डबल नेकपाया भविष्य व राजनीति

नेपाःया राजनीति तसकं तरल अवस्थाय् लानाच्वंगु दु। सत्तारुढ दल नेपाल कम्युनिष्ट पार्टी (नेकपा)या आन्तरिक ल्वापुं यानाः देय्या राजनीति तरलताय् लाःगु खः । छखे पार्टीया कार्यकर्तात डबल नेकपाया अध्यक्ष पुष्पकमल दाहाल व माधवकुमार नेपाल पक्षय् दुसा मेपिं कार्यकर्तात धाःसा मेम्ह अध्यक्ष नापं प्रधानमन्त्री केपी शर्मा ओलीया पक्षय् दु। हालय् जक संसद भंग यायेगु ज्या जुइवं हे दाहाल-नेपाल पक्षया कार्यकर्तात मसाल जुलुस पिकायेत तकं लिफः स्वयेगु ज्या मयात। गुकुन्हु संसद भंग यात उकुन्हु हे ‘प्रतिगमन मुर्दावाद, संसद भंग फिर्ता गर’ लगायतया नारा थ्वयेकाः सतकय् नं कुहां वल । इमिसं उकथं नारा थ्वयेकेगु ज्या याःसां ‘ओली मुर्दावाद’ धकाः नारा थ्वयेकेगु ज्या धाःसा मयाः । उकिया अर्थ पार्टी तज्याये मजिउ धइगु संकेत खः । तर पार्टी ला दुनें दुनें तज्याना हे च्वंगु व क्वय् थ्यंक अज्याःगु सन्देश जक मवयाच्वंगु खः धकाः उगु पार्टीया नेतातय्सं हे अनौपचारिक रुपं धायेगु याना वयाच्वंगु दु ।

पार्टी दुने कचमच जुयाच्वंगु धइगु खँ राजनीतिप्रति चिउताः तइपिंसं मसिउगु मखु। तर निम्ह अध्यक्ष दथुया ल्वापु थुलि तच्वल कि स्वब्वय् निब्व बहुमत दुगु ओली सरकारं प्रतिनिधिसभा (संघीय संसद) भंग यानाः चुनावय् वनेगु घोषणा यायेमाःगु अवस्था वल । थुकथं प्रधानमन्त्री न्ह्याः वंगुया लिउने यक्व कारणत दयेफु, तर आम नागरिकं स्वइगु मिखां ला तप्यंक हे पार्टीया नेतातय्गु दथुइ विवाद जुयाः, इमि दथुइ भागबन्डा मिले मजुया हे धकाः धायेफु। स्वयेबले नं उकथंया हे ल्वापु नं खनेदु। इमि दथुइ गबलें नं सैद्धान्तिक खँय् ल्वापु जूगु खः धकाः सुं नं नेतातय्सं धाये फयाच्वंगु मदु। उकिया अर्थ कार्यशैली, भागबन्डा, जिम्मेवारीया बारे हे ल्वापु जूगु खः धकाः धायेफइगु अवस्था दु। ल्वापु नं थन तक कि संसद हे भंग यायेगु अवस्था तकं थ्यंगु धइगु थ्व चानचुने ल्वापु धाःसा अवश्य नं मखु ।

यदि संसद पुनःस्थापना यायेफत धाःसा आःया इलय् ओली पक्ष कमजोर जुइगु अले ओलीयात अविश्वासया प्रस्ताव तयाः जूसां प्रधानमन्त्री पदं चीकेफइगु तायेका उकथंया रणनीति दयेकूगु खनेदु। उखे संसद अधिवेशन संचालन यात धाःसा थः अल्पमतय् लाइगु नापं तसकं ज्या मछिनिगु तायेकाः हे ओलीं संसद विघटन यानादीगु खः ।

प्रधानमन्त्री ओलीं जनादेश व जनताया भावना अःखः राष्ट्रिय राजनीतियात अन्त्यहीन व अर्थहीन विवादय् यंकाः गतिरोध यायेगु ज्या याःगु, थःगु हे पार्टीपाखें सरकारयात घेराबन्दी याःगु, सरकारयात ज्या याके मबिउगु खँ तकं न्ह्यथना आः न्हूगु जनादेशकथं चुनावय् वनेगु निंतिं हे संसद विघटन यानागु स्पष्टिकरण बियादीगु दुसा उखे दाहाल-नेपाल पक्षपाखें ओली प्रतिगमनय् वंगु द्वपं तकं बीगु यानाहःगु दु। थ्व ल्याखं स्वल धाःसा आः निगू पक्षया दथुइ एकताया ज्या भंग जुया न्हूगुकथं ब्यागलं ब्यागलं चुनाव चिं ज्वना वनीगु अवस्था ब्वलंगु दु। ओलीं संसद विघटन यानादीगु धइगु संवैधानिक ज्या मखु, संविधानयात हाचां गायाः वंगु खः धकाः कानून ब्यवसायीनिसें कयाः पुलांपिं प्रधानन्यायाधिशपिंसं तकं धयादीगु दु। उकिं आः संसद विघटनया सवाल धइगु कानूनं क्वःछीगु अवस्था वल । बल सर्वोच्च अदालतया कोर्टय् लाःवंगु दु धकाः तकं धयाहःगु दु ।

दाहाल-नेपाल पक्ष फुसा थ्व हे संसदयात हाकनं म्वाकेगु व उकिया निंतिं कानूनी लँपुकथं सांसदतय्गु ल्हाःचिं सहित सर्वोच्च अदालत वनेगु तयारी याःगु दु। यदि संसद पुनःस्थापना यायेफत धाःसा आःया इलय् ओली पक्ष कमजोर जुइगु अले ओलीयात अविश्वासया प्रस्ताव तयाः जूसां प्रधानमन्त्री पदं चीकेफइगु तायेका उकथंया रणनीति दयेकूगु खनेदु। उखे संसद अधिवेशन संचालन यात धाःसा थः अल्पमतय् लाइगु नापं तसकं ज्या मछिनिगु तायेकाः हे ओलीं संसद विघटन यानादीगु खः । थ्व ल्याखं आःया इलय् डबल नेकपा आः छु जुइगु खः धइगु खँ छगू कानूनी रुपं सर्वोच्च अदालतं निर्धारण याइगु अवस्था ब्वलंगु दु। उकिं डबल नेकपाया भविष्य सर्वोच्च अदालतया ल्हातय् लाःवंगु दु धकाः धायेफइगु अवस्था ब्वलंगु दु। डबल नेकपाया भविष्य नापनापं समग्र नेपाःया राजनीतिक भविष्य नं थुगु घटना नाप स्वानाच्वंगु खने दुसां नं मंगलवाः हे पार्टीया भविष्य छु जुइ धकाः धायेफु। सर्वोच्च अदालतया निर्णय वइगु ताः ई माली, पार्टीया केन्द्रीय कमिटीया मुँज्या ला थ्व हे मंगलवाः  जूवनाच्वंगु दु। मंगलवाः जुइगु ब्यागलं ब्यागलं कथंया केन्द्रीय कमिटीया मुँज्यां हे पार्टी तज्याइ कि तज्याइमखु धकाः स्पष्ट जुइफुगु स्थिति दु ।

सोमवाःया संसद विघटनया घटनां आः नेपाःयाराजनीति छु जुइगु खः धकाः यक्वसिनं चिउताः तयाच्वंगु दु। कन्हय् वनाः डबल नेकपा छु जुइगु खः उकिया हे आधारय् नेपाःया राजनीति न्ह्याः वनीगु अवस्था दु। आः डबल नेकपा छु जुइगु खः धकाः मंगलवाः स्पष्ट जुइगु जूगु दु। डबल नेकपा दुने कचामचा गुटयात त्वःताः खँ ल्हायेबलय् मूल रुपं निगू गुट दु। ओली गुट व दाहाल-नेपाल गुट। थ्व निगुलिं गुटं आः पार्टीया केन्द्रीय कमिटीया मुँज्या थ्व हे मंगलवाः सःतूगु दु। छगू हे दिनय् छगू हे इलय् केन्द्रीय कमिटीया मुँज्या सःतूगु धइगु मूल रुपं छम्हेस्यां मेम्हेसित कारवाही यानागु धकाः घोषणा यानाः ब्यागलंकथंया दल दयेकेगु निंतिं खः धकाः धायेफइ । नेपाल-दाहाल गुटं ला पार्टीया च्वय्या तह अर्थात स्थायी समितिया बैठकं कारवाही याये धुन आः केन्द्रीय कमिटीं कारवाही यायेगु जुल धकाः निर्वाचन आयोगयात जानकारी तकं बीगु ज्या जुइधुंकूगु दु। थ्व धइगु अवश्य नं पार्टी तज्याइगुया अन्तिम अवस्थाय् थ्यंगुया संकेत खः। उखे प्रधानमन्त्री तकं जुयादीम्ह डबल नेकपाया मेम्ह अध्यक्ष केपी शर्मा ओलीं नं आः एकता भंग जुइगु अले न्हापाया हे एमाले निर्माण जुइगु नापं चुनावय् वनेत तयार जुइमाःगु अवस्था वल धकाः गुकथंया अभिब्यक्ति बियादिल थ्व धइगु पार्टी तज्याइगु अन्तिम चरणय् हे थ्यंगु खः । उकिं ओली पक्षयाके केन्द्रीय कमिटीया ४० प्रतिशत दुसां मदुसां ओलीं आः हाकनं एमाले पार्टी दयेकीगु जुल धइगु स्पष्ट जूगु दु। थुकिया पुसा पीगु ज्याकथं छुं ई न्ह्यः हे एमाले नांगु पार्टी निर्वाचन आयोगय् दर्ता याकेगु ज्या नं जूगु खः । अबले नं थुगु खँ पिहां मवःगु मखु तर मनूतय्सं थुकियात उलि वास्ता मयाःगु जक खः। आः वया धाःसा एमाले पार्टी दयेकीगु जुल । डबल नेकपाया भविष्य मंगलवाः जुयाच्वंगु दु। अले डबल नेकपाया भविष्य दुने हे नेपाःया राजनीतिक भविष्य स्वानाच्वंगु दु। तरलता जुयाच्वंगु, राजनीति गुखे वनी धकाः स्पष्ट जुइगु अवस्था धइगु मंगलवाः हे जुयाच्वंगु खनेदु ।

सम्बन्धित बुखँ

LEAVE YOUR COMMENTS