छाय् तम्वल दीपिका ?

बलिउड अभिनेत्री दीपिका पादुकोण व अभिनेता रणवीर सिंह दथुइ इहिपा जुइगु पक्का जुइधुंकूगु दु । निम्हेसिया दथुइ थ्व हे वइगु नोभेम्बर महिनाय् इहिपा जुइत्यंगु दु । थुपिं निम्हेसिया मतिना व आः वयाः इहिपा जुइत्यंगु खँ बलिउड फिल्म उद्योग नं क्वानाच्वंगु दु । तर थःपिनिगु इहिपायात कयाः निम्हेसिनं नं आतक नं बांलाक म्हुतु चायेकाच्वंगु धाःसा मदु ।

इहिपा धूमधाम यायेमा वा गोप्य आखिर छन्हु सकसिनं सीकी । हालसालय् छगू ज्याझ्वलय् वंम्ह दीपिकायात पत्रकारतय्सं ‘छि व रणवीर दथुइ नोभेम्बर महिनाय् इहिपा जुइगु पक्का खः ला ?’ धकाः न्यंगु न्ह्यसःया लिसय् दीपिकां ‘असम्बन्धित न्ह्यसः’ धासें कडा रुपं प्रस्तुत जुल ।

‘छु न्ह्यसः न्यनेगु, गन न्यनेगु, न्यने जिउ कि मजिउ धइगु नं मसिउला ?’ दीपिकां अःखबतं पत्रकारयात न्ह्यसः न्यंगु खः ।
छगू संवेदनशील भावनायात कयाः जुयाच्वंगु ज्याझ्वलय् थःगु अनुभव नं कनेत वंम्ह दीपिकायात इहिपाया न्ह्यसः न्यनेवं व तम्वःगु खः ।