सरकारया दछि– सफल कि असफल ?

नेकपाया एकमना स्थायी अझ धाये दुइतिहाइया खड्ग प्रसाद ओलि नेतृत्वया शक्तिशाली सरकारं शासन याःगु दछिं मल्याक दयेधुंकल । सरकारया दछिया ज्याया लेखाजोखा यायेबलय् सरकारया ज्यां आमनागरिक निसें स्वयम नेकपाया नेतात तकं सन्तुष्ट जुयाच्वंगु खनेमदु । सत्तासिन दलया नेतातय्सं तकं सरकारया आलोचना यानाच्वंगु दु धाःसां जिउ ।

थ्व सरकारयात प्रधानमन्त्री केपी ओलीया आसेपासे, थः नेताया मलद्धारयात नं हरिद्धार खनीपिं कार्यकर्तातय्सं बाहेक आमजनता, बुद्धिजीवि, व्यापारी, उद्योगपति, मिडिया, लगानीकर्ता सुं नं सन्तुष्ट जूगु खनेमदु । सरकारं थ्व दछि दुने आमनागरिकं अपेक्षा याःकथं ज्या न्ह्याके मफुत ।

तर सरकार व प्रधानमन्त्री धाःसा दछिया ई धयागु तसकं म्हो ई धकाः छखे लिचिलेगु ज्या यानाच्वन । दछिया ई धयागु म्हो ई ख हे मखु, ज्या यायेगु खःसा दछि दुने यक्वं ज्या यायेफइ । ततःधंगु योजना–आयोजनाया ज्या न्ह्याके मफुसां बौद्ध–जोरपाटी–साँखुया सडक ला पिच याये फइ नि ।

निवाः स्ववाःया दुने याये फइगु थज्याःगु ज्या नापं छाय् मयात ले सरकार ? अथे हे अख्तियार दुरुपयोग निवारण आयोगया आयुक्त राजनारायण पाठकं ७८ लाख तका घूस नःगु प्रमाणं न्हापं प्रधानमन्त्रीयाथाय् प्यला न्ह्यव हे थ्यंसां आःतकं वयात छाय् कारवाही मयात ले ? छु घुस्याहायात कारवाही यायेत न्यादँ हे पियाच्वने माःगु लाकि छु ले ओलीजु ?

राजनीतिक दलया नेता कार्यकर्तातय्सं दलया अले सरकारया ज्या गतिविधियात सही मूल्याङ्कन यायेमाः, सहीयात सही, गलतयात गलत धाये फयकेमाः । नेता कार्यकर्तात दल व सरकारया च्यः जक, अले बुद्धि विवेकहीन जुया च्वने मजिउ ।

धायेगु हे खःसा स्वयं प्रधानमन्त्री ओली हे ज्या यायेगु स्वयां नं भाषण यायेगु व उखान धायेगु निसें बुद्धिजीवितय् आलोचना यायेगु ज्याय् हे जक तक्यना च्वन धाःसां जिउ । अथे हे नेकपाया कार्यकर्तात, सरकारया आसेपासेत, सरकार व प्रधानमन्त्रीया चाकरी–चाप्लुसी यायेगु ज्याय् हे व्यस्त जुयाच्वन धाःसां जिउ ।

थ्व दछि सरकार असफल जूगु जक मखसे आम नागरिकतय् दथुइ अलोकप्रिय जूगु हे खनेदत । सरकारया ज्या स्वयेबलय् ‘काम कुरो एकातिर कुम्लो बोकी ठिमितिर’ धाःगु उखान थें हे जक खनेदत । प्रधानमन्त्रीं भ्रष्टाचारयात शून्यय् हये धाःसां भ्रष्टाचारीयात कारवाही यायेमफु । उकिं प्रधानमन्त्रीया नां खड्ग प्रसाद ओली जूसां धार मदुगु खड्ग हे जक जुयाच्वंगु खनेदत ।

सरकारं ७८ लाख घूस नःम्ह राजनारायण पाठक, वाइडबडिइ ४ अर्बया भ्रष्टाचारी, ३३ किलो लुँ तस्कर एनसेलया ६२ अर्बया राजस्व छली याःपिं, फोरजीइ भ्रष्टाचार याःपिं भ्रष्टाचारीतय्त कारवाही यायेगु स्वयां नं संरक्षण जक यानाच्वन धकाः आमनागरिक दथइ चर्चा जुयाच्वंगु दु ।

वि.सं. २०४८ साल निसें नेपालय् स्थायी एकमना सरकार दयेके फुगु मदुनि, तर आःया सरकार स्थायी जक मखुसे दुइतिहाईया बल्लाःगु सरकार खः । अय्नं थ्व सरकारं आमनागरिकया अपेक्षा कथं ज्या न्ह्याके फुगु मदु । आमनागरिकतय्सं ततःधंगु अपेक्षा यानाच्वंगु नं मदु । सामान्य जनजीविका न्ह्याकेत अति आवश्यकीय वस्तुत जक सर्वसुलभ कथं दयेमा व शान्ति सुरक्षा, सुशासन कायम जुइमा धयागु हे जक अपेक्षा यानाच्वंगु खः ।

महंगी नियन्त्रण, भ्रष्टाचार नियन्त्रण, घुसखोर नियन्त्रण, धः–धू, ध्याचःया प्रदूषण पाखे मुक्त जुइगु थेंज्याःगु सामान्य माग जक दु आम नगारिकया । यँेया स्थानीयबासितय् तःधंगु समस्या धइगु लःया खः । तर सरकारं जनताया थज्याःगु अति सामान्य आवश्यकता नापं चुलाका बी फयाच्वंगु मदु ।

मेलम्चीया लः नं यँेमितय् निंतिं ‘आकाशको फल आँखा तरी मर’ धाःथें जक जुयाच्वन । मेलम्चिया लः अझ निदँ तक वइमखु धइगु चर्चा दु । थज्याःगु सामान्य ज्या यायेत नं दछिया ई म्हो धायेगु सरकारया लाज पचे यायेगु ज्या जक खः । थ्व सरकार खनाः आमनागरिक जक मखु उद्योगपति–व्यापारित निसें कयाः बुद्धिजिवी, लगानिकर्तात तकं सन्तुष्ट जुइ फयाच्वंगु मदु ।

सरकारं विकाश निर्माणया ज्या न्ह्याके मफुगु कारणं पुँजीगत मजुल । थ्व हे कारणं बैकय् तरलताया संकट जुल, गुकिं यानाः बैंकया ब्याज अप्वल । थज्याःगु हे कारणं उद्योगपति व्यापारित सन्तुष्ट खनेमदु । थुकिं उद्योग, व्यापार–व्यवसाय नापं कृषि आदिइ नकारात्मक लिच्वः लाकूगु खनेदु ।

अथेहे थ्व सरकार गठन जुसांनिसें शेयरबजारय् नं बांमलाक लिच्वः लाःगु खनेदु । शेयरया भाः कुहां वःगु वलं तुं जुयाच्वंगु दु । शेयरबजारं गति काये फयाच्वंगु मदु । १५ लाख स्वयां अप्व लगानीकर्तातय् लगानी संकटय् लानाच्वंगु दु । शेयरबजाः नं अर्थतन्त्रया छगू कचा खः । अथे ला शेयर बजारं गति काये मफयाच्वंगुयात शेयरबजाः बारे अर्थमन्त्री युवराज खतिवडां इलय् ब्यलय् बिया वयाच्वनीगु विवादास्पद तर्क, विचार नं खः धाइ ।

अथे ला देशय् प्रतिपक्ष नं दु– नेपाली कांग्रेस । सरकार ला सरकार हे जुल, गफाडिया जुल । तर प्रतिपक्ष ला झन हे खत्तम जुयाच्वन । नेपाली कांग्रेसं प्रतिपक्षया भूमिका छु धयागु हे मसिउ ला धयागु नं चर्चा जुयाच्वंगु दु । अथेला नेपाली कांग्रेस २०४८ साल निसें अप्व धयाथें सत्ताय् दयाच्वंगु कारणं नं प्रतिपक्षया भुमिका छु गथे धइगु मसिउ खः ला ।

गुलिखे आमनागरिकतय्सं प्रतिपक्ष गन ग्वाखनय् सुलाच्वन धकाः मालाच्वंगु दु । अथेला प्रतिपक्ष नेपाली कांग्रेस दल दुने हे पद व पावरया लागि महाभारत जुयाच्वंगु द । गन नेपाली काग्रेस धाःगु दल हस्तिनापुर थेंजकं जुइगु मखुला धकाः न चिउता तयाच्वंपि नं दु ।

अधिकांश नागरिकतय् धापू कथं सरकार, पार्टी, राजनीतिक दलया नेतातय्त सही दिशाय् यंकेत नेता–कार्यकर्तातय् अहम् भुमिका दइ । राजनीतिक दलया नेता कार्यकर्तातय्सं दलया अले सरकारया ज्या गतिविधियात सही मूल्याङ्कन यायेमाः, सहीयात सही, गलतयात गलत धाये फयकेमाः । नेता कार्यकर्तात दल व सरकारया च्यः जक, अले बुद्धि विवेकहीन जुया च्वने मजिउ ।

सम्बन्धित बुखँ

LEAVE YOUR COMMENTS