यूजिक भिडियो ख्यलय् आपालं कलाकार दुथ्याकाः, अथे धयागु मल्टिस्टार दुथ्याकाः दयेकातःगु दु । थ्व सुनिता राजभण्डारी जुनुया परिकल्पना व निर्देशनय् दयेकूगु ‘अबिरं इलाः लखं छ्वाकाः…’ बोलया म्येँ खः । थ्व म्यँेय् नं नेपालभाषाया आपालं लोकंह्वाःपिं कलाकारपिंत दुथ्याकातःगु दु ।

थ्वसिबें न्हापा सुनिता जुनुं दयेकूगु चिहासंकिपा ‘हाःसः मदुगु सः’ दुने दुथ्याःगु छगू म्येँया म्यूजिक भिडियो दुने आपालं नांजाःपिं कलाकारपिंत दुथ्याकाः मल्टिस्टार म्यँे दयेकादीगु खःसा आः वयाः न्हूगु होलि म्येँ ‘अबिरं इलाः लखं छ्वाकाः…’ या म्यूजिक भिडियो दुने नं ८० म्हति कलाकारपिनिगु ख्वाः व अभिनय स्वयेदइगु जूगु दु ।

थ्व म्युजिक भिडियो दुने ‘राजमति’ संकिपाया नायः मणिराज लवतलिसें नकिं हिसिला महर्जनया नापनापं शोभा महर्जन (बसन्त ऋतुया नकिं), निकी महर्जन, रोजीना सुवाल, रश्मी महर्जन, आशाकाजी थकू, पूर्णिमा शाक्य, शोभा महर्जन (टिभि ज्याझ्वः न्ह्याकामि), नगीना जोशी, अकलमान श्रेष्ठ, मञ्जु श्रेष्ठ, सुनीता श्रेष्ठ ठाकुर, हरिमान दिवाकर, राजु महर्जन लिसें स्वयं निर्देशक परिकल्पनाकार सुनिता जुनु राजभण्डारी नं खनेदइगु थ्व म्येँय् मुकं यानाः ८० म्ह कलाकारपिं दुथ्याःगु दुसा थुकिया कोरियोग्राफर सुजन बज्राचार्य खः ।

थुगु होलि म्येँया छायांकन नं भिंतुना जोशी व रुपेन्द्र श्रेष्ठं म्हितादीगु ‘होलि होलि…’ म्यँेया म्यूजिक भिडियोया हे क्यामेरापर्सन व सम्पादक सोहन मानन्धरं यानादीगु दुसा थुगु म्येँया प्रस्तुतकर्ता पूर्णकाजी ज्यापु व सुनिता जुनु खः ।