च्वने खनी ला झी मोनो रेलय् ?

येँ महानगरपालिकाय् विद्यासुन्दर शाक्य मेयर जुयादीगु नं दत्या दइन । अय्नं मेयर साहेबं येँ महानगरवासीतय् लागिं अज्याःगु सुबिधा जुइ कथं महानगरयात सुन्दर दयेकेगु छुं कथंया ज्या धाःसा आः तक न्ह्याकादीगु मदु धाइ । धायेत ला मेयर साहेबं थम्हं सच्छिन्हु दुने सछि व छगू ज्या याये धकाः प्रतिबद्धता नं प्वंकादीगु खः ।

तर वय्कः मेयर जुयादीगु झिंन्याला दइगु जुलं नं आः तक झिंन्यागू ज्या हे यायेफुगु मदुनि धकाः आलोचना जुयाच्वंगु दु । आः मेयर साहेबं ज्या मयाः धकाः धायेगु नं गथे ? व्यस्त ला वय्कः न्ह्याबलें हे व्यस्त दु । व व्यस्तता बरु गबलें बिदेशय्, गबलें उद्घाटनय् व गबलें शिलान्यासय् जुयाच्वन का ।

आः थ्व नं ला छगू कथंया ज्या हे खःनि मखुला ? थुकी हे ब्यस्त जुयाच्वसेंलि मेगु ज्या छाय् याये माल ? मखु ला ? झीपिं नं ला वहे पहयापिं खःनि । न्ह्यागु छगू ज्या जूसां मेयरयात निं दोष बीधुंकी । झीथाय् न्ह्याम्ह हे मन्त्री प्रधानमन्त्री वःसां नं वहे खः । जनतायात सुविधा बीगु धाल कि गबलें पुन्हि वयेकेमानि, गबलें आंैसी वयेके मानि ।

थःगु सुविधा बढे यायेगु धाल कि थौंया कन्हय् हे निर्णय यायेधुंकीगु दु । बहनी खँ जूसा सुथय् हे निर्णय जुइधुंकीगु । आः मेयर साहेबं ज्या मयाः धकाः धाये माःगु नं ला मदुनि । वा वल कि येँया सतकय् खुसिबाः हे वःथें लः ह्वालाह्वाला वइ । येँया न्हू पुखूयात स्यंकेगु भिंकेगु हाकनं स्यंकेगु यानाः ३ करोड ति दां खर्च यायेधुंकल ।

थ्व नं ला ज्या हे खः । आः थुकी ठेकेदारं गडबड यानाच्वंगु खःसा मेयरयात छुकिया दोष ? महानगरया स्वंगू स्वंगूमछि करोड दां फुका बिल । दां फुकेत नं ज्या याये हे माः । ज्या मयाःसा दां फुइ ला ? झीथाय् गपाय् गपाय्हाकःगु खुसिइ ताँ दयकेत लः सुके यायेम्वाः । तर न्हू पुखू भिंकेत लः नापं सुके याना बिल ।

आः थ्व सम्पदा थेंज्याःगु थासय् नापं ब्यापार यायेगु प्रस्ताव वय्कलं न्ह्यःने हयाच्वंगु दु । कन्हय् न्हूपुखू बांलाकाः अन पर्यटक हयेगु, कफीसप चायेकेगु अले आम्दानी यायेगु धइगु वय्कःया योजना खः । तर आः न्हूपुखू सुके जूगु स्वयेबलय् अन आः गुगु ग्राउण्ड थें बने जुयाच्वंगु खः, फुटपाथ मार्केट खोले याना बिल धाःसा उकिं बरु यक्व आम्दानी जुइ ख्वाः वः ।

धाइपिंसं ला छु नं धाइ धायेबलय् अथे यात धाःसा येँेदय् कुरुप जुइ । बांलाइ मखु । तर गय् बांमलाइ ? मेयर साबया हे नां हे सुन्दर खः, विद्यासुन्दर । वयेकःया नां हे यदि विद्यासुन्दर खःसा येँदेय् गय् यानाः कुरुप जुइ ? उकिसनं वय्कःयात उपमेयर छम्ह नं ल्वःम्ह लाःगु दु । विपक्षी दलयाम्ह जूगुलिं मेयर साबयात साप मछिं ।

मेयरं ज्या याःसा जितः मधाः धकाः गनीगु । ज्या मयाःसा मेयरं ज्या हे याये मफु धकाः गनीगु । थव् विपक्षी दलयाम्ह जुल धायेवं मेयर साहेबया ज्याय् पंगः ला थने मजिल नि हरि प्रभा खड्गीजु । बरु भागबण्डा मिले मिले यायेमाःगु खःसा गुलि भाग माःगु खः तप्यंक हे धयादिसँ । थौंकन्हय् न्ह्यागु ज्या नं भागबण्डां चले जुइ ।

छिं छिगु भागया खँ धयादिसँ, मेयर साबं उकी स्व हे स्वयादी । टनटन छाय् ?अथेला झी दुई तिहाइया दम्भ दुम्ह शक्तिशाली प्रधानमन्त्री ओलिी व मेयर साहेबया ज्याखँ भचा भचा ज्वः नं लाः । निम्हं छगू हे दलया कार्यकर्ता । राजनीतिक दल नेकपाया छम्ह नेता कार्यकारी प्रमुख, मेम्ह नगर प्रमुख । छम्ह निदँया दुने पानीजहाज चले याये धाइम्ह ।

छम्ह निदँया दुने मोनो रेल चले याये धाइम्ह । अथे ला धाइपिंसं ला मेयर साहेब व प्रधानमन्त्री ओली थः लाःपिं खः नं धाइगु । खःसा खः का । झीत छु । झीत ला कि पानीजहाजय् च्वने माःगु दु, कि मोनोरेलय् च्वने माःगु दु । पानीजहाज व मोनो रेलय् च्वने धकाः पियाच्वंपिं यक्व हे दु । गुलिं सीगु हे पेण्डिङय् तयाः नं च्वनाच्वंगु दु ।

मेयर साहेबं स्थानीय तहया निर्वाचनय् थः मेयरय् त्यात धाःसा निदँया दुने येँय् मोनो रेल चले याये, स्मार्ट सिटी दयेके धयादीगु खः । प्रधानमन्त्री ओलीं नं निदँया दुने पानीजहाज चले याये धयादीगु खः नि । अथेहे निदँया दुने तुइन बिस्थापित याये नं धयादीगु खः । तर तुइन बिस्थापित याइथें ला मच्वं, स्वनिगःया नेवाःतय्त चाहि विस्थापित याइ थें च्वं का बरु ।

मेयर साबं निदँया दुने येँ महानगरय् मोनो रेल चले याये धाःगुलिं महानगरवासीत दंग जूगु खः । मोनो रेलय् च्वने दइन धकाः । आः मोनो रेलय् च्वने दइगु जूगु खः ला मसिउ, आः येँ महानगरया सतक बेहाल जुयाच्वंसां दयकेत कुट मयाः । छाय् दयेके माल लँ नं ? मोनोरेल वइगु जुल धाःसा झीत लँ धइगु हे माली मखु ।

अथे ला नेपालय् खुसिया ताँ छपु दयेकेत ला निदँ माः धाःसा मोनो रेल गय् यानाः निदं सिधइ धकाः चिन्ता कयाच्वंपिं नं यक्वं दु । तर थ्व ला नेपाः देय् खः । आः मेयर साहेबं धालकि तयार जु हे जुइ नि धकाः पत्याः याःसां ज्या धाःसा इलय् सिधइ मखु । अथे ला मेयर साहेबं नं यक्वसिया प्रतिबद्धता कयातःगु दु ।

धन्दा कायेम्वाः । ज्या यायेत ३६५ न्हु झीके दु । निन्हु प्यन्हु सितिकं वंसां मूल ज्याय् लिच्वः लाइ मखु । वय्कः न्यादँया लागिं मेयर जुयादीम्ह खः । फुक्क ज्या छन्हुं सिधयेकल धाःसा बाँकी न्हि छु याना च्वनेगु ले ? आखिर न्ह्यागुसां न्यादँ बिते यायेमाःगु दु । हथाय्चायां छु याये ? आः येँ महानगरया सतक फुक्क ग्वारागिरि जुल धकाः नं आलोचना जुयाच्वन ।

आः सतक ग्वारागिरी जुल धकाः छु जुइ ? वा वल कि अन लः मुनी हं ? वा वइबलय् वइगु हे लः खःसा गालय् लः ममुंसा दुरु मुनी ला ? कि मखुसा प्रधानमन्त्रीयात धयाः वा वइबलय् लः मखु दुरु अथवा ग्याँस वयेका बी माल धाये माल । वा वल कि सतकय् ध्याचः जुइ, निभाः त्वल कि धुफ्वः दनी । व ला प्राकृतिक खँ खः ।

लः लात कि ध्याचः जुइ, निभाः लात कि धू जुइ । सुनां मसिउ ? अथे जुल धकाः आलोचना याइपिं नं दु । तर आलोचना जक मखु तारिफ याइपिं नं ला दु नि । मालावं वन धाःसा अज्याःपिं कार्यकर्ता गुलि दु गुलि । धाइगु नं दु नि, कार्यकर्तातय्सं नेतातय्गु मलद्वारयात नं हरिद्वार खनी हं । थ्व कार्यकर्तातय्गु खँ न्यनादिसँ, अले छु छु जुल सी नि ।

आः येँ महानगरया सतक फुक्क ग्वारागिरि जुल धकाः नं आलोचना जुयाच्वन । आः सतक ग्वारागिरी जुल धकाः छु जुइ ? वा वल कि अन लः मुनी हं ? वा वइबलय् वइगु हे लः खःसा गालय् लः ममुंसा दुरु मुनी ला ?