प्रधानमन्त्रीपाखें मिसा भलिबल टिमयात सिरपाः लःल्हात

येँ (नेपालभाषा टाइम्स)÷ प्रधानमन्त्री केपी शर्मा ओलीं ‘काभा वुमन्स भलिबल नेसन्स लिग’ २०२४ य् रजत पदक त्याकूपिं नेपाःया मिसा भलिबल टिमया कासामितय्त बिहिवाः सिरपाः लल्हाःगु दु । बिहिवाः प्रधानमन्त्री निवास बालुवाटारय् जूगु ज्याझ्वलय् कासामितय्त नगद सिरपाः बियाः सम्मान याःगु खः ।

बालुवाटारय् जूगु ज्याझ्वलय् टिमया कप्तान अरुणा शाहीलिसें १४ म्ह कासामि, प्रशिक्षक, सहायक प्रशिक्षक, व्यवस्थापक, फिजियोतय्त सम्मान याःगु खः । कासामितय्त म्होतिं स्वंगू स्वंगू लाख सिरपाः बिउगु खः । टिमया मुख्य प्रशिक्षक जगदीशप्रसाद भट्टयात निगू लाख सिरपाः बिउगु खःसा सहायक प्रशिक्षक भरत यादव, व्यवस्थापक निलमसिंह बज्राचार्य व फिजियो लोकेन्द्र कुँवरयात म्होतिं छगू लाख नीद्वः सिरपाः बिउगु खः ।
युवा व खेलकुद मन्त्रालयं बिउगु जानकारीकथं सम्मानित जूपिं कासामितय्गु बैक खाताय् सिरपाःया ध्यबाः जम्मा जुइधुंकूगु दु । खाता मदुपिं कासामितय्गु निंतिं ज्या जुयाच्वंगु दु ।

प्रधानमन्त्री केपी शर्मा ओलीं मिसा भलिबलया सफलताय् लय्तागु धासें अझ मेहनत यायेत इनाप याःगु खः । कासामितय्त अभ्यास यायेत माःगु वातावरण व पूर्वाधारय् सरकारं ग्वाहालि यायेत कुतः याइगु नं प्रधानमन्त्री ओलीं धाःगु खः । प्रधानमन्त्री ओलीं कीर्तिपुरया टियु मैदानयात स्वसः न्हूया दुने स्तरोन्नति यायेगु निर्णय जुइधुंकूगु नं धाःगु खः । झिक्वःगु राष्ट्रिय खेलकुद धेंधेंबल्लाःया तयारी यायेत नं प्रधानमन्त्रीं धाःगु खः । दशरथ रंगशालाया स्थितियात कयाः थः दुःखी जूगु व मैदानया कारणं देशया हे बेइज्जत जुयाच्वंगु नं प्रधानमन्त्री धाःगु खः । रंगशाला खराब जूगुलिं बुधवाः जुइमाःगु साफ यु–२० या फाइनल कासा तकं जुइमफुगु खः ।

नेपाः राष्ट्रिय भलिबल टिमया कप्तान अरुणा शाहीं थ्व सम्मानया निंतिं नेपाः सरकारयात सु्भाय् बिउगु खः । कप्तान शाहीं थःपिनि जिम्मेवारी अप्वःगु व उत्कृष्ट कासा म्हितेगु धाःगु खः ।
वंगु महिनाय् येँया दशरथ रंगशाला जूगु काभा नेसन्स लिगय् नेपाः फाइनलय् भारतलिसे ३–२ या सेटय् पराजित जूगु खः ।