तिंख्यलय् छवाःयंकं मनोक्रान्ति योग साधना शिविर

येँ – मनोक्रान्ति नेपालं थ्व हे वइगु फागुनया लिपांगु वालय् तिंख्यलय् मनोक्रान्ति योग शिविर संचालन यायगु जूगु दु । संस्थां ३२ क्वःगु मनोक्रान्ति दिवसया लसताय् लाकाः थनया तिंख्यलय् छवाःयंकंया योग साधना शिविर संचालन यायेत्यंगु खः । मनोक्रान्ति केन्द्र नेपालं छगू पत्रकार सम्मेलन यासें उगु जानकारी बिउगु खः ।

पत्रकार सम्मेलनय् संस्थाया संस्थापक डा. योगी विकासानन्दं छवाःयंकंया शिविरय् न्हिं द्वःछि स्वयां अप्वः योग साधकयात सहभागि याकेगु लक्ष्य दुगु जानकारी बियादिल । शिविरय् न्ह्याम्हं सहभागि जुइ फइ धासें स्वनिगः पिनें वइपिं योग साधकतय् निंतिं च्वनेगु व्यवस्था संस्थां हे व्यवस्थापन याइगु जानकारी बिउगु दु ।

योग साधनपाखेंं समाज रुपान्तरणय् चेतना अभिवृद्धि यायेगु उद्देश्यं ग्वसाः ग्वये त्यंगु योग साधना शिविर निःशुल्क जुइगु नं पत्रकार सम्मेलनय् जानकारी बिउगु खः । वइगु चैत २ गतेतक न्ह्याइगु योग साधना शिविर ६ः३० निसें ८ः३० ताःईतक संचालन जुइगु नं जानकारी बिउगु दु । संस्थाया संस्थापक डा. योगी विकासानन्दं २०४३ सालंनिसें थुकथंया अभियान संचालन याना वयाच्वंगु खः ।